Zebur 28

28-küy •••• Perwerdigargha tayinish

1 Dawut yazghan küy: —

I Perwerdigar, Sanga nida qilimen;

I méning Qoram Téshim, manga süküt qilmighaysen;

Chünki Sen jimjit turuwalisang,

Men chongqur hanggha chüshidighanlargha oxshashla bolimen.■

2 Sanga peryad kötürginimde,

Séning muqeddes kalamxananggha qolumni kötürginimde,

Méning iltijalirimning sadasini anglighaysen!□

3 Méni reziller we qebihlik qilghuchilar bilen bille tashliwetmigeysen;

Ular aghzida yéqinliri bilen dostane sözleshsimu,

Könglide öchmenlik bardur.■

4 Ularning qilmishlirigha qarap,

Ishlirining yamanliqigha qarap ish tutqaysen;

Qolining qilghanliri boyiche özlirige yandurghaysen;

Tégishlik jazani özlirige qayturghaysen.

5 Chünki ular ne Perwerdigarning qilghanlirini,

Ne qollirining ishligenlirini héch nezirige almaydu,

Perwerdigar ularni ghulitip, qaytidin bash kötürgüzmeydu.

6 Perwerdigargha teshekkür-medhiye qayturulsun;

Chünki U méning iltijalirimning sadasini anglighan.

7 Perwerdigar méning küchüm, méning qalqinimdur;

Méning könglüm uninggha ishendi,

Shuning bilen yardem taptim;

Shunga könglüm zor shadlinidu,

Öz küyüm bilen men Uni medhiyileymen.

8 Perwerdigar Öz xelqining küchidur,

Shundaqla mesih qilghinigha qutquzghuchi qorghandur.□

9 Öz xelqingni qutquzghaysen,

Mirasingni beriketlik qilghaysen;

Ularni padichidek béqip ozuqlandurghaysen,

Menggüge ularni kötürüp yürgeysen.□

b «Séning muqeddes kalamxananggha qolumni kötürginimde» — «kalamxana» muqeddes chédirdiki «eng muqeddes jay»ni körsitidu. Némishqa mushu yerde «eng muqeddes jay» «kalamxana» déyilidu? Sewebi, «eng muqeddes jay» ichide «ehde sanduqi» yatidu, «ehde sanduqi» ichide Xuda Israil bilen tüzgen ehdiname (Xudaning söz-kalami) saqlaqliq idi.

■28:3 Zeb. 12:1-2; Yer. 9:7
~4~ «Perwerdigar ... mesih qilghinigha qutquzghuchi qorghandur» — Xudaning «mesih qilghini»: — (1) Xuda Israillar üstige tikligen padishah; (2) axirda u dunyagha ewetidighan Qutquzghuchi-Mesihni körstidu. «Mesih» toghruluq 2-küydiki izahatlarni hem «Tebirlerni» körüng.
~5~ «Öz xelqingni qutquzghaysen, mirasingni beriketlik qilghaysen;...» — Xudaning Öz xelqi del Özining mirasi ikenliki muqeddes kitabta köp yerlerde tilgha élinidu.