1 Neghmichilerning béshigha tapshurulup oqulsun dep, Dawut yazghan küy: —

I Perwerdigar, Sen méni tekshürüp chiqting,

Hem méni bilip yetting;

2 Özüng olturghinimni, turghinimnimu bilisen;

Yiraqta turuqluq könglümdikini bilisen.

3 Basqan qedemlirimni, yatqanlirimni ötkemengdin ötküzdung;

Barliq yollirim Sanga ayandur.

4 Berheq, tilimgha bir söz kéle-kelmestinla, i Perwerdigar,

Mana Sen buni eyni boyiche bilmey qalmaysen.

5 Sen méni aldi-keynimdin orap turisen,

Qolungni méning üstümge qondurghansen.

6 Bundaq bilim manga shunchilik tilsimat bilinidu!

Shundaq yüksekki, men uni bilip yételmeydikenmen.

7 Rohingdin néri bolushqa nelergimu baralayttim?

Huzurungdin özümni qachurup nelerge baralayttim?

8 Asmanlargha chiqsam, mana Sen ashu yerde;

Tehtisarada orun salsammu, mana Sen shu yerde;[a]

9 Seherning qanatlirini élip uchup,

Déngizning eng chet yerliride tursam,

10 Hetta ashu jayda qolung méni yétekleydu,

Ong qolung méni yöleydu.

11 Men: «Qarangghuluq méni yapsa,

Etrapimdiki yoruqluq choqum kéche bolidu» — désem,

12 Qarangghuluqmu Sendin yoshurunalmaydu,

Kéchimu Sanga kündüzdek aydingdur,

Qarangghuluqmu Sanga yoruqtektur.

13 Berhek, Sen méning ichlirimni yasighansen;

Anamning qorsiqida méni toqughansen;□«Berheq, Sen méning ichlirimni yasighansen» — yaki «Chünki Sen méning ichlirimni yasighansen». «Ichlirim» bolsa ibraniy tilida «böreklirim» dégen söz bilen ipadilinidu (bezi waqitlarda börekler wijdanni bildüridu). Bashqa birxil terjimisi: «Berheq, Sen méning ichlirimge igidursen».

14 Men Séni medhiyileymen,

Chünki men sürlük we karamet yasalghanmen;

Séning qilghanliring karamet tilsimattur;

Buni jénim obdan bilidu.

15 Men yoshurun jayda yasalghinimda,

Yer tegliride epchillik bilen toqulup shekillendürülginimde,

Ustixanlirim Sendin yoshurun emes idi.[c]

16 Ezalirim téxi apiride bolmighan künlerde,

Ular yasiliwatqan künlerde,

Közüng téxi shekillenmigen jismimni körüp yetkenidi;

Ularning hemmisi alliburun deptiringde yézilghanidi.□«Ularning hemmisi alliburun deptiringde yézilghanidi» — yene birxil terjimisi: «Ular yoq bolghan waqitta, manga békitilgen künlirimning hemmisi deptiringde yézilghan».

17 Ah Tengrim, oyliring manga neqeder qimmetliktur!

Ularning yighindisi shunche zordur!

18 Ularni sanay désem, ular déngizdiki qumlardinmu köptur;

Uyqudin közümni achsam, men yenila Sen bilen billidurmen!□«Uyqudin közümni achsam, men yenila Sen bilen billidurmen!» — «uyqudin közümni achsam» bu yerde belkim tirilish künini puritidu.

19 Ah, Sen rezillerni öltürüwetseng iding, i Xuda!

Qanxor kishiler, mendin yiraq bolush!

20 Chünki ular Séning toghruluq hiylilik bilen sözleydu;

Séning sheherliring ular teripidin azduruldi.□«Séning sheherliring ular teripidin azduruldi» — bashqa birxil terjimisi: «séning düshmenliring namingni bikar ishlitidu».

21 Sanga öchmen bolghanlargha, i Perwerdigar, menmu öchqu?

Sanga qarshi chiqqanlargha menmu yirginimen’ghu?

22 Ulargha chish-tirniqimghiche öchturmen;

Ularni öz düshmenlirim dep hésablaymen.

23 Méni közitip tekshürgeysen, i Tengrim!

Méning qelbimni bilip yetkeysen!

Méni sinap, ghemlik oylirimni bilgeysen;[g]

24 Mende Özüngge azar bergüdek yolning bar-yoqluqini körgeysen;

We méni menggülük yolungda yétekligeysen!