1 I oghullar, atanglarning nesihetlirini anglanglar,

Köngül qoysanglar,

Yoruqluqqa érishisiler.

2 Chünki silerge ögitidighanlirim yaxshi bilimdur,

Körsetmilirimdin waz kechmenglar.

3 Chünki menmu atamning yumran balisi idim,

Anamning arzuluq yalghuz oghli idim,■1Tar. 29:1

4 Atam manga ögitip mundaq dédi:

— Sözlirimni ésingde tut;

Körsetmilirimge riaye qil,

Shuning bilen yashnaysen.■1Tar. 28:9

5 Danaliqni alghin, eqil tap,

Éytqan sözlirimni untuma, ulardin chiqma.

6 Danaliqtin waz kechme, u séni saqlaydu;

Uni söygin, u séni qoghdaydu.

7 Danaliq hemme ishning béshidur;

Shunga danaliqni alghin;

Barliqingni serp qilip bolsangmu, eqil tapqin.■Pend. 23:23

8 Danaliqni ezizligin, u séni kötüridu,

Uni ching quchaqlighanda, séni hörmetke sazawer qilidu.

9 Béshinggha taqalghan gül chembirektek sanga güzellik élip kélidu,

Sanga shöhretlik taj in’am qilidu.■Pend. 1:19

10 I oghlum, qulaq salghin, sözlirimni qobul qilghin,

Shunda ömrüngning yilliri köp bolidu.

11 Men sanga danaliq yolini ögitey,

Séni durusluq yollirigha bashlay.

12 Mangghiningda qedemliring cheklenmeydu,

Yügürseng yiqilip chüshmeysen.■Zeb. 91:9-12

13 Alghan terbiyengni ching tut,

Qolungdin ketküzmigin;

Obdan saqlighin uni,

Chünki u séning hayatingdur.

14 Yaman ademler mangghan yolgha kirme,

Rezillerning izini basma.■Zeb. 1:1; Pend. 1:10,15

15 Ularning yolidin özüngni qachur,

Yoligha yéqin yolima;

Uningdin yandap ötüp ket,

Néri ketkin.

16 Chünki yamanlar birer rezillik qilmighuche uxliyalmas,

Birersini yiqitmighuche uyqusi kelmes.

17 Yamanliq ularning ozuqidur,

Zorawanliq ularning sharabidur.

18 Lékin heqqaniylarning yoli goya tang nuridur,

Kün chüsh bolghuche barghanséri yoruydu.

19 Yamanlarning yoli zulmet kéchidek qapqarangghu,

Ular yiqilip, némige putliship ketkinini bilmeydu.

20 I oghlum, sözlirimni köngül qoyub angla,

Geplirimge qulaq sal.

21 Ularni közüngde tutqin,

Yürikingning qétida qedirlep saqlighin.

22 Chünki sözlirim tapqanlar üchün hayattur,

Ularning pütün ténige salametliktur.■Pend. 4:13

23 Qelbingni «hemmidin eziz» dep sap tut,

Chünki barliq hayat ishliri qelbtin bashlinidu.

24 Aghzingni egri geptin yiraq tart,

Lewliring ézitquluqtin néri bolsun.

25 Közüngni aldinggha tüz tikkin,

Neziringni aldinggha toghra tashla;

26 Mangidighan yolungni obdan oylan’ghin,

Shundaq qilsang ishliring puxta bolidu.

27 Onggha, solgha qaymighin;

Qedemliringni yamanliq yolidin néri tart.■Qan. 5:32; 28:14