1 I oghlum, telimimni untuma,

Dégenlirimni hemishe könglüngde ching tut.□«ching tut» — dégen söz ibraniy tilida: «qoghda, mudapie qil» dégen meninimu bildüridu.

2 Chünki u sanga beriketlik künler, uzun ömür we xatirjemlik qoshup béridu.□«beriketlik künler» — ibraniy tilida «künlerning uzunluqi».  [c]

3 Méhriban we heq-semimiy bolushtin waz kechme,

Bularni boynunggha ésiwal,

Qelbingge pütiwal.□«qelbingge pütiwal» — ibraniy tilida «qelbingdiki taxtaygha pütüwal» (Musa peyghemberge tapshurulghan muqeddes qanun ikki tash taxtaygha pütülgenidi).  [e]

4 Shundaq qilghanda Xuda we bendilerning neziride iltipatqa layiq bolisen, danishmen hésablinisen.□«iltipatqa layiq bolisen» — mushu yerde ibraniy tilida «iltipat» dégen söz ikki bisliq bolup, ikkinchi menisi «güzellik»tur.

5 Öz eqlingge tayanmay, Perwerdigargha chin qelbing bilen tayan’ghin;

6 Qandaqla ish qilsang, Perwerdigarni tonushqa intil;

U sanga toghra yollarni körsitidu.□«Qandaqla ish qilsang,...» — ibraniy tilida «Barliq yolliringda...».  [h]

7 Özüngni eqilliq sanima;

Perwerdigardin eyminip, yamanliqtin yiraq bol.[i]

8 Shundaq qilghiningda, bu ishlar derdingge derman,

Ustixanliringgha yilik bolidu.□«derdingge derman... bolidu» — ibraniy tilida «kindikingge salametlik... bolidu».

9 Perwerdigarning hörmitini qilip mal-dunyayingdin hediyelerni sun’ghin,

Étizingdin tunji chiqqan mehsulatliringdin Uninggha atighin;[k]

10 Shundaq qilghiningda, ambarliring ashliqqa tolup tashidu,

Sharab kölchekliringde yéngi sharab éship-téship turidu.[l]

11 I oghlum, Perwerdigarning terbiyisige biperwaliq qilma,

Uning tenbihidin bezme.[m]

12 Chünki, ata eziz körgen oghligha tenbih-terbiye bergendek,

Perwerdigar kimni söygen bolsa uninggha tenbih-terbiye béridu.[n]

13 Danaliqqa muyesser bolghan kishi,

Yoruqluqqa ige bolghan kishi némidégen bextlik-he!

14 Chünki danaliqning paydisi kümüshning paydisidin köptur,

Qimmiti sap altunningkidinmu ziyadidur.[o]

15 U leel-yaqutlardin qimmetliktur,

Intizar bolghan herqandaq nersengdin héchbirimu uninggha teng kelmestur.[p]

16 Danaliqning ong qolida uzun ömür,

Sol qolida bayliq we shöhret bardur.

17 Uning yolliri sanga xush puraq tuyulur,

Uning barliq teriqiliri séni aram tapquzur.

18 U özini tapqan ademge «hayatliq derixi»dur,

Uni ching tutqan kishi némidégen bextlik!□«hayatliq derixi» — shübhisizki, «Éren baghchisi»diki Adem’atimiz we Hawa’animizning behrimen bolushigha teyyarlan’ghan «hayatliq derixi»ni körsitidu (Tewrat, «Yar.» 2:9).

19 Perwerdigar danaliq bilen yer-zéminni berpa qildi,

Hékmet bilen asmanni ornatti.

20 Uning bilimi bilen yerning chongqur qatlamliri yérildi,

Hemde bulutlardin shebnem chüshti.□«yerning chongqur qatlamliri yérildi» — belkim Nuh peyghemberning waqtidiki «chong topan» bilen munasiwetlik bezi ishlarni körsitishi mumkin («Yar.» 7:11)  [s]

21 I oghlum! Danaliq bilen bilimni közüngdin chiqarma,

Pishqan hékmet we pem-parasetni ching tut.

22 Shuning bilen ular jéninggha jan qoshidu,

Boynunggha ésilghan ésil marjandek sanga güzellik qoshidu.

23 Shu chaghda yolungda aman-ésen mangalaysen,

Yolda putlashmaysen.[t]

24 Yatqanda héch némidin qorqmaysen,

Yétishing bilenla tatliq uxlaysen.[u]

25 Béshinggha dehshetlik wehime chüshkende qorqmighin,

Rezillerning weyranchiliqidin ghem qilmighin!□«Rezillerning weyranchiliqidin ghem qilmighin!» — yaki «Rezillerning béshigha chüshken weyranchiliqtin ghem qilmighin!».  [w]

26 Chünki Perwerdigar séning tayanchingdur,

U putungni qapqanlardin néri qilidu.

27 Peqet qolungdin kelsila, hajetmenlerdin yaxshiliqni ayimighin.

28 Qolum-qoshniliring séningdin ötne sorap kirse, «Qaytip kétip, ete kelgin, ete bérey» — démigin.

29 Qoshnanggha ziyankeshlik niyitide bolma,

Chünki u sanga ishinip yéningda xatirjem yashaydu.

30 Birsi sanga ziyan yetküzmigen bolsa,

Uning bilen sewebsiz majiralashma.□«sewebsiz majiralashma» — yaki «sewebsiz dewalashma».

31 Zulumxor kishige heset qilma,

Uning yol-tedbirliridin héchnémini tallima.[y]

32 Chünki qingghir yollarni mangidighanlar Perwerdigarning neziride yirginchliktur,

Lékin Uning sirdash dostluqi durus yashawatqan ademge teelluqtur.[z]

33 Perwerdigarning leniti rezillik qilghuchining öyididur,

Lékin U heqqaniy ademning öyige bext ata qilur.[aa]

34 Berheq, mesxire qilghuchilarni U mesxire qilidu,

Lékin kichik péil kishilerge shepqet körsitidu.[bb]

35 Danalar shöhretke warisliq qilidu,

Lékin hamaqetler reswa qilinidu.□«Lékin hamaqetler reswa qilinidu» — yaki «Lékin U (Xuda) hamaqetlerni nomusqa qalduridu» (ibraniy tilida kinaye ishlitip, axirqi söz «kötürülidu» bolidu).