1 Katta erbab bilen hemdastixan bolsang,

Aldingdiki kim ikenlikini obdan oylan.

2 Ishtiying yaman bolsa,

Gélinggha pichaq tenglep turghandek özüngni tart. ◼«Özüngni tart» — ibraniy tilida «gélinggha pichaq tenglep tur» dégen söz bilen ipadilinidu.

3 Uning nazunémetlirini tama qilma,

Ular adem aldaydighan tamaqlardur.

4 Bay bolimen dep özüngni upratma;

Özüngning zéhningni bu ishqa qaratma. ◼«Özüngning zéhningni bu ishqa qaratma» — bashqa birxil terjimisi: «Öz eqlingdin chékinip özüngni tart». 3:5-ayetni körüng.

5 Bayliqlargha köz tikishing bilenla, ular yoq bolidu;

Pul-mal derweqe özige qanat yasap,

Xuddi bürküttek asman’gha uchup kéter.

6 Ach közning nénini yéme,

Uning ésil nazunémetlirini tama qilma;

7 Chünki uning köngli qandaq bolghandek, özimu shundaq.

U aghzida: — Qéni, alsila, ichsile! — désimu,

Biraq könglide séni oylighini yoq.

8 Yégen bir yutum taamnimu qusuwétisen,

Uninggha qilghan chirayliq sözliringmu bikargha ketken bolidu.

9 Exmeqqe yol körsitip salma,

Chünki u eqil sözliringni közge ilmas. [c]

10 Qedimde békitken yerning pasil tashlirini yötkime,

Yétimlarning étizlirighimu ayagh basma; [d]

11 Chünki ularning Hemjemet-Qutquzghuchisi intayin küchlüktur;

U Özi ular üchün üstüngdin dewa qilar. ◼«Hemjemet-Qutquzghuchi» — kona Israilda «hemjemet-qutquzghuchi» («goél»)ning qilidighan yene bir ishi özining jemetidiki uwal qilin’ghanlar üchün adaletni yürgüzüsh idi. Uning uruq-tughqanliridin birsi qatilliq qestige uchrighan bolsa, «hemjemet-qutquzghuchi»ning qatilni öltürüsh hoquqi hem wezipisi bar idi. Mushu ayettiki «hemjemet-qutquzghuchi» bolsa Xuda Özidur, elwette.

12 Nesihetke köngül qoy,

Ilim-bilimlerge qulaq sal.

13 Balanggha terbiye bérishtin érinme;

Eger tayaq bilen ursang, u ölüp ketmeydu; [f]

14 Sen uni tayaq bilen ursang,

Belkim uni tehtisaradin qutquzuwalisen. ◼«tehtisara» — ölgenlerning rohliri baridighan jayni körsitidu.

15 I oghlum, dana bolsang,

Méning qelbim qanche xush bolar idi!

16 Aghzingda orunluq sözler bolsa, ich-ichimdin shadlinimen. ◼«ich-ichimdin shadlinimen» — ibraniy tilida «böreklirim shadlinidu».

17 Gunah sadir qilghuchilargha reshk qilma,

Herdaim Perwerdigardin eyminishte turghin; [i]

18 Shundaq qilghiningda jezmen köridighan yaxshi kününg bolidu,

Arzu-ümiding bikargha ketmes. [j]

19 I oghlum, sözümge qulaq sélip dana bol,

Qelbingni Xudaning yoligha bashlighin.

20 Meyxorlargha arilashma,

Nepsi yaman göshxorlar bilen bardi-keldi qilma; [k]

21 Chünki haraqkesh bilen nepsi yaman axirida yoqsulluqta qalar,

Gheplet uyqusigha patqanlargha jende kiyimni kiygüzer.

22 Séni tapqan atangning sözini angla,

Anang qérighanda uninggha hörmetsizlik qilma. [l]

23 Heqiqetni sétiwal,

Uni hergiz sétiwetme.

Danaliq, terbiye we yorutulushnimu al. [m]

24 Heqqaniy balining atisi chong xushalliq tapar;

Dana oghulni tapqan atisi uningdin xursen bolar. [n]

25 Ata-anangni söyündürüp,

Séni tughqan anangni xush qil.

26 I oghlum, qelbingni manga tapshur;

Közliringmu hayatliq yollirimgha tikilsun!

27 Chünki pahishe ayal chongqur oridur,

Buzuq yat ayal tar zindandur; [o]

28 Ular qaraqchidek möküwélip,

Insaniyet arisidiki wapasizlarni köpeyter.

29 Kimde azab bar? Kimde derd-elem? Kim jédel ichide qalar? Kim nale-peryad kötürer? Kim sewebsiz yarilinar? Kimning közi qizirip kéter?

30 Del sharab üstide uzun olturghan,

Ebjesh sharabtin tétishqa aldirighan meyxorlar! [p]

31 Sharabning ajayib qizilliqigha, uning jamdiki julaliqigha,

Kishining gélidin shundaq siliq ötkenlikige meptun bolup qalma!

32 Axirida u zeherlik yilandek chéqiwalidu,

Oq yilandek neshtirini sanjiydu.

33 Köz aldingda ghelite menziriler körünidu,

Aghzingdin qalaymiqan sözler chiqidu. ◼«ghelite menziriler körünidu» — yaki «ghelite ayallar körünidu».

34 Xuddi déngiz-okyanlarda leylep qalghandek,

Yelkenlik kémining moma yaghichi üstide yatqandek bolisen.

35 Sen choqum: — Birsi méni urdi, lékin men yarilanmidim!

Birsi méni tayaq bilen urdi, biraq aghriqini sezmidim!» — deysen.

Biraq sen yene: «Hoshumgha kelsemla, men yenila sharabni izdeymen! — deysen.