1 Köngüldiki niyetler insan’gha tewedur;

Biraq tilning jawabi Perwerdigarning ilkididur. [a]

2 Insan özining hemme qilghan ishini pak dep biler;

Lékin qelbdiki niyetlerni Perwerdigar tarazigha sélip tartip körer. ◼«qelbdiki niyetler» — ibraniy tilida «(ademlerning) rohliri» déyilidu.  [c]

3 Niyet qilghan ishliringni Perwerdigargha tapshurghin,

Shundaq qilghanda pilanliring piship chiqar. [d]

4 Perwerdigar barliq mewjudiyetning herbirini melum meqset bilen apiride qilghan;

Hetta yamanlarnimu balayi’apet küni üchün yaratqandur. [e]

5 Tekebburluqqa tolghan köngüllerning herbiri Perwerdigargha yirginchliktur;

Qol tutushup birleshsimu, jazasiz qalmas. ◼«qol tutushup birleshsimu,...» — bashqa birxil terjimisi: «shubhisizki,...».  [g]

6 Muhebbet-shepqet we heqiqet bilen gunahlar kefarǝt qilinip yépilar;

Perwerdigardin eyminish ademlerni yamanliqtin xaliy qilar. ◼«...gunahlar kefarǝt qilinip yépilar» — Tewrat dewride, gunahlar qurbanliqlar arqiliq «yépilip kechürüm qilindi» (yeni, «kefarǝt qilindi»). Injil dewrige kelgendila, gunahlar «élip tashlandi» (mesilen, «Yh.» 1:29).

7 Ademning ishliri Perwerdigarni xursen qilsa,

U hetta düshmenlirinimu uning bilen inaqlashturar.

8 Halal alghan az,

Haram alghan köptin ewzeldur. [i]

9 Insan könglide öz yolini toxtitar;

Emma qedemlirini toghrilaydighan Perwerdigardur.

10 Hetta padishahning lewlirige qaritip epsun oqulsimu,

Uning aghzi toghra hökümdin chetnimes. ◼«Hetta padishahning lewlirige qaritip epsun oqulsimu, uning aghzi toghra hökümdin chetnimes» — yene ikki xil terjimisi bar: (1) «Padishahning lewliride Perwerdigarning wehiyi bolsa, uning aghzi toghra hökümdin chetnimes»; (2) «Padishahning lewliri wehiyge qarap sözleydu; uning aghzi toghra hökümdin chetnimesliki kérek».

11 Adil taraza-mizanlar Perwerdigargha xastur;

Taraza tashlirining hemmisini U yasighandur. [k]

12 Padishah rezillik qilsa yirginchliktur,

Chünki text heqqaniyet bilenla mehkem turar.

13 Heqqaniy sözligen lewler padishahlarning xursenlikidur;

Ular durus sözligüchilerni yaxshi körer.

14 Padishahning qehri goya ölümning elchisidur;

Biraq dana kishi uning ghezipini tinchlandurar. [l]

15 Padishahning chirayining nuri kishige jan kirgüzer;

Uning shepqiti waqtida yaghqan «kéyinki yamghur»dur. ◼«Uning (padishahning) shepqiti waqtida yaghqan «kéyinki yamghur»dur» — ibraniy tilida: «Uning (padishahning) shepqiti «kéyinki yamghurlar»ni epkelgen buluttur». «Kéyinki yamghurlar» Israilda 3-ayda yéghip, etiyazliq ziraetlerni pishurushtek halqiliq rolni oynaydu. Shunga herbir déhqan «kéyinki yamghur»gha teshnadur, ular uni bek qedirleydu.  [n]

16 Danaliq élish altun élishtin neqeder ewzeldur;

Yorutulushni tallash kümüshni tallashtin shunche üstündur! [o]

17 Durus ademning égiz kötürülgen yoli yamanliqtin ayrilishtur;

Öz yoligha éhtiyat qilghan kishi jénini saqlap qalar.

18 Meghrurluq halak bolushtin awwal kéler,

Tekebburluq yiqilishtin awwal kéler. [p]

19 Kemter bolup miskinler bilen bardi-keldide bolush,

Tekebburlar bilen haram mal bölüshkendin ewzeldur.

20 Kimki ishni pem-paraset bilen qilsa payda tapar;

Perwerdigargha tayan’ghan bolsa, bext-saadet körer. ◼«Kimki ishni pem-paraset bilen qilsa payda tapar» — yaki «nesihet sözige köngül qoyghan payda tapar».  [r]

21 Köngli dana kishi segek atilar;

Yéqimliq sözler ademlerning bilimini ashurar.

22 Pem-paraset özige ige bolghanlargha hayatliqning buliqidur;

Eqilsizlerge telim bermekning özi eqilsizliktur. [s]

23 Aqilane kishining qelbi aghzidin eqil chiqirar;

Uning lewzige bilimni ziyade qilar.

24 Yéqimliq sözler goya heseldur;

Köngüllerni xush qilip ten’ge dawadur.

25 Adem balisigha toghridek körünidighan bir yol bar,

Lékin aqiwiti halaketke baridighan yollardur. [t]

26 Ishligüchining ishtiyi uni ishqa salar;

Uning qarni uninggha heydekchilik qilar. ◼«Uning qarni uninggha heydekchilik qilar» — ibraniy tilida «Uning aghzi uninggha heydekchilik qilar».

27 Muttehem kishi yaman gepni kolap yürer;

Uning lewliri lawuldap turghan otqa oxshar. ◼«Muttehem kishi» — ibraniy tilida «Bélialning oghli» déyilidu. «Bélial»ning menisi «erzimes» dégenlik bolup, belkim Iblisni körsitidu.  [w]

28 Egri adem jédel-majira tughdurghuchidur;

Gheywetchi yéqin dostlarni ayriwéter. [x]

29 Zorawan kishi yéqin adimini azdurar;

Uni yaman yolgha bashlap kirer. ◼«Uni yaman yolgha bashlap kirer» — ibraniy tilida «Uni yaxshi emes bir yolgha bashlap kirer».

30 Közini yumuwalghan kishi yaman niyetni oylar;

Léwini chishligen kishi yamanliqqa teyyardur. ◼«Közini yumuwalghan kishi» — yaki «köz qisquchi kishi», «közini chimildatquchi adem».  [aa]

31 Heqqaniyet yolida aqarghan chach,

Ademning shöhret tajidur. ◼«Heqqaniyet yolida aqarghan chach, ademning shöhret tajidur» — ayetning bashqa birxil terjimisi: «Aq chach bolsa ademning shöhret tajidur; u heqqaniyet yolida peyda bolidu».

32 Asan achchiqlimaydighan kishi palwandin ewzeldur;

Özini tutuwalghan sheher alghandinmu üstündur. ◼«Özini tutuwalghan» — ibraniy tilida: «Öz rohini idare qilidighan» dégen sözler bilen ipadilinidu.

33 Chek étekke tashlan’ghini bilen,

Lékin netijisi pütünley Perwerdigardindur.