1 Andin Témanliq Élifaz mundaq dédi: —

2 Adem Xudagha qandaqmu payda keltürelisun?

Dana ademlermu Uninggha néme payda keltürelisun?

3 Sen heqqaniy bolsangmu, Hemmige Qadirgha néme behre béreleytting?

Yolliring eyibsiz bolghan teqdirdimu, sen Uninggha néme gheniymetlerni élip kéleleysen?□«... Yolliring eyibsiz bolghan teqdirdimu, sen uninggha néme gheniymetlerni élip kéleleysen?» — 1-bab, 8-ayette, Xudaning Ayuptin alghan raziliqi, xursenliki nahayiti roshen bayan qilinidu. Yene kélip, Tewratning «Yaritilish» dégen qismida biz Xudaning insanlarning gunahlliri tüpeylidin bolghan intayin azablinidighanliqi toghrisida xewerdar bolimiz. Shunga Élifazning 2-ayet we 3-ayettiki bu sözlirining tolimu xata ikenlikini bilishimiz lazim.

4 Uning séni eyibleydighanliqi,

We Uning sanga shikayetler yetküzidighini séning ixlasmen bolghining üchünmu-ya?

5 Séning rezilliking zor emesmu?

Séning gunahliring hésabsiz emesmu?

6 Sen qérindashliringdin sewebsiz képillik alghansen;

Sen yalangtüshlerni kiyim-kéchekliridin mehrum qiliwetkensen.■Mis. 22:26, 27; Qan. 24:6, 10-13

7 Halsizlan’ghanlargha su bermiding,

Ach qalghanlargha ashnimu ayap bermiding,

8 Gerche sen yer-zéminlik bolghan qoli uzun adem bolsangmu,

Yer-zémin tutup hörmetlinip kelgen adem bolsangmu,

9 Sen tul xotunlarnimu quruq qol yandurghansen,

Yétim-yésirlarning qolinimu yanjitiwetkensen.□«Sen ... yétim-yésirlarning qolinimu yanjitiwetkensen» — shuni chongqur chüshinishimiz kérekki, Élifazning bu shikayetliri pütünley asassizdur.

10 Mana shu sewebtin etrapingda tuzaqlar yatidu,

Ushtumtut peyda bolghan wehimimu séni basidu.

11 Shu sewebtinmu séni qarangghuluq bésip körelmes qildi,

Bir kelkün kélip séni gherq qildi.

12 Tengri ershalaning choqqisida turidu emesmu?

Eng égiz yultuzlarning neqeder aliy ikenlikige qarap baq!

13 Biraq sen: «Tengri némini bilidu?

U rast shunche zulmet qarangghuluqta birnémini perq ételemdu?!» dewatisen.

14 Yene: «Qoyuq bulutlar uni tosiwalidu,

Shunga U pelek üstide aylinip mangghinida bizni körmeydu!» — deysen.

15 Yaman ademler mangghan kona yolni senmu tutiwéremsen?

16 Ular waqti toshmay turupla élip kétilgen,

Ularning ulliri kelkün teripidin éqitilip kétilgen.□«Ular waqti toshmay turupla ..., ularning ulliri kelkün teripidin éqitilip kétilgen» — bu yerde Nuh peyghemberning dewride topan éqitip ketken rezil ademler körstilgen bolushi mumkin.

17 Ular Tengrige: «Bizdin néri bol!»

Hemmige Qadir bizni néme qilalisun?» — deytti.■Ayup 21:14

18 Biraq ularning öylirini ésil nersiler bilen toldurghan del Uning Özidur,

Men bolsam yamanlarning nesihitidin yiraqlashqanmen!□«Ularning öylirini ésil nersiler bilen toldurghan del uning özidur» — Élifaz mushu yerde Ayupning «Yamanlar bezide béyip awatlishidu» dégen pikrining toghriliqini azraq qobul qilghandek qilghini bilen yenila: «Yamanlar téz berbat bolidu» deydu.  ■Ayup 21:16

19 Heqqaniylar ularning berbat bolghanliqini körüp shadlinidu;

Bigunahlar ularni mazaq qilip: — ■Zeb. 107:42

20 «Bizge qarshi chiqquchilar shübhisiz weyran bolidu,

Ot ularning bayliqlirini yutuwetmemdu?» — deydu.

21 Shunga Xudagha boysunup Uni tonusang,

Shu chaghdila sen aman bolisen;

Shuning bilen sanga amet kélidu.

22 Uning aghzidin kelgen nesihetnimu qobul qil,

Uning sözlirini könglüngge püküp qoy.□« Xudaning aghzidin kelgen nesihetnimu qobul qil,...» — Élifaz özining baya dégen geplirini «Xudaning aghzidin kelgen nesihet» dep qarisa kérek.

23 Sen Hemmige Qadirning yénigha qaytip kelseng, muqerrerki,

Qaytidin qurulup chiqalaysen;

Eger sen qebihlikni chédirliringdin yiraqlashtursang,■Ayup 8:5, 6

24 Eger sen altunungni topa-chang üstige tashliyalisang,

Ofirdiki altunungni shiddetlik éqinning tashlirigha qoshuwetseng,□«Eger sen ... Ofirdiki altunungni shiddetlik éqinning tashlirigha qoshuwetseng» — Élifaz belkim Ayupni altunlargha intayin ach köz adem dep qaraydu. Uning bu sözlirining nurghun ademlerge payda yetküzeleydighini bilen, Ayup ach köz adem bolmighachqa, uninggha héch yardem bermeydu.
Bu ayette déyilgen «Ofirdiki altun» nahayiti ésil bir xil altunni körsitidu.

25 Undaqta Hemmige Qadirning Özi sanga altun bolidu.

Séning üchün serxil kümüshmu bolidu.

26 U chaghda sen Hemmige Qadirdin söyünisen,

Yüzüngni Tengrige qarap kötüreleysen.

27 Sen Uninggha dua qilsang, U qulaq salidu,

Shundaqla senmu ichken qesemliringge emel qilisen.

28 Sen qarar qilghan ish emelge ashidu,

Yolliring üstige nur chüshidu.

29 Ademler pes qilin’ghanda, sen ulargha: «Ornunglardin turunglar!» deysen,

Shuning bilen Xuda chirayi sun’ghanlarni qutquzidu.■Pend. 29:23

30 U hetta gunahi bar ademnimu qutquzidu,

U qolungdiki halalliqtin qutquzulidu. □«U hetta gunahi bar ademnimu qutquzidu, u qolungdiki halalliqtin qutquzulidu» — qiziq ish shuki, Élifazning özi axirda Ayupning duasi arqiliq qutquzulidu (42-bab).