2 Ah, Sen asmanlarni yirtiwétip,

Yerge chüshken bolsang’idi!

Taghlar bolsa yüzüng aldida érip kétetti! Mana mushundaq bolghanda tuturuqqa ot yaqqandek,

Ot suni qaynatqandek,

Sen namingni düshmenliringge ayan qilghan bolatting,

Eller yüzüngdinla titrep kétetti!□«Ah, Sen asmanlarni yirtiwétip, yerge chüshken bolsang’idi! Taghlar bolsa yüzüng aldida érip kétetti!» — bashqa birxil terjimisi: «Ah, Sen asmanlarni yirtiwétip, yerge chüshseng iding! Taghlar bolsa yüzüng aldida érip kétetti!».

3 Sen biz kütmigen dehshetlik ishlarni qilghan waqtingda,

Sen chüshkeniding;

Yüzüngdin taghlar rastla érip ketti!□«Yüzüngdin taghlar rastla érip ketti!» — Israillar Misirdin chiqqandin kéyin, Xuda ulargha Musa peyghember arqiliq muqeddes qanun-permanlirini bergen waqtida, Sinay taghliri shundaqla érip ketti. Yeshaya peyghember belkim mushu ishlarni közde tutidu.

4 Sendin bashqa Özige telmürüp kütkenler üchün ishligüchi bir Xudani,

Ademler ezeldin anglap baqmighan,

Qulaqqa yétip baqmighan,

Köz körüp baqmighandur!■Zeb. 31:19,20; 1Kor. 2:9

5 Sen heqqaniyliqni yürgüzüshni xursenlik dep bilgen ademning,

Yeni yolliringda méngip, Séni séghin’ghanlarning hajitidin chiqquchi hemrahdursen;

Biraq mana, Sen ghezepte boldung,

Biz bolsaq gunahta bolduq;

Undaq ishlar uzun boliwerdi;

Emdi biz qutquzulamduq?

6 Emdi biz napak bir nersige oxshash bolduq,

Qiliwatqan barliq «heqqaniyetlirimiz» bolsa bir ewret latisighila oxshaydu, xalas;

Hemmimiz yopurmaqtek xazan bolup kettuq,

Qebihliklirimiz shamaldek bizni uchurup tashliwetti.■Zeb. 90:5-8

7 Séning namingni chaqirip nida qilghuchi,

Iltipatingni tutushqa qozghalghuchi héch yoqtur;

Chünki Sen yüzüngni bizdin qachurup yoshurdung,

Qebihliklirimizdin bizni solashturghuzdung.

8 Biraq hazir, i Perwerdigar, Sen bizning Atimizdursen;

Biz séghiz lay, Sen bizning sapalchimizdursen;

Hemmimiz bolsaq qolungda yasalghandurmiz;

9 I Perwerdigar, bizge qaratqan ghezipingni zor qilmighaysen,

Qebihlikni menggügiche eslep yürmigin;

Mana, qarighin, hemmimiz Séning xelqingdurmiz!■Zeb. 79:8

10 Muqeddes sheherliring janggal,

Zionmu janggal bolup qaldi;

Yérusalém weyran boldi;

11 Ata-bowimiz Séni medhiyiligen jay,

Pak-muqeddeslik, güzel-parlaqliq turalghusi bolghan öyimiz bolsa ot bilen köyüp kül boldi;

Qedir-qimmetlik nersilirimizning hemmisi weyran qiliwétildi.□«...Pak-muqeddeslik, güzel-parlaqliq turalghusi bolghan öyimiz bolsa ot bilen köyüp kül boldi» — mushu ayettiki «öyimiz» muqeddes ibadetxana, elwette. «Öy» dégen sözning ishlitilishi bolsa, Xudaning esli ularning arisida (ibadetxanisida) turghanliqini tekitleydu. «Qedir-qimmetlik nersilirimiz»ning eng ésili bolsa yenila ibadetxanidiki buyum-jabduqlar bolghanidi.
Babilliqlarning Yérusalémni, jümlidin muqeddes ibadetxanini weyran qilghanliqi belkim mushu bésharettin kéyinki 100 yil etrapida boldi (miladiyedin ilgiriki 586-yili). Mushu ayette, peyghember (63:15-19-ayetlerdiki ehwalgha oxshash) özi ashu dewrde turghandek söz qilidu; u ashu dewrdikilerge wekil bolup dua qilidu.

12 Mushu ishlar aldida Özüngni chetke alamsen, i Perwerdigar?

Süküt qilip turamsen?

Bizni bolushiche xar qilip uriwéremsen?»