1 «Kélinglar, Perwerdigarning yénigha qaytayli;

Chünki U titma-titma qiliwetti, biraq saqaytidu;

Uruwetti, biraq bizni téngip qoyidu.

2 U ikki kündin kéyin bizni janlanduridu;

Üchinchi küni U bizni tirildüridu,

Biz Uning yüzi aldida hayat yashaymiz!

3 We biz Uni bilidighan bolimiz!

Biz Perwerdigarni tonush hem bilish üchün intilip qoghlaymiz!

Uning bizni qutquzushqa chiqishi tang seherning bolushidek muqerrer;

U yénimizgha yamghurdek, yer-zéminni sughiridighan «kéyinki yamghur»dek chüshüp kélidu!».□«U yénimizgha yamghurdek, yer-zéminni sughiridighan «kéyinki yamghur»dek chüshüp kélidu!» — «kéyinki yamghur» bolsa Qanaanda (Pelestinde) 3- yaki 4-ayda yaghidu, u etiyazliq ziraetlerning pishishida halqiliq rolini oynaydu. Bu yamghurlar bolmisa hosul bolmaydu. «Biz Uni bilidighan bolimiz!... U ... «kéyinki yamghur»dek chüshüp kélidu!» — alimlarning bu üch ayet (1-3) üstide üch xil pikri bar: — (1) bu Israilning axirqi zamanda towa qilidighan duasi (chünki Israillar Hoshiyaning dewride towa qilghan emes); (2) bu Hoshiya peyghemberning: «Perwerdigarning yénigha qaytayli» dégen dewiti; (3) bu Israilning shu chaghdiki yüzeki bir inkasi, xalas. Sözler chirayliq bolsimu Xuda uni yüzeki dep qaraydu (4-ayetni körüng). Shunga biz üchinchi imkaniyetke qayilmiz. Chünki bu sözlerde öz gunahini étirap qilidighan konkrét gep kemchil. Eger duada towa qilidighan sözler bar bolghan bolsa intayin yaxshi bir dua bolatti; 14-babta heqiqiy towa qilidighan dua tépilidu.

4 I Efraim, séni qandaq qilsam bolar?

I Yehuda, séni qandaq qilsam bolar?

Chünki yaxshiliqinglar seherdiki bir parche buluttek,

Tézdin yoqap kétidighan shebnemdektur.

5 Shunga Men peyghemberler arqiliq ularni chépiwetken;

Aghzimdiki sözler bilen ularni öltürüwetkenmen;

Méning hökümüm tang nuridek chiqidu.□«Men peyghemberler arqiliq ularni chépiwetken...» — Xuda peyghemberliri arqiliq nurghun qétim Israilgha jazasini élip baridighan hökümlirini uqturghanidi; démek, u derhal jazalirini ewetmeydu, belki awwal peyghemberliri arqiliq agahlandurup, towa qilish pursitini béridu; peqet towa qilmisa jazasini chüshüridu. Jazalar chüshkende Israillar «chépiwétilgen, ...öltürüwétilgen» idi. Yuqirida (3-ayette) Israil saxtipezlik bilen «Xudaning bizni qutquzuzqa chiqishi ... tang seherning bolushidek muqerrer» dégenidi, biraq hazir Xuda: «Méning hökümlirim tang nuridek chiqidu» deydu.

6 Chünki Men qurbanliqlardin emes, belki méhir-muhebbettin,

Köydürme qurbanliqlardin köre, Xudani tonush hem bilishtin xursenlik tapimen.□«Men qurbanliqlardin emes, belki méhir-muhebbettin, köydürme qurbanliqlardin köre, Xudani tonush hem bilishtin xursenlik tapimen» — Xuda Musa peyghember arqiliq qurbanliqlarni telep qilghan. Biraq kéyinki köp peyghemberler arqiliq, bular Méning axirqi meqsitim emes, belki: (1) Öz xelqimning manga qaratqan ching könglidiki ibadet we muhebbitini izdeymen (shundaq ishlar peqet Mesihning nijati we Muqeddes Roh arqiliq emelge ashurulidu, elwette); (2) qurbanliqlar sunulghanda, eger ixlasmenlik we muhebbet bolmisa, undaqta ularni qilmighininglar tüzük, dep uqturghan.  ■Mat. 9:13; 12:7

7 Biraq ular Adem’atidek ehdige itaetsizlik qilghan;

Ular mana shu yol bilen Manga asiyliq qilghan.■Hosh. 8:1

8 Giléad bolsa qebihlik qilghuchilarning shehiri;

U qan bilen boyalghan.

9 Qaraqchilar ademni paylighandek,

Kahinlar topi Shekemge baridighan yolda qatilliq qilmaqta;

Berheq, ular iplasliq qilmaqta.

10 Israil jemetide yirginchlik bir ishni kördüm;

Efraimning pahishiliki shu yerde tépilidu,

Israil bulghandi.

11 Yene sangimu, i Yehuda, térighan gunahliringning hosuli békitilgendur!