1 Давут язған күй: —

Пәрвәрдигарға бәргәйсиләр, и Қудрәтлик Болғучиниң пәрзәнтлири,

Пәрвәрдигарға шану-шәвкәт, күч бәргәйсиләр!□«Пәрвәрдигарға бәргәйсиләр,... Пәрвәрдигарға шану-шәвкәт, күч бәргәйсиләр!» — бу сирлиқ сөзниң мәнаси немә? Мәнаси чоқум шуки, Худаниң хәлқи униңға ишинип таянғачқа, шундақла мәдһийә оқуғачқа, Худа уларниң һаятида Өз күч-қудритини (шундақла Өз шан-шәривини) көрситишигә шараит бериду.  ■Зәб. 95:7, 8

2 Пәрвәрдигарға Өз намиға лайиқ шану-шәвкәт бәргәйсиләр;

Пәрвәрдигарға пак-муқәддәсликниң гөзәллигидә сәҗдә қилиңлар!

3 Пәрвәрдигарниң садаси чоңқур сулар үстидә һөкүм сүриду;

Шан-шәрәп егиси болған Тәңри гүлдүрмамиларни яңритиду;

Пәрвәрдигар бүйүк деңизлар үстидә һөкүм сүриду.■Мис. 9:23

4 Пәрвәрдигарниң садаси күчлүктур;

Пәрвәрдигарниң садаси һәйвәткә толғандур;

5 Пәрвәрдигарниң садаси кедир дәрәқлирини сундуриветиду;

Бәрһәқ, Пәрвәрдигар Ливандики кедирларни сундуриветиду.

6 У уларни мозай ойнақлаватқандәк ойнақлитиду;

Явайи калиниң балиси ойнақлаватқандәк, У Ливан вә Сирион теғини ойнақлитиду.□«Сирион теғи» — Ливанниң әң егиз тағ чоққиси, йәнә бир нами «Һәрмон».

7 Пәрвәрдигарниң садаси чақмақларниң ялқунлирини шахлитиветиду;□«Пәрвәрдигарниң садаси чақмақларниң ялқунлирини шахлитиветиду» — башқа бир хил тәрҗимиси «Пәрвәрдигарниң садаси от ялқунлирини житиветиду». Бирақ алди-кәйнидики сөзләргә қариғанда, чақмақларни көрситиши мүмкин.

8 Пәрвәрдигарниң садаси чөл-җәзирини зил-зилигә салиду;

Пәрвәрдигар Қәдәштики чөл-җәзирини зил-зилигә салиду;□«Пәрвәрдигар Қәдәштики чөл-җәзирини зил-зилигә салиду» — «Ливан тағлири» (6-айәт) — Қанаан (Пәләстин)ниң шимал тәрипи, «Қәдәштики чөл-җәзирә» униң җәнубий тәрипи.

9 Пәрвәрдигарниң садаси дуб дәрәқлирини һәрян толғитиду,

Орманлиқларни ялаңачлайду;

Униң муқәддәс ибадәтханисида болған һәммиси «шану-шәвкәт!» дәп тәнтәнә қилиду. □«Пәрвәрдигарниң садаси дуб дәрәқлирини һәрян толғитиду» — башқа бир хил тәрҗимиси «Пәрвәрдигарниң садаси маралларға оғлақларни туғдурғузиду».

10 Пәрвәрдигар топан үстигә һөкүмранлиқ қилип олтириду;

Бәрһәқ, Пәрвәрдигар мәңгүгә падиша болуп һөкүм сүрүп олтириду.□«Пәрвәрдигар топан үстигә һөкүмранлиқ қилип олтириду» — «топан» бәлким Нуһ пәйғәмбәр дәвридики топанни көрситиду, бу йәрдә көчмә мәнидә болуп, дуниядики қалаймиқанчилиқниму көрситиду.

11 Пәрвәрдигар Өз хәлқигә қудрәтни бәхш етиду;

Өз хәлқини аман-хатирҗәмлик билән бәрикәтләйду.