1 Әлләр немишкә чуқан салиду?

Немә үчүн хәлиқләр бекардин-бекар сүйқәст ойлайду?□«Әлләр немишкә чуқан салиду?» — Зәбурдики күйләрдә, «әлләр» яки «ят әлләр» болса, Исраил хәлқидин башқа һәр бир хәлиқ-милләтни көрситиду.  ■Рос. 4:25

2 Дуниядики падишалар сәпкә тизилип,

Әмәлдарлар қара нийәт әйлишип,

Пәрвәрдигар вә Униң Мәсиһи билән қаршилишип: — □«Пәрвәрдигар вә Униң Мәсиһи» — «Мәсиһ» мошу йәрдә, кона бир өрп-адәткә қаритилған. Тәвраттики бәлгүлимидә, йеңи падиша тиклиниш мурасимида бешиға пурақлиқ зәйтун мейи қуюлатти. Бу «мәсиһ қилиш» («мәсиһләш») дәп аталған. «Йәшая» китап, 61-бапта «мәсиһ қилиш» дегән сөз болса, келидиған Қутқузғучиниң вуҗудиға май әмәс, бәлки Муқәддәс Роһ қуюлидиғанлиғини көрситиду. Мошу айәттиму охшашла, «Мәсиһ» Муқәддәс Роһ билән «мәсиһ қилинған адәм»ни көрситиду.

3 «Уларниң чәклимилирини чөрүветәйли,

Уларниң асарәтлирини бузуп ташлайли!» — дейишиду.□«Уларниң чәклимилирини чөрүветәйли, Уларниң асарәтлирини бузуп ташлайли!» — «Улар» «Худа вә Униң Мәсиһи»ни көрситиду.

4 Асманда олтарғучи күлиду,

Рәб уларни мазақ қилиду;

5 Һәм аччиғида уларға сөзләп,

Қәһри билән уларни вәһимигә селип: —

6 «Өзүм болсам Зионда, йәни муқәддәс теғимда,

Өзүм мәсиһ қилған падишани тиклидим».□«Зион.., йәни муқәддәс теғим..» — «Зион теғи» Йерусалим вә муқәддәс ибадәтхана бу тағ үстигә қурулған. «Зион» (яки «Сион») әслидә «көрүнәрлик» дегән мәнидә. У Худаниң Өз хәлқигә һимайә болғанлиғиға символ қилиниду. «Өзүм мәсиһ қилған падишани тиклидим» — жуқуридики 2-айәттики, «Мәсиһ» тоғрисидики изаһатни көрүң.

7 «Мән әрштики пәрманни җакалаймәнки,

Пәрвәрдигар маңа: —

«Сән Мениң оғлум;

Өзүм сени бүгүнки күндә туғулдурдум;■Рос. 13:33; Ибр. 1:5; 5:5

8 Мәндин сора, Мән саңа мирас болушқа әлләрни,

Тәәллуғуң болушқа йәр йүзини чәт-чәтлиригичә беримән;■Зәб. 21:28; 71:8

9 Сән төмүр таяқ билән уларни битчит қиливетисән;

Сапал чинини кукум-талқан қилғандәк, сән уларни парә-парә қиливетисән» — деди».□«Сән төмүр таяқ билән уларни битчит қиливетисән» — яки: «Сән төмүр таяқ билән уларни башқурисән».  ■Вәһ. 2:27; 19:15

10 Әнди, һәй падишалар, әқилдар болуңлар!

Җаһандики сорақчилар савақ елиңлар;

11 Пәрвәрдигардин қорқуш билән униң хизмитидә болуңлар;

Титрәк ичидә хошаллиниңлар!□«Титрәк ичидә хошаллиниңлар!» — башқа бир хил тәрҗимиси: «титрәк ичидә яшаңлар!».

12 Оғулниң ғәзивиниң қозғалмаслиғи үчүн,

Уни сөйүңлар;

Чүнки униң ғәзиви сәлла қайниса,

Йолуңлардила һалак болисиләр;

Униңға таянғанлар нәқәдәр бәхитликтур!□«Уни (Оғулни) сөйүңлар» — буниң мәнаси бәлким «Худаниң оғли билән әплишивелиңлар». «Чүнки униң ғәзиви сәлла қайниса...» — йәнә бир хил тәрҗимиси «Чүнки униң ғәзиви тезла қозғилиду...».  ■Зәб. 33:9; Пәнд. 16:20; Йәш. 30:18; Йәр. 17:7; Рим. 9:33; 10:11; 1Пет. 2:6