1 Давут язған күй: —

Пүтүн қәлбим билән Саңа тәшәккүр ейтимән;

Барлиқ илаһлар алдида Сени күйләймән.□«Барлиқ илаһлар алдида Сени күйләймән» — «илаһлар» тоғрилиқ 95:3 вә изаһатини көрүң.

2 Пак-муқәддәслигиңниң ибадәтханисиға қарап баш уримән,

Өзгәрмәс муһәббитиң һәм һәқиқәт-садақитиң үчүн намиңни тәбрикләймән;

Чүнки Сән пүтүн нам-шөһритиңдинму бәкрәк, вәдәңдә туридиғиниңни улуқ қилғансән.□«Чүнки Сән пүтүн нам-шөһритиңдинму бәкрәк, вәдәңдә туридиғиниңни улуқ қилғансән» — башқа бир хил тәрҗимиси: «чпнки сән өз нам-шөһритиң һәм вәдәңни һәммидин үстүн қилдиң». Лекин бизниңчә мәнаси шуки, Худаға нисбәтән өз вәдисидә туруш һәтта нам-шөһритидин жуқури туриду.

3 Саңа нида қилған күнидә, маңа җавап бәргәнсән;

Җенимға күч киргүзүп, мени риғбәтләндүргәнсән.

4 Ағзиңдики сөзләрни аңлиғанда, и Пәрвәрдигар,

Җаһандики барлиқ шаһлар Сени мәдһийиләйду;

5 Улар Пәрвәрдигарниң йоллирида жүрүп нахша ейтиду,

Чүнки улуқдур Пәрвәрдигарниң шан-шәриви.

6 Чүнки Пәрвәрдигар алийдур;

Бирақ У һали бошларға нәзәр салиду;

Тәкәббуларни болса У жирақтин тонуп йетиду.■Зәб. 112:4-7

7 Зулмәт-мушәққәтләр арисида маңған болсамму,

Сән мени җанландурисән;

Дүшмәнлиримниң ғәзивини тосушқа қолуңни узартисән,

Оң қолуң мени қутқузиду.

8 Пәрвәрдигар маңа тәвә ишларни пүткүзиду;

Меһир-муһәббитиң, и Пәрвәрдигар, мәңгүлүктур;

Өз қоллириң ясиғанни ташлап кәтмигәйсән!