1 Һәмдусана! Пәрвәрдигарниң намини мәдһийиләңлар,

Уни мәдһийиләңлар, Пәрвәрдигарниң қуллири!

2 Уни мәдһийиләңлар, Пәрвәрдигарниң өйидә турғанлар,

Худайимизниң һойлилирида турғанлар!

3 Яһни мәдһийиләңлар, чүнки Пәрвәрдигар меһривандур;

Униң намиға күй ейтиңлар;

Чүнки мошундақ қилиш шериндур;

4 Чүнки Яһ Яқупни Өзиниңки болушқа,

Исраилни Өз мираси болушқа талливалди.[a]

5 Чүнки өзүм билимәнки, Пәрвәрдигар улуқдур;

Рәббимиз барлиқ илаһлардин үстүндур.□«Пәрвәрдигар... барлиқ илаһлардин үстүндур» — бу айәт «илаһлар»ниң һәқиқий мәвҗут екәнлигини етирап қилмайду, әлвәттә. 95:3 вә изаһатини көрүң.

6 Пәрвәрдигар немә ишни мувапиқ көргән болса,

У асманларда,

Зиминда,

Деңизларда һәм униң барлиқ тәглиридиму шуни қилғандур.

7 У йәр чәтлиридин булут-туманларни өрлитиду;

Ямғурларға чақмақларни һәмраһ қилиду;

Шамални Өз ғәзнилиридин чиқириду.[c]

8 У Мисирдики тунҗа оғулларни һалак қилди,

Инсанларниң болсун, һайванларниң болсун һәммини уруп һалак қилди.[d]

9 У аламәтләрни, мөҗизиләрни араңларға әвәтти, и Мисир;

Пирәвн вә униң һәммә қуллири үстигә әвәтти.[e]

10 У улуқ әлләрни урувәтти,

Қудрәтлик падишаларни өлтүрүвәтти;[f]

11 Аморийларниң падишаси Сиһонни,

Башанниң падишаси Огни,

Қанаандики барлиқ падишалиқларни урувәтти.

12 Уларниң зиминини мирас қилип,

Өз хәлқи Исраилға мирас болушқа тәқдим қилди.[g]

13 Сениң намиң, Пәрвәрдигар, мәңгүгә,

Шөһрәт-хатирәң дәвирдин-дәвиргичидур.[h]

14 Чүнки Пәрвәрдигар Өз хәлқиниң дәвасини сорайду;

Өз қуллириға рәһим қилиду.[i]

15 Әлләрниң бутлири болса пәқәтла күмүч-алтундин ибарәттур,

Уларни инсанниң қоллири ясиғандур, халас.[j]

16 Уларниң ағзи бар, бирақ сөзлимәйду;

Көзлири бар, бирақ көрмәйду;

17 Қулақлири бар, бирақ аңлимайду,

Ағзида һеч нәпәс йоқтур.

18 Уларни ясиғанлар уларға охшап қалиду,

Уларға таянғанларму шундақтур.

19 Исраил җәмәти, Пәрвәрдигарға тәшәккүр-мәдһийә қайтуруңлар;

Һарун җәмәти, Пәрвәрдигарға тәшәккүр-мәдһийә қайтуруңлар;

20 Лавий җәмәти, Пәрвәрдигарға тәшәккүр-мәдһийә қайтуруңлар;

Пәрвәрдигардин қорқидиғанлар, Пәрвәрдигарға тәшәккүр-мәдһийә қайтуруңлар!

21 Йерусалимда маканлашқан Пәрвәрдигарға Зиондин тәшәккүр-мәдһийә ейтилсун!

Һәмдусана!