1 Һәмдусана!

Пәрвәрдигарға тәшәккүр ейтиңлар!

Чүнки У меһривандур, әбәдийдур Униң меһир-муһәббити.□«Пәрвәрдигар... меһривандур, әбәдийдур Униң меһир-муһәббити...» — бу күйдә Тәвраттики «Мис.» 1-24-баплар, «Чөл.» 11-17, 20-баплар, «Йәшуа», «Батур һакимлар» һәм «Падишаһлар» дегән қисимлардики тарих көздә тутулиду.  [b]

2 Пәрвәрдигарниң қудрәтлик қилғанлирини ким сөзләп берәләйду?

Униң бар шан-шөһритини ким җакалап берәләйду?

3 Бәхитликтур адаләтни тутқан,

Дайим һәққанийлиқни жүргүзгән киши!

4 Хәлқиңгә болған һиммитиң билән мени әслигәйсән, и Пәрвәрдигар;

Ниҗатлиғиң билән йенимға келип хәвәр алғин!□«Ниҗатлиғиң билән йенимға келип хәвәр алғин!» — ибраний тилида: «Ниҗатлиғиң билән мени йоқлиғайсән» дегән сөзләр билән ипадилиниду.

5 Шуниң билән, Сән таллиғанлириңниң бәрикитини көрәй,

Өз елиңниң шатлиғи билән шат болай,

Өз мирасиң болған хәлқиң билән пәхирлинип, яйрап жүрәй!

6 Биз ата-бовилиримиз қатарида гуна өткүздуқ,

Қәбиһлик қилдуқ, яманлиқ әйлидуқ.[d]

7 Мисирда турған ата-бовилиримиз мөҗизилириңни нәзиригә алмай,

Көп меһриванлиқлириңни есигә алмиди;

Бәлки деңизда, Қизил Деңиз бойида исян көтәрди.[e]

8 Бирақ У қудритимни намайән қилай дәп,

Өз нами үчүн уларни қутқузди.[f]

9 Униң Қизил Деңизға тәнбиһ бериши билән,

У қупқуруқ болди;

Худди қағҗирақ чөллүктин йетәкләп маңғандәк,

У уларни деңиз тәглиридин қуруқ өткүзди.[g]

10 Уларни өч көргәнләрниң қолидин һөрлүккә чиқарди,

Уларға һәмҗәмәт болуп дүшмән чаңгилидин қутқузди.

11 Явларни сулар басти,

Уларниң һеч бирси сақ қалмиди.[h]

12 Шундила улар Униң сөзлиригә ишәш қилди;

Улар Уни күйлиди.[i]

13 Улар Униң қилғанлирини шунчә тез унтуди,

Несиһәтини күтмиди;

14 Бәлки далада ач көзлүккә баладәк берилди,

Чөл-баяванда Тәңрини синиди.[j]

15 Шуңа У сориғинини уларға бәрди,

Бирақ җүдәткүчи бир кесәлни җанлириға тәккүзди.[k]

16 Улар баргаһда Мусаға һәсәт қилди,

Худаниң муқәддәс бәндиси Һарунниму көрәлмиди.[l]

17 Йәр ечилип Датанни жутувәтти,

Абирамни адәмлири билән қапсивалди.[m]

18 Әгәшкүчилири арисида от йеқилди;

Ялқун рәзилләрни көйдүривәтти.[n]

19 Улар Һорәб теғида мозай бутни ясиди,

Қуйма һәйкәлгә сәҗдә қилип,[o]

20 Өзлириниң пәхир-шөһрити болғучиниң орниға,

От-чөп йәйдиған өкүзниң сүритини алмаштурди.

21 Мисирда улуқ ишларни көрсәткән Ниҗаткари Тәңрини улар унтуди.

22 Дәрвәқә, Һам диярида мөҗизиләр яратқан,

Қизил Деңиз бойида қорқунучлуқ ишларни көрсәткән Худани унтуди.

23 У уларни һалак қилимән дегән еди —

Өз таллиғини Муса қәһрини яндуруш үчүн Униң алдида аричи болуп тик турмиған болса,

— Дәрвәқә шундақ қилған болар еди.[p]

24 Улар йәнә гөзәл зиминни кәмситип рәт қилди,

Униң вәдисигә ишәнмиди;[q]

25 Бәлки чедирлирида қақшап жүрүп,

Пәрвәрдигарниң авазиға қулақ салмиди.

26 Шуңа У уларға қәсәм қилип қол көтирип: —

Силәрни чөлдә жиқитип түгәштүримән —[r]

27 Әвлатлириңларниму әлләр арисида жиқитип түгәштүрүп,

Яқа жутлар ара тарқитиветимән» — деди.[s]

28 Улар Баал-Пеор бутқа өзини етип чоқунуп,

Өлүкләргә атиған қурбанлиқларни йеди.□«Улар Баал-Пеор бутқа өзини етип чоқунуп, өлүкләргә атиған қурбанлиқларни йеди» — «өлүкләргә қурбанлиқ қилиш», «яғ пуритиш» қатарлиқ һәр қандақ паалийәтләр Тәвратта қәтъий мәнъий қилинған.  [u]

29 Улар қилмишлири билән Униң аччиғини кәлтүрди,

Улар арисида ваба қозғалди;

30 Финиһас турди-дә, һөкүм жүргүзди,

Шуниң билән ваба тосулди;

31 Бу иш Финиһасқа һәққанийәт дәп һесапланди,

Униң нәслигиму әвладидин әвладиғичә, әбәдий шундақ һесапланди.

32 Улар йәнә Пәрвәрдигарни мерибаһ сулири бойида ғәзәпкә кәлтүрди,

Уларниң сәвәвидин Мусағиму зәрәр йәтти;[v]

33 Чүнки улар униң роһини териктүрди,

Униң ләвлири бехәстиликтә гәп қилип салди.□«Чүнки улар униң роһини териктүрди» — бәзи тәрҗимиләрдә «униң роһи» Мусаниң роһи әмәс, бәлки Худаниң Роһи дәп чүшәндүрүлиду. «... Улар униң роһини териктүрди, униң ләвлири бехәстиликтә гәп қилип салди» — «Чөл.» 20:7-13ни көрүң.

34 Улар Пәрвәрдигарниң әмригә хилаплиқ қилип,

Шу йәрдики қовмларни йоқатмиди;

35 Бәлки ят әлләр билән арилишип,

Уларниң қилиқлирини үгәнди;[x]

36 Уларниң бутлириға чоқунди,

Булар өзлиригә бир қапқан болуп чиқти;

37 Чүнки улар өз оғул-қизлирини союп, җинларға қурбанлиққа беғишлиди.[y]

38 Шундақ қилип улар бегуна қанни,

Йәни Қанаандики бутларға атап қурбанлиқ қилип, өз оғул-қизлириниң қенини төкти;

Зимини қанға булғинип кәтти.[z]

39 Улар өз қилмишлири билән булғанди;

Қилиқлири билән паһишә аялдәк бузулди.

40 Шуңа Пәрвәрдигар Өз хәлқидин қаттиқ ғәзәпләнди,

У Өз мирасидин йиргәнди;

41 Уларни ят әлләрниң қолиға бәрди,

Уларға өчмәнләр улар үстидин һөкүмранлиқ қилди.

42 Дүшмәнлири уларни әзди,

Улар яв қоли астида егилип пүкүлди.

43 Көп қетим Пәрвәрдигар уларни қутқузди;

Бирақ улар болса, өз хаһишлири билән Униңға асийлиқ қилди,

Улар өз қәбиһлиги билән пәс һалға чүшти.

44 Шундақтиму У уларниң налә-пәрядини аңлиғанда,

Уларниң җәбир-җапалириға етивар бәрди;

45 Һәм улар билән түзгән әһдисини әслиди,

Зор меһри-шәпқити билән, ғәзивидин янди,□«Зор меһри-шәпқити билән,...» — ибраний тилида: «Зор меһри-шәпқәтлири билән...».

46 У уларни сүргүн қилғанларниң қәлбидә рәһим ойғатти.

47 Бизни қутқузғайсән, и Пәрвәрдигар Худайимиз!

Муқәддәс намиңға тәшәккүр ейтишқа,

Тәнтәнә қилип Сени мәдһийиләшкә,

Бизни әлләр арисидин йениңға жиғивалғайсән![bb]

48 Исраилниң Худаси болған Пәрвәрдигарға,

Әзәлдин та әбәткичә тәшәккүр-мәдһийә қайтурулсун!

Пүткүл хәлиқ «Амин» десун!

Һәмдусана! [cc]