1 И оғлум, тәлимимни унтума,

Дегәнлиримни һемишә көңлүңдә чиң тут.□«чиң тут» — дегән сөз ибраний тилида: «қоғда, мудапиә қил» дегән мәниниму билдүриду.

2 Чүнки у саңа бәрикәтлик күнләр, узун өмүр вә хатирҗәмлик қошуп бериду.□«бәрикәтлик күнләр» — ибраний тилида «күнләрниң узунлуғи».  [c]

3 Меһриван вә һәқ-сәмимий болуштин ваз кәчмә,

Буларни бойнуңға есивал,

Қәлбиңгә пүтивал.□«қәлбиңгә пүтивал» — ибраний тилида «қәлбиңдики тахтайға пүтүвал» (Муса пәйғәмбәргә тапшурулған муқәддәс қанун икки таш тахтайға пүтүлгән еди).  [e]

4 Шундақ қилғанда Худа вә бәндиләрниң нәзиридә илтипатқа лайиқ болисән, данишмән һесаплинисән.□«илтипатқа лайиқ болисән» — мошу йәрдә ибраний тилида «илтипат» дегән сөз икки бислиқ болуп, иккинчи мәнаси «гөзәллик»тур.

5 Өз әқлиңгә таянмай, Пәрвәрдигарға чин қәлбиң билән таянғин;

6 Қандақла иш қилсаң, Пәрвәрдигарни тонушқа интил;

У саңа тоғра йолларни көрситиду.□«Қандақла иш қилсаң,...» — ибраний тилида «Барлиқ йоллириңда...».  [h]

7 Өзүңни әқиллиқ санима;

Пәрвәрдигардин әйминип, яманлиқтин жирақ бол.[i]

8 Шундақ қилғиниңда, бу ишлар дәрдиңгә дәрман,

Устиханлириңға илик болиду.□«дәрдиңгә дәрман... болиду» — ибраний тилида «киндигиңгә саламәтлик... болиду».

9 Пәрвәрдигарниң һөрмитини қилип мал-дунияйиңдин һәдийәләрни сунғин,

Етизиңдин тунҗа чиққан мәһсулатлириңдин Униңға атиғин;[k]

10 Шундақ қилғиниңда, амбарлириң ашлиққа толуп ташиду,

Шарап көлчәклириңдә йеңи шарап ешип-тешип туриду.[l]

11 И оғлум, Пәрвәрдигарниң тәрбийисигә бепәрвалиқ қилма,

Униң тәнбиһидин бәзмә.[m]

12 Чүнки, ата әзиз көргән оғлиға тәнбиһ-тәрбийә бәргәндәк,

Пәрвәрдигар кимни сөйгән болса униңға тәнбиһ-тәрбийә бериду.[n]

13 Даналиққа муйәссәр болған киши,

Йоруқлуққа егә болған киши немидегән бәхитлик-һә!

14 Чүнки даналиқниң пайдиси күмүчниң пайдисидин көптур,

Қиммити сап алтунниңкидинму зиядидур.[o]

15 У ләәл-яқутлардин қиммәтликтур,

Интизар болған һәр қандақ нәрсәңдин һеч бириму униңға тәң кәлмәстур.[p]

16 Даналиқниң оң қолида узун өмүр,

Сол қолида байлиқ вә шөһрәт бардур.

17 Униң йоллири саңа хуш пурақ туюлур,

Униң барлиқ тәриқилири сени арам тапқузур.

18 У өзини тапқан адәмгә «һаятлиқ дәриғи»дур,

Уни чиң тутқан киши немидегән бәхитлик!□«һаятлиқ дәриғи» — шүбһисизки, «Ерән бағчиси»дики Адәм атимиз вә Һава анимизниң бәһримән болушиға тәйярланған «һаятлиқ дәриғи»ни көрситиду (Тәврат, «Яр.» 2:9).

19 Пәрвәрдигар даналиқ билән йәр-зиминни бәрпа қилди,

Һекмәт билән асманни орнатти.

20 Униң билими билән йәрниң чоңқур қатламлири йерилди,

Һәмдә булутлардин шәбнәм чүшти.□«йәрниң чоңқур қатламлири йерилди» — бәлким Нуһ пәйғәмбәрниң вақтидики «чоң топан» билән мунасивәтлик бәзи ишларни көрситиши мүмкин («Яр.» 7:11)  [s]

21 И оғлум! Даналиқ билән билимни көзүңдин чиқарма,

Пишқан һекмәт вә пәм-парасәтни чиң тут.

22 Шуниң билән улар җениңға җан қошиду,

Бойнуңға есилған есил марҗандәк саңа гөзәллик қошиду.

23 Шу чағда йолуңда аман-есән маңалайсән,

Йолда путлашмайсән.[t]

24 Ятқанда һеч немидин қорқмайсән,

Йетишиң биләнла татлиқ ухлайсән.[u]

25 Бешиңға дәһшәтлик вәһимә чүшкәндә қорқмиғин,

Рәзилләрниң вәйранчилиғидин ғәм қилмиғин!□«Рәзилләрниң вәйранчилиғидин ғәм қилмиғин!» — яки «Рәзилләрниң бешиға чүшкән вәйранчилиқтин ғәм қилмиғин!».  [w]

26 Чүнки Пәрвәрдигар сениң таянчиңдур,

У путуңни қапқанлардин нери қилиду.

27 Пәқәт қолуңдин кәлсила, һаҗәтмәнләрдин яхшилиқни айимиғин.

28 Қолум-хошнилириң сениңдин өтнә сорап кирсә, «Қайтип кетип, әтә кәлгин, әтә берәй» — демигин.

29 Хошнаңға зиянкәшлик нийитидә болма,

Чүнки у саңа ишинип йениңда хатирҗәм яшайду.

30 Бириси саңа зиян йәткүзмигән болса,

Униң билән сәвәпсиз маҗиралашма.□«сәвәпсиз маҗиралашма» — яки «сәвәпсиз дәвалашма».

31 Зулумхор кишигә һәсәт қилма,

Униң йол-тәдбирлиридин һеч немини таллима.[y]

32 Чүнки қиңғир йолларни маңидиғанлар Пәрвәрдигарниң нәзиридә жиркиничликтур,

Лекин Униң сирдаш достлуғи дурус яшаватқан адәмгә тәәллуқтур.[z]

33 Пәрвәрдигарниң ләнити рәзиллик қилғучиниң өйидидур,

Лекин У һәққаний адәмниң өйигә бәхит ата қилур.[aa]

34 Бәрһәқ, мәсқирә қилғучиларни У мәсқирә қилиду,

Лекин кичик пеил кишиләргә шәпқәт көрситиду.[bb]

35 Даналар шөһрәткә варислиқ қилиду,

Лекин һамақәтләр рәсва қилиниду.□«Лекин һамақәтләр рәсва қилиниду» — яки «Лекин У (Худа) һамақәтләрни номусқа қалдуриду» (ибраний тилида кинайә ишлитип, ахирқи сөз «көтирилиду» болиду).