1 Қайта-қайта әйиплинип туруп йәнә бойни қаттиқлиқ қилған киши,

Туюқсиздин давалиғусиз янҗилар.

2 Һәққанийлар гүлләнсә, пухралири шатлинар,

Қәбиһләр һоқуқ тутса пухра налә-пәряд көтирәр.[a]

3 Даналиқни сөйгән оғул атисини хуш қилар;

Бирақ паһишиләргә һәмраһ болған униң мал-мүлкини бузуп-чачар.[b]

4 Падиша адаләт билән жутини тинич қилар;

Бирақ баҗ-селиқ салған болса, уни вәйран қилар.□«Бирақ баҗ-селиқ салған болса,...» — яки «бирақ парихор болса,..».

5 Өз йеқиниға хушамәт қилған киши,

Униң путлириға тор тәйярлап қойғандур.

6 Рәзил адәмниң гунайи өзигә қапқан ясап қурар;

Бирақ һәққаний киши нахшилар билән шатлинар.

7 Һәққаний киши мискинниң дәвасиға көңүл бөлүр;

Бирақ яманлар болса бу ишни чүшәнмәс.[d]

8 Һакавур кишиләр шәһәрни қутритип давалғутар;

Бирақ ақиланиләр аччиқ ғәзәпләрни яндурар.

9 Дана киши ахмақ билән дәвалашса,

Ахмақ һүрпийиду яки күлиду, нәтиҗиси һаман течлиқ болмас.

10 Қанхорлар пак-диянәтликләргә нәпрәтлинәр;

Дурусларниң җенини болса, улар қәстләр.□«Дурусларниң җенини болса, улар қәстләр» — башқа бир хил тәрҗимиси: «бирақ дуруслар уларниң җенидин хәвәр алар».

11 Ахмақ һәрдайим ичидики һәммини ашкарә қилар;

Бирақ дана өзини бесивалар.[f]

12 Һөкүмдар ялған сөзләргә қулақ салса,

Униң барлиқ хизмәткарлири яман үгәнмәй қалмас.

13 Гадай билән уни әзгүчи киши бир зиминда яшар;

Һәр иккисиниң көзини нурландурғучи Пәрвәрдигардур.□«Гадай билән уни әзгүчи киши бир зиминда яшар» — ибраний тилида: «гадай билән уни әзгүчи киши бир-биригә йолуқар».  [h]

14 Йоқсулларни диянәт билән сориған падишаниң болса,

Тәхти мәңгүгә мәһкәм турар.[i]

15 Таяқ билән тәнбиһ-несиһәт балиларға даналиқ йәткүзәр;

Бирақ өз мәйлигә қоюп берилгән бала анисини хиҗаләткә қалдурар.[j]

16 Яманлар гүллинип кәтсә, наһәқлик көпийәр;

Лекин һәққанийлар уларниң жиқилғинини көрәр.[k]

17 Оғлуңни тәрбәлисәң, у сени арам тапқузар;

У көңлүңни сөйүндүрәр.[l]

18 Пәрвәрдигарниң вәһийси болмиған әлниң пухралири йолдин чиқип башпанаһсиз қалар;

Лекин Тәврат-қануниға әмәл қилидиған киши бәхитликтур.□«йолдин чиқип башпанаһсиз қалар» — бу ибарә ибраний тилида икки бислиқ бир сөз биләнла ипадиләнгән.

19 Қулни сөз биләнла түзәткили болмас;

У сөзүңни чүшәнгән болсиму, етивар қилмас.

20 Ағзини басалмайдиған кишини көргәнму?

Униңдин үмүт күткәндин, ахмақтин үмүт күтүш әвзәлдур.[n]

21 Кимки өз қулини кичигидин тартип өз мәйлигә қоюп бәрсә,

Күнләрниң биридә униң бешиға чиқар.□«Күнләрниң биридә униң бешиға чиқар» — башқа бир хил тәрҗимиси «Ахирда у (қул) өзигә пәрзәнттәк болуп чиқар».

22 Териккәк киши җедәл-маҗира қозғап турар;

Асан аччиқлинидиған кишиниң гуналири көптур.[p]

23 Мәғрурлуқ кишини пәс қилар,

Бирақ кәмтәрлик кишини һөрмәткә ериштүрәр.[q]

24 Оғри билән шерик болған киши өз җениға дүшмәндур;

У сорақчиниң гува беришкә агаһландурушини аңлисиму, лекин раст гәп қилишқа петиналмас.□«...раст гәп қилишқа петиналмас» — «Лав.» 5:1ни көрүң.  [s]

25 Инсан балисидин қорқуш адәмни қапқанқа чүшүриду;

Бирақ кимки Пәрвәрдигарға таянған болса, у бехәтәр көтириләр.□«бехәтәр көтириләр» — ибраний тилида бир сөз биләнла ипадилиниду.

26 Көп кишиләр һөкүмдардин илтипат издәп жүрәр;

Бирақ адәмниң һәқ-рисқи пәқәт Пәрвәрдигарниңла қолидидур.[u]

27 Наһәқләр һәққанийларға жиркиничликтур;

Дурус йолда маңған кишиләр яманларға жиркиничликтур.