1 Катта әрбаб билән һәмдәстихан болсаң,

Алдиңдики ким екәнлигини убдан ойлан.

2 Иштийиң яман болса,

Гелиңға пичақ тәңләп турғандәк өзүңни тарт.□«Өзүңни тарт» — ибраний тилида «гелиңға пичақ тәңләп тур» дегән сөз билән ипадилиниду.

3 Униң назу-немәтлирини тама қилма,

Улар адәм алдайдиған тамақлардур.

4 Бай болимән дәп өзүңни упратма;

Өзүңниң зеһниңни бу ишқа қаратма.□«Өзүңниң зеһниңни бу ишқа қаратма» — башқа бир хил тәрҗимиси: «Өз әқлиңдин чекинип өзүңни тарт». 3:5-айәтни көрүң.

5 Байлиқларға көз тикишиң биләнла, улар йоқ болиду;

Пул-мал дәрвәқә өзигә қанат ясап,

Худди бүркүттәк асманға учуп кетәр.

6 Ач көзниң ненини йемә,

Униң есил назу-немәтлирини тама қилма;

7 Чүнки униң көңли қандақ болғандәк, өзиму шундақ.

У ағзида: — Қени, алсила, ичсилә! — десиму,

Бирақ көңлидә сени ойлиғини йоқ.

8 Йегән бир жутум таамниму қусуветисән,

Униңға қилған чирайлиқ сөзлириңму бекарға кәткән болиду.

9 Ахмаққа йол көрситип салма,

Чүнки у әқил сөзлириңни көзгә илмас.[c]

10 Қедимдә бекиткән йәрниң пасил ташлирини йөткимә,

Житимларниң етизлириғиму аяқ басма;[d]

11 Чүнки уларниң Һәмҗәмәт-Қутқузғучиси интайин күчлүктур;

У Өзи улар үчүн үстүңдин дәва қилар.□«Һәмҗәмәт-Қутқузғучи» — кона Исраилда «һәмҗәмәт-қутқузғучи» («гоел»)ниң қилидиған йәнә бир иши өзиниң җәмәтидики увал қилинғанлар үчүн адаләтни жүргүзүш еди. Униң уруқ-туққанлиридин бириси қатиллиқ қәстигә учриған болса, «һәмҗәмәт-қутқузғучи»ниң қатилни өлтүрүш һоқуқи һәм вәзиписи бар еди. Мошу айәттики «һәмҗәмәт-қутқузғучи» болса Худа Өзидур, әлвәттә.

12 Несиһәткә көңүл қой,

Илим-билимләргә қулақ сал.

13 Балаңға тәрбийә бериштин еринмә;

Әгәр таяқ билән урсаң, у өлүп кәтмәйду;[f]

14 Сән уни таяқ билән урсаң,

Бәлким уни тәһтисарадин қутқузивалисән.□«тәһтисара» — өлгәнләрниң роһлири баридиған җайни көрситиду.

15 И оғлум, дана болсаң,

Мениң қәлбим қанчә хуш болар еди!

16 Ағзиңда орунлуқ сөзләр болса, ич-ичимдин шатлинимән.□«ич-ичимдин шатлинимән» — ибраний тилида «бөрәклирим шатлиниду».

17 Гуна садир қилғучиларға рәшк қилма,

Һәрдайим Пәрвәрдигардин әймиништә турғин;[i]

18 Шундақ қилғиниңда җәзмән көридиған яхши күнүң болиду,

Арзу-үмүтүң бекарға кәтмәс.[j]

19 И оғлум, сөзүмгә қулақ селип дана бол,

Қәлбиңни Худаниң йолиға башлиғин.

20 Мәйхорларға арилашма,

Нәпси яман гөшхорлар билән барди-кәлди қилма;[k]

21 Чүнки һарақкәш билән нәпси яман ахирида йоқсуллуқта қалар,

Ғәпләт уйқисиға патқанларға җәндә кийимни кийгүзәр.

22 Сени тапқан атаңниң сөзини аңла,

Анаң қериғанда униңға һөрмәтсизлик қилма.[l]

23 Һәқиқәтни сетивал,

Уни һәргиз сетивәтмә.

Даналиқ, тәрбийә вә йорутулушниму ал.[m]

24 Һәққаний балиниң атиси чоң хошаллиқ тапар;

Дана оғулни тапқан атиси униңдин хурсән болар.[n]

25 Ата-анаңни сөйүндүрүп,

Сени туққан анаңни хуш қил.

26 И оғлум, қәлбиңни маңа тапшур;

Көзлириңму һаятлиқ йоллиримға тикилсун!

27 Чүнки паһишә аял чоңқур оридур,

Бузуқ ят аял тар зиндандур;[o]

28 Улар қарақчидәк мөкүвелип,

Инсанийәт арисидики вапасизларни көпәйтәр.

29 Кимдә азап бар? Кимдә дәрд-әләм? Ким җедәл ичидә қалар? Ким налә-пәряд көтирәр? Ким сәвәпсиз ярилинар? Кимниң көзи қизирип кетәр?

30 Дәл шарап үстидә узун олтарған,

Әбҗәш шараптин тетишқа алдириған мәйхорлар![p]

31 Шарапниң әҗайип қизиллиғиға, униң җамдики җулалиғиға,

Кишиниң гелидин шундақ силиқ өткәнлигигә мәптун болуп қалма!

32 Ахирида у зәһәрлик иландәк чеқивалиду,

Оқ иландәк нәштирини санҗийду.

33 Көз алдиңда ғәлитә мәнзириләр көрүниду,

Ағзиңдин қалаймиқан сөзләр чиқиду. □«ғәлитә мәнзириләр көрүниду» — яки «ғәлитә аяллар көрүниду».

34 Худди деңиз-океанларда ләйләп қалғандәк,

Йәлкәнлик кеминиң мома яғичи үстидә ятқандәк болисән.

35 Сән чоқум: — Бириси мени урди, лекин мән яриланмидим!

Бириси мени таяқ билән урди, бирақ ағриғини сәзмидим!» — дәйсән.

Бирақ сән йәнә: «Һошумға кәлсәмла, мән йәнила шарапни издәймән! — дәйсән.