1 Көңүлдики нийәтләр инсанға тәвәдур;

Бирақ тилниң җавави Пәрвәрдигарниң илкидидур.[a]

2 Инсан өзиниң һәммә қилған ишини пак дәп биләр;

Лекин қәлбдики нийәтләрни Пәрвәрдигар таразиға селип тартип көрәр.□«қәлбдики нийәтләр» — ибраний тилида «(адәмләрниң) роһлири» дейилиду.  [c]

3 Нийәт қилған ишлириңни Пәрвәрдигарға тапшурғин,

Шундақ қилғанда планлириң пишип чиқар.[d]

4 Пәрвәрдигар барлиқ мәвҗудийәтниң һәр бирини мәлум мәхсәт билән апиридә қилған;

Һәтта яманларниму балаю-апәт күни үчүн яратқандур.[e]

5 Тәкәббурлуққа толған көңүлләрниң һәр бири Пәрвәрдигарға жиркиничликтур;

Қол тутушуп бирләшсиму, җазасиз қалмас.□«қол тутушуп бирләшсиму,...» — башқа бир хил тәрҗимиси: «шубһисизки,...».  [g]

6 Муһәббәт-шәпқәт вә һәқиқәт билән гуналар кафарәт қилинип йепилар;

Пәрвәрдигардин әйминиш адәмләрни яманлиқтин халий қилар.□«...гуналар кафарәт қилинип йепилар» — Тәврат дәвридә, гуналар қурбанлиқлар арқилиқ «йепилип кәчүрүм қилинди» (йәни, «кафарәт қилинди»). Инҗил дәвригә кәлгәндила, гуналар «елип ташланди» (мәсилән, «Юһ.» 1:29).

7 Адәмниң ишлири Пәрвәрдигарни хурсән қилса,

У һәтта дүшмәнлириниму униң билән енақлаштурар.

8 Һалал алған аз,

Һарам алған көптин әвзәлдур.[i]

9 Инсан көңлидә өз йолини тохтитар;

Амма қәдәмлирини тоғрилайдиған Пәрвәрдигардур.

10 Һәтта падишаниң ләвлиригә қаритип әпсун оқулсиму,

Униң ағзи тоғра һөкүмдин чәтнимәс.□«Һәтта падишаниң ләвлиригә қаритип әпсун оқулсиму, униң ағзи тоғра һөкүмдин чәтнимәс» — йәнә икки хил тәрҗимиси бар: (1) «Падишаһниң ләвлиридә Пәрвәрдигарниң вәһийи болса, униң ағзи тоғра һөкүмдин чәтнимәс»; (2) «Падишаһниң ләвлири вәһийгә қарап сөзләйду; униң ағзи тоғра һөкүмдин чәтнимәслиги керәк».

11 Адил тараза-мизанлар Пәрвәрдигарға хастур;

Тараза ташлириниң һәммисини У ясиғандур.[k]

12 Падиша рәзиллик қилса жиркиничликтур,

Чүнки тәхт һәққанийәт биләнла мәһкәм турар.

13 Һәққаний сөзлигән ләвләр падишаларниң хурсәнлигидур;

Улар дурус сөзлигүчиләрни яхши көрәр.

14 Падишаһниң қәһри гоя өлүмниң әлчисидур;

Бирақ дана киши униң ғәзивини тиничландурар.[l]

15 Падишаһниң чирайиниң нури кишигә җан киргүзәр;

Униң шәпқити вақтида яққан «кейинки ямғур»дур.□«Униң (падишаниң) шәпқити вақтида яққан «кейинки ямғур»дур» — ибраний тилида: «Униң (падишаниң) шәпқити «кейинки ямғурлар»ни әпкәлгән булуттур». «Кейинки ямғурлар» Исраилда 3-айда йеғип, әтиязлиқ зираәтләрни пишириштәк һалқилиқ рольни ойнайду. Шуңа һәр бир дехан «кейинки ямғур»ға тәшнадур, улар уни бәк қәдирләйду.  [n]

16 Даналиқ елиш алтун елиштин нәқәдәр әвзәлдур;

Йорутулушни таллаш күмүчни таллаштин шунчә үстүндур![o]

17 Дурус адәмниң егиз көтирилгән йоли яманлиқтин айрилиштур;

Өз йолиға еһтият қилған киши җенини сақлап қалар.

18 Мәғрурлуқ һалак болуштин авал келәр,

Тәкәббурлуқ жиқилиштин авал келәр.[p]

19 Кәмтәр болуп мискинләр билән барди-кәлдидә болуш,

Тәкәббурлар билән һарам мал бөлүшкәндин әвзәлдур.

20 Кимки ишни пәм-парасәт билән қилса пайда тапар;

Пәрвәрдигарға таянған болса, бәхит-саадәт көрәр.□«Кимки ишни пәм-парасәт билән қилса пайда тапар» — яки «несиһәт сөзигә көңүл қойған пайда тапар».  [r]

21 Көңли дана киши сәгәк атилар;

Йеқимлиқ сөзләр адәмләрниң билимини ашурар.

22 Пәм-парасәт өзигә егә болғанларға һаятлиқниң булиқидур;

Әқилсизләргә тәлим бәрмәкниң өзи әқилсизликтур.[s]

23 Ақиланә кишиниң қәлби ағзидин әқил чиқирар;

Униң ләвзигә билимни зиядә қилар.

24 Йеқимлиқ сөзләр гоя һәсәлдур;

Көңүлләрни хуш қилип тәнгә давадур.

25 Адәм балисиға тоғридәк көрүнидиған бир йол бар,

Лекин ақивити һалакәткә баридиған йоллардур.[t]

26 Ишлигүчиниң иштийи уни ишқа салар;

Униң қарни униңға һайдакчилик қилар.□«Униң қарни униңға һайдакчилик қилар» — ибраний тилида «Униң ағзи униңға һайдакчилик қилар».

27 Муттәһәм киши яман гәпни колап жүрәр;

Униң ләвлири лавулдап турған отқа охшар.□«Муттәһәм киши» — ибраний тилида «Белиалниң оғли» дейилиду. «Белиал»ниң мәнаси «әрзимәс» дегәнлик болуп, бәлким Иблисни көрситиду.  [w]

28 Әгир адәм җедәл-маҗира туғдурғучидур;

Ғәйвәтчи йеқин достларни айриветәр.[x]

29 Зораван киши йеқин адимини аздурар;

Уни яман йолға башлап кирәр.□«Уни яман йолға башлап кирәр» — ибраний тилида «Уни яхши әмәс бир йолға башлап кирәр».

30 Көзини жумувалған киши яман нийәтни ойлар;

Левини чишлигән киши яманлиққа тәйярдур.□«Көзини жумувалған киши» — яки «көз қисқучи киши», «көзини чимилдатқучи адәм».  [aa]

31 Һәққанийәт йолида ақарған чач,

Адәмниң шөһрәт таҗидур.□«Һәққанийәт йолида ақарған чач, адәмниң шөһрәт таҗидур» — айәтниң башқа бир хил тәрҗимиси: «Ақ чач болса адәмниң шөһрәт таҗидур; у һәққанийәт йолида пәйда болиду».

32 Асан аччиқлимайдиған киши палвандин әвзәлдур;

Өзини тутувалған шәһәр алғандинму үстүндур.□«Өзини тутувалған» — ибраний тилида: «Өз роһини идарә қилидиған» дегән сөзләр билән ипадилиниду.

33 Чәк етәккә ташланғини билән,

Лекин нәтиҗиси пүтүнләй Пәрвәрдигардиндур.