1 Дана оғул атисиниң тәрбийисигә көңүл қояр;

Мәсқирә қилғучи тәнбиһкә қулақ салмас.

2 Адәм дурус еғизиниң мевисидин һозурлинар;

Тузкорлар зораванлиққа һәвәс қилип зораванлиққа учрар.[a]

3 Сөздә еһтиятчан киши җенини сақлап қалар;

Ағзи иштик һалакәткә учрар.

4 Һорунниң арзу-тилиги бар, лекин еришәлмәс;

Лекин тиришчан әтлинәр.

5 Һәққаний адәм ялғанчилиқтин жиркинәр;

Қәбиһ болса сесип, шәрмәндә болар.

6 Йоли дурусни һәққанийәт қоғдар;

Лекин гунакарни рәзиллик жиқитар.[b]

7 Бәзиләр өзини бай көрсәткини билән әмәлийәттә қуруқ сөләттур;

Бәзиләр өзини йоқсул көрсәткини билән зор байлиқлири бардур.[c]

8 Өз байлиғи гөрүгә тутулған байниң җениға ара турар;

Бирақ йоқсуллар һеч вәһимини аңлимас.

9 Һәққаний адәмниң нури шатлинип парлар;

Бирақ яман адәмниң чириғи өчүрүләр.[d]

10 Кибирликтин пәқәт җедәл-маҗирала чиқар;

Даналиқ болса несиһәтни аңлиғанлар билән биллидур.

11 Ишлимәй тапқан һарам байлиқ бәрикәтсиздур;

Тәр төкүп һалал тапқан гүллинәр.[e]

12 Тәлмүргинигә күтүп еришәлмәслик көңүлни сунуқ қилар,

Лекин тәшналиқта еришкини «һаятлиқ дәриғи»дур.□«һаятлиқ дәриғи» — «Ерән бағчиси»дики, Адәм атимиз вә Һава анимизниң бәһриман болушиға тәйярланған дәрәқни көрситиду (3:18ни көрүң).  [g]

13 Худаниң калам-сөзигә писәнт қилмиған адәм гунаниң төлимигә қәриздар болар;

Лекин пәрманни қәдирлигән адәм яхшилиқ көрәр.

14 Ақиланиниң тәлими һаятлиқ бәргүчи булақтур,

У сени өлүм қапқанлиридин қутулдурар.[h]

15 Ақиланилик адәмни илтипатқа ериштүрәр;

Бирақ тузкорларниң йоли әгир-бүгри, җапалиқ болар.

16 Пәм-парасәтлик адәм билими билән иш көрәр;

Һамақәт өз наданлиғини ашкарилар.[i]

17 Рәзил алақичи бала-қазаға учрар;

Садиқ әлчи болса дәрдкә дәрмандур.

18 Тәрбийәни рәт қилған адәм намратлишип уятқа қалар;

Амма тәнбиһни қобул қилған һөрмәткә еришәр.

19 Әмәлгә ашқан арзу кишигә шерин туюлар;

Лекин ахмақлар яманлиқни ташлашни яман көрәр.

20 Ақиланиләр билән биллә жүргән Дан. болар;

Бирақ ахмақларға һәмраһ болған налә-пәрядта қалар.□«...налә-пәрядта қалар» — яки «...зиян тартар».

21 Балайиқаза гунакарларниң кәйнидин бесип маңар;

Лекин һәққанийлар яхшилиқниң әҗрини тапар.

22 Яхши адәм пәрзәнтлириниң пәрзәнтлиригә мирас қалдурар;

Гунакарларниң жиққан мал-дуниялири һәққанийлар үчүн топлинар.[k]

23 Йоқсулниң ташландуқ йери мол һосул берәр,

Лекин адаләтсизликтин у вәйран болар.[l]

24 Таяқни айиған киши оғлини яхши көрмәс;

Балини сөйгән киши уни әстайидил тәрбийиләп җазалар.[m]

25 Һәққаний адәм көңли қанаәт тапқичә озуқ йәр;

Яманниң қосиғи ач қалар.