1 Чүнки мана, шу күнләрдә, шу пәйттә,

Мән Йәһуда һәм Йерусалимни асарәттин қутулдуруп, азатлиққа ериштүргинимдә,

2 Мән барлиқ әлләрниму жиғип,

Уларни «Йәһошафат җилғиси»ға чүшүримән;

Шуниң билән уларниң хәлқимни әлләр арисиға тарқитивәткәнлигидин,

Зиминимни бөлүп парчиливәткәнлигидин,

Уларни әшу йәрдә Мениң мирасим, йәни хәлқим Исраил түпәйлидин сораққа тартимән.□«Мән барлиқ әлләрниму жиғип,... шуниң билән уларниң хәлқимни әлләр арисиға тарқитивәткәнлигидин, ... уларни... хәлқим Исраил түпәйлидин сораққа тартимән» — «әлләр» болса ят әлләр, Йәһудий әмәсләр. «Йәһошафат җилғиси» — «Йәһошафат» — «Яһ» (Пәрвәрдигар) сотлайду» дегән мәнидә. У бәлким Йерусалим шәһириниң шәрқи тәрипидики «Кидрон җилғиси»ни көрситиду (Йерусалим һәм «Зәйтун теғи» арисида).

3 Униң үстигә улар Мениң хәлқимни доға тикип чәк ташлиған;

Бир жигитни бир паһишә аялға алмаштурған,

Бир қизни «шарап ичимиз» дәп шарап үчүн алмаштурған.

4 Һәй, Тур һәм Зидон, Филистийәниң барлиқ районлири, Мән силәрни немә қилиптимән?

Силәр Мәндин өч алмақчимусиләр?

(Бирақ Мәндин өч алимиз десәңлар, өчни тезла өз бешиңларға қайтуруп беримән!)□«Һәй, Тур һәм Зидон,...» — «Тур» болса Ливандики әң чоң порт һәм қудрәтлик шәһәр, Зидон униң әтрапидики район.

5 Күмүчлирим, алтунлиримни буливалғиниңлар түпәйлидин,

Гөзәл гөһәрлиримни өз бутханилириңларға апарғиниңлар түпәйлидин,

6 Йәһуда балилири һәм Йерусалимниң балилирини өз чегарасидин жирақ қилмақ үчүн уларни Грекларға сетиветкиниңлар түпәйлидин,

7 Мана, Мән уларни силәр сетивәткән җайда орнидин турғузимән,

Һәмдә қилғиниңларни өз бешиңларға қайтуримән.

8 Оғул-қизлириңларни Йәһуда балилириниң қолиға сетиветимән,

Улар шуларни жирақтики бир әлгә, йәни Шабиялиқларға сетиветиду;

Чүнки Пәрвәрдигар сөз қилған.□«Улар шуларни жирақтики бир әлгә, йәни Шабиялиқларға сетиветиду» — «Шабиялиқлар» «Шеба» дегән райондикиләр болуши мүмкин.

9 Шуни әлләр арисида җакалаңларки,

«Җәңгә тәйярлиниңлар,

Палванларни қозғаңлар,

Җәңчиләрниң һәммиси йеқинлашсун,

Җәңгә һазир болсун;

10 Сапан чишлирини қилич қилип,

Оғақлириңларни нәйзә қилип соқушуңлар;

Аҗиз адәмму: «Мән күчлүк» десун;

11 Әтраптики һәммә әлләр, тездин келиңлар,

Һәммиңлар шу йәргә җәм болуңлар!».

«Өзүңниң күчлүклириңни әшу йәргә чүшүргәйсән, аһ Пәрвәрдигар!»□«Өзүңниң күчлүклириңни әшу йәргә чүшүргәйсән, аһ Пәрвәрдигар!» — бу сөзләр 2:1-11дики вә «Йәш.» 13:3-5дики сөзләргә мунасивәтлик болуши керәк. «Йәш.» 13:3-5дики изаһатларниму көрүң.

12 «Әлләр қозғилип «Йәһошафат җилғиси»ға кәлсун;

Чүнки Мән шу йәрдә олтирип әтраптики һәммә әлләрни сораққа тартимән.

13 Оғақни селиңлар,

Чүнки зираәт пишти;

Келиңлар, чүшүп чәйләңлар,

Чүнки шарап көлчәклири лиқ тушуқтур,

Идиш-күпләр толуп ташиду.

Чүнки уларниң рәзиллиги зордур»□«Оғақни селиңлар, чүнки зираәт пишти; келиңлар, чүшүп чәйләңлар, чүнки шарап көлчәклири лиқ тушуқтур... чүнки уларниң рәзиллиги зордур»» — мошу буйруқ бәлким Худаниң «күчлүклири», йәни пәриштиләргә ейтилиду («Вәһ» 14:17-20ни көрүң).  [f]

14 Аһ, нурғун, нурғун кишиләр «Қарар җилғиси»да!

Чүнки Пәрвәрдигарниң күни «Қарар җилғиси»ға йеқинлашти.

15 Қуяш һәм ай қараңғулишип кетиду,

Юлтузлар өз җуласини қайтурувалиду.[g]

16 Пәрвәрдигар Зиондин һөкирәйду,

Йерусалимдин авазини қоюветиду;

Асманлар, зиминлар силкиниду;

Лекин Пәрвәрдигар Өз хәлқигә башпанаһ,

Исраил балилириға күч-һимайә болиду.

17 Шуниң билән силәр Мәнки Пәрвәрдигарниң силәрниң Худайиңлар екәнлигимни,

Өз муқәддәс теғим Зионда туридиғанлиғимни билисиләр;

Йерусалим пак-муқәддәс болиду,

Униңдин һеч ят адәмләр йәнә өтмәйду.□«Униңдин һеч ят адәмләр йәнә өтмәйду» — дегән сөз бәлким: (1) һеч таҗавузчи йәнә Йерусалимни бузмайду, вә (2) Йерусалимни булғғидәк һеч қандақ бутпәрәс адәм униңдин йәнә өтмәйду, дегән икки мәнини көрситиши мүмкин.  [i]

18 Һәм шу күни әмәлгә ашурулидуки,

Тағлар йеңи шарапни темитиду,

Дөң-егизликләрдин сүт ақиду,

Йәһудадики барлиқ ериқ-өстәңләрдә лиқ су ақиду;

Пәрвәрдигарниң өйидин бир булақ чиқиду,

Шиттим җилғисини суғириду.□«...Шиттим җилғисини суғириду» — «Шиттим җилғиси» Йерусалимниң шәрқий тәрипида болуп, сулири Иордан җилғисиға чүшиду.  [k]

19 Мисир болса бир чөллүк,

Едом адәмзатсиз бир чөл-баяван болиду,

Уларниң Йәһуда балилириға қилған зулум-зораванлиғи түпәйлидин,

Улар буларниң зиминида бегуна қанларни төккәнлиги түпәйлидин.

20 Бирақ Йәһуда мәңгүгә туриду,

Йерусалим дәвирдин-дәвиргичә қалиду;

21 Һәм Мән уларни төккән қанларниң пакландурулмиған гуналиридин пакландуримән;

Чүнки Пәрвәрдигар Зионда маканлашқандур.

<- Йоел 2