1 Аюп җававән мундақ деди: —

2 «Аһ, мениң дәрдлик зарлирим таразида өлчәнсә!

Аһ, бешимға чүшкән барлиқ балаю-қаза булар билән биллә таразиланса!□«... Аһ, бешимға чүшкән барлиқ балаю-қаза булар , йәни дәрдлик зарлирим билән биллә таразиланса!» — Аюпниң бу сөзи: «дәрдлик зарлирим» вә бешимға чүшкән бала-қазалар таразада селиштурулса, әмәлийәттә мениң зарлиримниң аз екәнлиги көрүниду, дегән мәнини өз ичигә елиши мүмкин.

3 Шундақ қилинса у һазир деңиздики қумдин еғир болуп чиқиду;

Шуниң үчүн сөзлирим тәлвиләрчә болуватиду.[b]

4 Чүнки Һәммигә Қадирниң оқлири маңа санҗилип ичимдә туруватиду,

Уларниң зәһирини роһум ичмәктә,

Тәңриниң вәһимилири маңа қарши сәп түзүп һуҗум қиливатиду.□«Уларниң зәһирини роһум ичмәктә» — яки, «Уларниң зәһәри роһумни йәп кетиду».  [d]

5 Явайи ешәк от-чөп тапқанда һаңрамду?

Кала болса йәм-хәшәк үстидә мөрәмду?

6 Туз болмиса тәмсиз нәрсини йегили боламду?

Хам тухумниң еқиниң тәми барму?

7 Җеним уларға тәгсиму сәскинип кетиду,

Улар маңа жиркиничлик тамақ болуп туюлиду.

8 Аһ, мениң тәшна болғиним кәлсиди!

Тәңри интизаримни иҗабәт қилсиди!

9 Аһ, Тәңри мени янчип ташлисун!

У қолини қоюветип җенимни үзүп ташлашқа мувапиқ көрсиди!

10 Шундақ болса, маңа тәсәлли болатти,

Һәтта рәһимсиз ағриқларда қийналсамму, шатлинаттим;

Чүнки Муқәддәс Болғучиниң сөзлиридин танмиған болаттим!□«Һәтта ... шатлинаттим; чүнки Муқәддәс Болғучиниң сөзлиридин танмиған болаттим!» — Аюпниң бундақ ойлиши: «Әгәр һазир Худа мениң җенимни алса, мән Униңдин йүз өрүмигән мана мошу чағдила алса боптикән; бирақ бу азап-оқубәтләр давамлаштурулса, мәндә немә өзгиришләр болар, мән Худадин танимәнму қандақ? Шуңа яхшиси У һазир мени әпкәтсә, қаттиқ бир зәрбә билән әпкәтсә мәйли» дегәндәк мәнини бериду.

11 Мәндә өлүмни күткидәк йәнә қанчилик мағдур қалди?

Мениң сәвир-тақәтлик болуп һаятимни узартишимниң немә нәтиҗиси болар?

12 Мениң күчүм таштәк чиңму?

Мениң әтлирим мистин ясалғанмиди?

13 Өзүмгә ярдәм бәргидәк мағдурум қалмиди әмәсму?

Һәр қандақ әқил-тәдбир мәндин қоғливетилгән әмәсму?

14 Үмүтсизлинип кетиватқан кишигә дости меһриванлиқ көрсәтмики зөрүрдур;

Болмиса у Һәммигә қадирдин қорқуштин ваз кечиши мүмкин.□«Үмүтсизлинип кетиватқан кишигә дости меһриванлиқ көрсәтмики зөрүрдур; болмиса ...» — айәтниң башқа бир нәччә тәрҗимилири бар. Буларниң бири: «Һәтта у Һәммигә Қадирдин қорқуштин айрилған болсиму, үмүтсизлинип кетиватқан кишигә дости меһриванлиқ көрсәтмики зөрүрдур».

15 Бирақ бурадәрлирим вақитлиқ «алдамчи ериқ» сүйидәк,

Маңа һелигәрлик билән муамилә қилмақта;

Улар сулири еқип түгигән ериққа охшайду.□«алдамчи ериқ» — чөл баяванда туюқсиз еқиштин тохтайдиған ериқ. Йолучиларниң мошундақ ериққа ишиниши интайин хәтәрлик, әлвәттә. 20-21-айәтләрни көрүң.

16 Еригән муз сулири ериққа киргәндә улар қаридап кетиду,

Қарлар уларниң ичидә йоқилип кетиду,

17 Улар пәсилниң иллиши билән қуруп кетиду;

Һава иссип кәткәндә, изидин йоқилип кетиду.□«Һава иссип кәткәндә, изидин йоқилип кетиду» — демәк, әң керәк болған вақитта бу ериқлар ғайип болиду.

18 Сәпәрдашлар маңған йолидин чиқип, ериққа бурулиду;

Улар ериқни бойлап меңип, чөлдә езип өлиду.

19 Темалиқ карванларму ериқ издәп маңди;

Шебалиқ содигәрләрму уларға үмүт билән қариди;□«Шебалиқ содигәрләрму уларға үмүт билән қариди» — яки «Шебалиқ содигәрләрму уларға учрашни үмүт қилатти».

20 Бирақ улар ишәнгинидин үмүтсизлинип номуста қалди;

Улар әшу йәргә келиши билән паракәндичиликкә учриди.

21 Мана силәр уларға охшаш маңа тайини йоқ болуп қалдиңлар;

Силәр қорқунучлуқ бир вәһимини көрүпла қорқуп кетиватисиләр.

22 Мән силәргә: «Маңа бериңлар»,

Яки: «Маңа мал-мүлүклириңлардин һәдийә қилиңлар?» — дегәнни қачан дәп баққан?□«Маңа мал-мүлүклириңлардин һәдийә қилиңлар?» — дегәнни қачан дәп баққан?» — Аюп у достлириға һеч қачан қәриздар болуп бақмиған. У: «Силәрдин пул яки мал-мүлүк күткиним йоқ, силәрдин күткиним пәқәт азрақ һесдашлиқ яки меһриванлиқ, халас» демәкчи.

23 Яки: «Мени езитқучиниң қолидин қутқузуңлар!»

Яки «Зораванларниң қолидин гөрүгә пул бәрсәңлар!» дәп баққанму?

24 Маңа үгитип қоюңлар, сүкүт қилимән;

Нәдә йолдин чиққанлиғимни маңа көрситип бериңлар.

25 Тоғра сөзләр немидегән өткүр-һә!

Бирақ әйиплириңлар зади немини испатлалайду?!□«Бирақ әйиплириңлар зади немини испатлалайду?» — шу вақитқичә Аюпниң үч дости арисидин пәқәт Елифаз сөз қилған. Аюп «әйиплириңлар» (көплүк шәкли) дегән сөзи билән уларға: «Силәр йенимға келиштин авал әһвалим тоғрилиқ тил бириктүрүвалған охшайсиләр» дәп пуритиватиду.

26 Үмүтсизләнгән кишиниң гәплири өтүп кетидиған шамалдәк турса,

Пәқәт сөзләрнила әйиплимәкчимусиләр?□«Үмүтсизләнгән кишиниң гәплири өтүп кетидиған шамалдәк турса,...» — Аюп бу гәплири билән өзүмниң бәзи сөзлиримниң һәддидин ешип кәткәнлигини билимән, дәп етирап қилған болса керәк. Башқа бир хил тәрҗимиси: «Силәр пәқәт сөзләрнила әйиплимәкчимусиләр, үмүтсизләнгән кишиниң гәплири наһайити өтүп кетидиған бир шамалдәкла дәп қаримақчисиләр?».

27 Силәр житим-йесирларниң үстидә чәк ташлишисиләр!

Дост-бурадириңлар үстидә содилишисиләр!□«Дост-бурадириңлар үстидә содилишисиләр!» — башқа бир хил мәнаси: «Силәр дост-бурадәрләр үчүн ора колишисиләр».

28 Әнди маңа йүз туранә қарап беқиңлар;

Алдиңлардила ялған сөз қилаламдим?

29 Өтүнимән, болди қилиңлар, гуна болмисун;

Раст, қайтидин ойлап беқиңлар,

Чүнки өзүмниң тоғрилиғим таразида туриду.□«Чүнки өзүмниң тоғрилиғим таразида туриду» — яки: «Чүнки бу ишта һәқ мән тәрәптидур».

30 Тилимда хаталиқ барму?

Тилим яманлиқни зади теталмасму?