1 پەرۋەردىگار ھۆكۈم سۈرىدۇ!

يەر-زېمىن خۇش بولسۇن،

كۆپلىگەن ئاراللار شادلانسۇن![a]

2 بۇلۇتلار ۋە قاراڭغۇلۇق ئۇنىڭ ئەتراپىدىدۇر،

ھەققانىيەت ۋە ئادالەت تەختىنىڭ ئۇلىدۇر؛

3 ئۇنىڭ ئالدىدا ئوت يالقۇنى يۈرىدۇ،

ئەتراپتىكى دۈشمەنلىرىنى كۆيدۈرۈپ تاشلايدۇ؛

4 ئۇنىڭ چاقماقلىرى جاھاننى يورۇتتى،

يەر بۇنى كۆرۈپ تىترەپ كەتتى؛[b]

5 پەرۋەردىگارنىڭ ئالدىدا،

پۈتكۈل زېمىننىڭ ئىگىسىنىڭ ئالدىدا،

تاغلار مومدەك ئېرىپ كېتىدۇ.

6 ئاسمانلار ئۇنىڭ ھەققانىيىتىنى جاكارلايدۇ،

بارلىق خەلقلەر ئۇنىڭ شان-شەرىپىنى كۆرىدۇ.[c]

7 ئويما ھەيكەللەرگە چوقۇنغانلار،

بۇتلار بىلەن ماختىنىپ يۈرگۈچىلەرنىڭ ھەممىسى ئۇياتتا قالىدۇ.

بارلىق ئىلاھلار، ئۇنىڭغا سەجدە قىلىڭلار!□«ئويما ھەيكەللەرگە چوقۇنغانلار، بۇتلار بىلەن ماختىنىپ يۈرگۈچىلەر...» ــ «بۇتلار» ئىبرانىي تىلىدا «ئەرزىمەسلەر». «بارلىق ئىلاھلار، ئۇنىڭغا سەجدە قىلىڭلار!» ــ «ئىلاھلار» بۇ يەردە، شۇنداقلا 86-، 95-، 96- ۋە 97-كۈيدە كۆرسىتىلگەندەك، پەرىشتىلەرنى، ياكى بولمىسا بۇتلارنىڭ كەينىدىكى جىن-شەيتانلارنى كۆرسىتىدۇ. 3:94 ۋە ئىزاھاتىنى كۆرۈڭ.

8 سېنىڭ ھۆكۈملىرىڭ سەۋەبىدىن، ئى پەرۋەردىگار،

زىئون ئاڭلاپ شادلاندى،

يەھۇدا قىزلىرى خۇش بولدى.

9 چۈنكى سەن پەرۋەردىگار پۈتكۈل يەر يۈزى ئۈستىدىكى ئەڭ ئالىيسىدۇرسەن؛

سەن بارلىق ئىلاھلاردىن نەقەدەر يۇقىرىدۇرسەن!

10 پەرۋەردىگارنى سۆيگەنلەر، يامانلىقتىن نەپرەتلىنىڭلار!

ئۇ مۆمىن بەندىلىرىنىڭ جېنىدىن خەۋەر ئالىدۇ،

رەزىللەرنىڭ چاڭگىلىدىن خالاس قىلىدۇ.[e]

11 ھەققانىيلار ئۈچۈن نۇر،

دىلى دۇرۇسلار ئۈچۈن شادلىق تېرىلغاندۇر؛

12 پەرۋەردىگاردىن شادلىنىڭلار، ئى ھەققانىيلار،

ئۇنىڭ پاك-مۇقەددەسلىكىنى ياد ئېتىپ تەشەككۈر ئېيتىڭلار!