1 نەغمىچىلەرنىڭ بېشىغا، تارلىق سازلاردا چېلىنسۇن دەپ تاپشۇرۇلغان، ئاسافنىڭ كۈي-ناخشىسى: ــ

يەھۇدادا خۇدا تونۇلغاندۇر؛

ئۇنىڭ نامى ئىسرائىلدا ئۇلۇغدۇر.

2 ئۇنىڭ پاناھىي جايى سالېمدا،

زىئون تېغىدا ئۇنىڭ ماكانى بار. □«ئۇنىڭ پاناھىي جايى سالېمدا» ــ ئىبرانىي تىلىدا: «ئۇنىڭ ئۇۋىسى سالېمدا». بۇ سۆز بەلكىم خۇدانى شىرغا ئوشىتىدۇ. تەۋراتتىكى «ھوشىيا» دېگەن قىسىمدا خۇدا «يەھۇدانىڭ شىرى» دەپ ئاتىلىدۇ. «سالېم» ــ «يېرۇسالېم»نىڭ قىسقارتىپ ئېيتىلىشى.

3 ئۇ يەردە ئۇ ئوتلۇق ئوقلارنى،

قالقان، قىلىچ ھەم جەڭ قوراللىرىنى چېقىپ تاشلىدى.

سېلاھ.

4 ئۆزۈڭ ئوۋ-ئولجا تاغلىرىدىن نەقەدەر شەرەپلىك، نەقەدەر ئەلاسەن!□«ئوۋ-ئولجا تاغلىرى» ــ بەلكىم توپ-توپ دۆۋىلەنگەن ئوۋ-ئولجىلارنى كۆرسىتىدۇ.

5 باتۇرلار بۇلاندى؛

ئۇلار ئۇزۇن ئۇيقۇغا كەتتى؛

پالۋانلارنىڭ ھېچقايسىسى ئۆز قولىنى كۆتۈرەلمىدى.

6 سېنىڭ ئەيىبلىشىڭ بىلەن، ئى ياقۇپنىڭ خۇداسى،

جەڭ ھارۋىسى ھەم ئاتلار ئۆلۈكتەك ئۇخلىتىلدى.

7 سەندىن، سەندىن قورقۇش كېرەكتۇر؛

غەزەپلەنگىنىڭدە كىم ئالدىڭدا تۇرالىسۇن؟

8‏-9 يەر يۈزىدىكى بارلىق ياۋاش مۆمىنلەرنى قۇتقۇزۇش ئۈچۈن،

سەن خۇدا سوراق قىلىشقا ئورنۇڭدىن تۇرغان ۋاقتىڭدا،

ئاسماندىن ھۆكۈمنى چىقىرىپ ئاڭلاتقۇزدۇڭ؛

يەر بولسا ۋەھىمىگە چۈشۈپ، سۈكۈت قىلدى.

سېلاھ.

10 چۈنكى ئىنسانلارنىڭ قەھرى ساڭا شۆھرەت كەلتۈرىدۇ؛

ئۇلارنىڭ قالغان قەھرى ساڭا بەلۋاغ بولىدۇ.□«ئىنسانلارنىڭ قەھرى ساڭا شۆھرەت كەلتۈرىدۇ؛ ئۇلارنىڭ قالغان قەھرى ساڭا بەلۋاغ بولىدۇ» ــ بۇ سىرلىق سۆز بەلكىم (1) خۇدا ئىنساننىڭ بارلىق ئاسىيلىق-قارشىلىشىشلىرىنى ئاخىرىدا ئۆزىنىڭ شۆھرىتىگە ھەم مۇددىئالىرىغا ئايلاندۇرىدۇ؛ (2) ئىنسانلارنىڭ ئۆز قەھرى ئۆزىگە كەلتۈرگەن كۈلپەتلەر يېنىك بولۇپ قالغان بولسا، «قالغان قەھر»نى خۇدا ئۆزى تولۇقلاپ جازالىرىنى ئېغىرلاشتۇرىدۇ.

11 پەرۋەردىگار خۇدايىڭلارغا قەسەم قىلىپ، ئەمەل قىلىڭلار؛

ئۇنىڭ ئەتراپىدىكى يۇرتتىكىلەر قورقۇشى كېرەك بولغۇچىغا ھەدىيەلەر سۇنسۇن؛

12 ئۇ ئەمىرلەرنىڭمۇ روھىنى سۇندۇرىدۇ؛

ئۇ يەر يۈزىدىكى پادىشاھلارغا دەھشەتلىكتۇر.