1 نەغمىچىلەرنىڭ بېشىغا تاپشۇرۇلۇپ ئوقۇلسۇن دەپ، ماخالات ئاھاڭىدا داۋۇت يازغان «ماسقىل»:

ئەخمەق كىشى كۆڭلىدە: «ھېچبىر خۇدا يوق» ــ دەيدۇ.

ئۇلار چىرىكلىشىپ،

نەپرەتلىك قەبىھ ئىشلارنى قىلىشتى؛

ئۇلارنىڭ ئىچىدە مېھرىبانلىق قىلغۇچى يوقتۇر.□«ماخالات ئاھاڭىدا داۋۇت يازغان «ماسقىل»» ــ «ماخالات»نىڭ مەنىسى بىزگە نامەلۇم.  ■زەب. 10‏:4؛ 14‏:1؛ رىم. 3‏:12

2 خۇدا ئەرشتە تۇرۇپ، ئىنسان بالىلىرىنى كۆزىتىپ:

«بۇ ئىنسانلارنىڭ ئارىسىدا، ئىنساپنى چۈشىنىدىغان بىرەرسى بارمىدۇ؟

خۇدانى ئىزدەيدىغانلار بارمىدۇ؟■رىم. 3‏:11

3 ھەممە ئادەم يولدىن چىقتى،

ھەممە ئادەم چىرىكلىشىپ كەتتى،

مېھرىبانلىق قىلغۇچى يوقتۇر، ھەتتا بىرىمۇ.

4 ناننى يېگەندەك مېنىڭ خەلقىمنى يۇتۇۋالغان،

قەبىھلىك قىلغۇچىلارنىڭ بىلىمى يوقمىدۇ؟» ــ دەيدۇ.

ئۇلار پەرۋەردىگارغا ھېچبىر ئىلتىجا قىلمايدۇ.

5 قورققۇدەك ھېچ ئىش بولمىسىمۇ،

مانا ئۇلارنى غايەت زور قورقۇنچ باستى؛

چۈنكى خۇدا سېنى قورشاۋغا ئالغانلارنىڭ ئۇستىخانلىرىنى پارچىلاپ چېچىۋەتتى؛

سەن ئۇلارنى خىجىللىققا قويدۇڭ؛

چۈنكى خۇدا ئۇلارنى نەزىرىدىن ساقىت قىلدى.

6 ئاھ، ئىسرائىلنىڭ نىجاتلىقى زىئوندىن چىقىپ كەلگەن بولسا ئىدى!

خۇدا ئۆز خەلقىنى ئاسارىتىدىن چىقىرىپ، ئازادلىققا ئېرىشتۈرگەن چاغدا،

ياقۇپ شادلىنىدۇ،

ئىسرائىل خۇشال بولىدۇ!