1 نەغمىچىلەرنىڭ بېشىغا تاپشۇرۇلۇپ، نەيلەر بىلەن ئوقۇلسۇن دەپ، داۋۇت يازغان كۈي: ــ

مېنىڭ سۆزلىرىمگە قۇلاق سالغايسەن، ئى پەرۋەردىگار،

مېنىڭ ئاھلىرىمغا كۆڭۈل بۆلگەيسەن.

2 كۆتۈرگەن پەريادلىرىمنى ئاڭلا، مېنىڭ پادىشاھىم، مېنىڭ خۇدايىم،

چۈنكى ساڭىلا دۇئا قىلىمەن.

3 ئى پەرۋەردىگار، سەھەردە سەن ئاۋازىمنى ئاڭلايسەن؛

مەن سەھەردە ئۆزۈمنى ساڭا قارىتىمەن،

يۇقىرىغا كۆز تىكىمەن.□«ئى پەرۋەردىگار، سەھەردە سەن ئاۋازىمنى ئاڭلايسەن؛...» ــ «سەھەردە» دېگەن سۆزگە قاراپ بەزى ئالىملار 3-، 4- ھەم 5-كۈيلەر، داۋۇتنىڭ ئابشالومدىن قېچىش جەريانىدىكى ئۈچ كۈن ئىچىدىكى دۇئالىرى، دەپ قارايدۇ (33-كۈيدە «كەچ» ھەم «سەھەر» بار، 4-دە بولسا «كەچ»، 5-دە «سەھەر» بار).

4 چۈنكى سەن رەزىللىكتىن ھۇزۇر ئالغۇچى ئىلاھ ئەمەسدۇرسەن؛

يامانلىق ھەرگىز سەن بىلەن بىللە تۇرمايدۇ.

5 پوچى-تەكەببۇرلار كۆزۈڭ ئالدىدا تۇرالمايدۇ؛

قەبىھلىك قىلغۇچىلارنىڭ ھەممىسى ساڭا يىرگىنچلىكتۇر.

6 يالغان سۆزلىگۈچىلەرنىڭ ھەممىسىنى ھالاك قىلىسەن؛

پەرۋەردىگار قانخور، ئالدامچى كىشىلەرگە نەپرەت قىلۇر.

7 بىراق مەن بولسام، مېھرى-شەپقىتىڭنىڭ كەڭرىچىلىكىدىن ئۆيۈڭگە كىرىمەن؛

ساڭا بولغان ئەيمىنىشتىن مۇقەددەس ئىبادەتخاناڭغا قاراپ سەجدە قىلىمەن؛

8 مېنى ئۆچ كۆرگەنلەر تۈپەيلىدىن ئۆز ھەققانىيلىقىڭ بىلەن مېنى يېتەكلىگەيسەن، ئى پەرۋەردىگار؛

يولۇڭنى ئالدىمدا تۈز قىلغىن.

9 چۈنكى ئۇلارنىڭ ئاغزىدا ھېچقانداق سەمىمىيلىك يوقتۇر؛

ئۇلارنىڭ ئىچكى دۇنياسى بولسا پاسىقلىقتۇر،

ئۇلارنىڭ گاللىرى ئېچىلغان قەبرىدەك سېسىقتۇر،

ئۇلار تىلى بىلەن خۇشامەت قىلىۋاتىدۇ.■زەب. 12‏:2-3؛ 36‏:1-3؛ 52‏:2؛ 62‏:4؛ رىم. 3‏:13

10 ئۇلارنىڭ گۇناھىنى بېكىتكەيسەن، ئى خۇدا؛

ئۇلار ئۆز پىلانلىرى بىلەن ئۆزلىرى موللاق ئاتسۇن؛

ئۇلارنى ئۆزلىرىنىڭ نۇرغۇنلىغان ئىتائەتسىزلىكلىرى بىلەن ھەيدەپ چىقارغايسەن؛

چۈنكى ئۇلار ساڭا ئاسىيلىق قىلدى.■زەب. 7‏:14-15؛ 9‏:15-16؛ 35‏:7-8؛ 59‏:12

11 شۇنداق قىلغاندا ساڭا تايانغانلارنىڭ ھەممىسى شادلىنىدۇ؛

ئۇلار مەڭگۈ شادلىق بىلەن تەنتەنە قىلىدۇ؛

سەن ئۇلارنى قوغدايسەن؛

سېنىڭ نامىڭنى سۆيگەنلەر سېنىڭدىن يايرايدۇ.

12 چۈنكى سەن، ئى پەرۋەردىگار، ھەققانىي ئادەمگە بەخت ئاتا قىلىسەن؛

ئۇنى شاپائىتىڭ بىلەن قالقان كەبى ئورايسەن.