1 داۋۇت يازغان كۈي: ــ

مەن ئۈچۈن ھۆكۈم چىقارغايسەن، ئى پەرۋەردىگار؛

چۈنكى مەن ئۆز دۇرۇسلۇقۇمدا تۇرۇپ ماڭدىم؛

مەن پەرۋەردىگارغا تايىنىپ كەلگەنمەن؛

مەن تېيىلىپ كەتمەيمەن.□«مەن پەرۋەردىگارغا تايىنىپ كەلگەنمەن؛ مەن تېيىلىپ كەتمەيمەن» ــ يەنە بىرخىل تەرجىمىسى «مەن ھېچ تەۋرەنمەس پەرۋەردىگارغا تايىنىپ كەلدىم».  ■زەب. 7‏:8

2 مېنى سىناپ باققايسەن، ئى پەرۋەردىگار، مېنى تەكشۈرۈپ باققىن؛

ۋىجدانىمنى، قەلبىمنى تاۋلىغايسەن؛□«ۋىجدانىم» ــ ياكى «نىيەتلىرىم». بۇ سۆز ئىبرانىي تىلىدا «بۆرەكلەر» دېگەن بىلەن ئىپادىلىنىدۇ.

3 چۈنكى ئۆزگەرمەس مۇھەببىتىڭنى كۆز ئالدىمدا تۇتقانمەن؛

مەن ھەقىقىتىڭنى ئۆزۈمگە يېتەكچى قىلىپ ماڭدىممەن.

4 مەن يالغانچىلار بىلەن ھەمداستىخان ئولتۇرمىدىم؛

ساختىپەزلەرگە ھەمراھ بولۇشقا كىرمەيمەن.■ئايۇپ 31‏:5؛ زەب. 1‏:1

5 يامانلىق قىلغۇچىلار جامائىتىدىن يىرگىنىمەن؛

رەزىللەر بىلەنمۇ ئولتۇرمايمەن.

6 قوللىرىمنى گۇناھسىزلىقتا يۇيىمەن؛

شۇندا، قۇربانگاھىڭنى ئايلىنىپ يۈرەلەيمەن.

7 ۋە ھەم تەشەككۈرلەرنى ئاڭلىتىمەن؛

بارلىق كارامەتلىرىڭنى جاكارلايمەن.

8 ئى پەرۋەردىگار، ماكانىڭ بولغان ئۆينى،

شان-شەرىپىڭ تۇرغان جاينى سۆيۈپ كەلدىم؛

9 جېنىمنى گۇناھكارلار بىلەن،

ھاياتىمنى قانخورلار بىلەن بىللە ئېلىپ كەتمىگەيسەن؛

10 ئۇلارنىڭ قولىدا سۇيىقەستلەر باردۇر،

ئوڭ قولى پارىلەرگە تولدى.

11 مەن بولسام، دۇرۇسلۇقۇمدا مېڭىپ يۈرىۋېرىمەن؛

مېنى ھۆرلۈككە چىقىرىپ قۇتقۇزغايسەن،

ماڭا مېھىر-شەپقەت كۆرسەتكەيسەن.□«مېنى ھۆرلۈككە چىقىرىپ قۇتقۇزغايسەن» ــ مۇشۇ «ھۆرلۈككە چىقىرىش» گۇناھنىڭ ئاسارىتىدىن قۇتقۇزۇشنى كۆرسىتىدۇ.

12 پۇتۇم بولسا تۈپتۈز جايدا تۇرىدۇ؛

جامائەتلەر ئارىسىدا تۇرۇپ پەرۋەردىگارغا تەشەككۈر-مەدھىيىلەر قايتۇرىمەن.