1 نەغمىچىلەرنىڭ بېشىغا تاپشۇرۇلۇپ ئوقۇلسۇن دەپ، داۋۇت يازغان كۈي: ــ

كۈلپەتلىك كۈندە پەرۋەردىگار ساڭا ئىجابەت قىلغاي!

ياقۇپنىڭ خۇداسىنىڭ نامى سېنى ئېگىزدە ئامان ساقلىغاي!□«ياقۇپنىڭ خۇداسىنىڭ نامى سېنى ئېگىزدە ئامان ساقلىغاي!» ــ «ياقۇپنىڭ خۇداسى» دېگەن مۇشۇ ئىبارىدە «ياقۇپ» ھەم ھەزرىتى ياقۇپنىڭ ئۆزىنى ھەمدە ئۇنىڭدىن چىققان ئىسرائىل خەلقىنىمۇ كۆرسىتىدۇ.

2 ئۇ ئۆز مۇقەددەس جايىدىن ساڭا مەدەت ئەۋەتكەي،

زىئوندىن ساڭا كۈچ-قۇۋۋەت بەرگەي؛

3 بارلىق «ئاشلىق ھەدىيە»لىرىڭنى ياد قىلغاي،

كۆيدۈرمە قۇربانلىقىڭنى قوبۇل قىلغاي!

سېلاھ!

4 كۆڭلۈڭدىكى تەشنالىقلارنى ساڭا ئاتا قىلغاي،

كۆڭلۈڭگە پۈككەن بارلىق ئارزۇلىرىڭنى ئەمەلگە ئاشۇرغاي.

5 بىزلەر غەلىبەڭنى تەبرىكلەپ تەنتەنە قىلىمىز،

خۇدايىمىزنىڭ نامىدا تۇغلىرىمىزنى تىكلەيمىز؛

پەرۋەردىگار بارلىق تەلەپلىرىڭنى ئەمەلگە ئاشۇرغاي! ھازىر بىلدىمكى، پەرۋەردىگار ئۆزى مەسىھ قىلغىنىنى قۇتقۇزىدۇ؛

مۇقەددەس ئەرشلىرىدىن ئۇنىڭغا قۇدرەتلىك قۇتقۇزغۇچى قولىنى ئۇزارتىپ جاۋاب بېرىدۇ.

6 ھازىر بىلدىمكى، پەرۋەردىگار ئۆزى مەسىھ قىلغىنىنى قۇتقۇزىدۇ؛

مۇقەددەس ئەرشلىرىدىن ئۇنىڭغا قۇدرەتلىك قۇتقۇزغۇچى قولىنى ئۇزارتىپ جاۋاب بېرىدۇ.□«پەرۋەردىگار ئۆزى مەسىھ قىلغىنى» ــ يەنى ئىسرائىلنىڭ پادىشاھى؛ مۇشۇ يەردە داۋۇتنى كۆرسىتىدۇ. بىراق شۈبھىسىزكى، بۇ كۈي بىر بېشارەت بولۇپ، كەلگۈسىدىكى قۇتقۇزغۇچى-مەسىھنىمۇ كۆرسىتىدۇ. 2-كۈيدىكى ئىزاھاتلارنى ۋە «تەبىرلەر»نىمۇ كۆرۈڭ.

7 بەزىلەر جەڭ ھارۋىلىرىغا،

بەزىلەر ئاتلارغا تايىنىدۇ؛

بىراق بىز بولساق پەرۋەردىگار خۇدايىمىزنىڭ نامىنى ياد ئېتىمىز؛

8 ئۇلار تىزى پۈكلىنىپ يىقىلدى؛

بىراق بىز بولساق، قەددىمىزنى رۇسلاپ تىك تۇرىمىز.

9 ئى پەرۋەردىگار، پادىشاھقا غەلىبە بەرگەيسەن؛

نىدا قىلغىنىمىزدا بىزگە ئىجابەت قىلغايسەن!□«ئى پەرۋەردىگار، پادىشاھقا غەلىبە بەرگەيسەن؛ نىدا قىلغىنىمىزدا بىزگە ئىجابەت قىلغايسەن!» ــ باشقا بىرخىل تەرجىمىسى: ــ
«ئى پەرۋەردىگار، غەلبىگە ئېرىشتۈرگەيسەن!
بىز نىدا قىلغان كۈندە پادىشاھ بىزگە جاۋاب بەرگەي!»