1 نەغمىچىلەرنىڭ بېشىغا تاپشۇرۇلۇپ ئوقۇلسۇن دەپ، پەرۋەردىگارنىڭ قۇلى داۋۇت يازغان كۈي؛ پەرۋەردىگار ئۇنى بارلىق دۈشمەنلىرىدىن ھەم سائۇل پادىشاھنىڭ قولىدىن قۇتقۇزغان كۈنى، ئۇ پەرۋەردىگارغا مۇنۇ كۈينىڭ سۆزلىرىنى ئېيتتى: ــ

ئاھ، پەرۋەردىگارىم، مېنىڭ كۈچ-قۇدرىتىم،

مەن سېنى سۆيىمەن!

2 پەرۋەردىگار مېنىڭ خادا تېغىم، مېنىڭ قورغىنىم، مېنىڭ نىجاتكارىمدۇر!

مېنىڭ تەڭرىم، مېنىڭ قورام تېشىم، مەن ئۇنىڭدىن ھىمايە تاپىمەن؛

ئۇ مېنىڭ قالقىنىم، مېنىڭ قۇتقۇزغۇچى مۈڭگۈزۈم، مېنىڭ ئېگىز مۇنارىمدۇر!□«مېنىڭ قۇتقۇزغۇچى مۈڭگۈزۈم» ــ ئىبرانىي تىلىدا «نىجاتلىقىمنىڭ مۈڭگۈزى».

3 مەدھىيىلەرگە لايىق پەرۋەردىگارغا نىدا قىلىمەن،

شۇندا دۈشمەنلىرىمدىن قۇتقۇزۇلىمەن؛

4 ئۆلۈمنىڭ ئاسارەتلىرى مېنى قورشىۋالدى،

ئىخلاسسىزلارنىڭ يامراپ كېتىشى مېنى قورقىتىۋەتتى؛□«ئىخلاسسىزلارنىڭ يامراپ كېتىشى مېنى قورقىتىۋەتتى» ــ ئىبرانىي تىلىدا «ئىخلاسسىزلارنىڭ قىيان-تاشقىنلىرى مېنى قورقىتىۋەتتى».

5 تەھتىسارانىڭ تانىلىرى مېنى چىرمىۋالدى،

ئۆلۈم سىرتماقلىرى ئالدىمغا كەلدى.

6 قىينالغىنىمدا مەن پەرۋەردىگارغا نىدا قىلدىم،

خۇدايىمغا پەرياد كۆتۈردۈم؛

ئۇ ئىبادەتخانىسىدىن ئاۋازىمنى ئاڭلىدى،

مېنىڭ پەريادىم ئۇنىڭ ھۇزۇرىغا كەلدى،

ئۇنىڭ قۇلىقىغا كىردى.

7 شۇ چاغ يەر-زېمىن تەۋرەپ، سىلكىنىپ كەتتى،

تاغلارنىڭ ئۇللىرى دەھشەتلىك تەۋرەندى، سىلكىنىپ كەتتى؛

چۈنكى ئۇ غەزەپلەندى.□«...تاغلارنىڭ ئۇللىرى دەھشەتلىك تەۋرەندى، سىلكىنىپ كەتتى؛ چۈنكى ئۇ غەزەپلەندى...» ــ بۇ كۈيدىكى سۆزلەر تەدرىجىي ھالدا داۋۇتنىڭ ئۆزىنىڭ ئەھۋالىدىن ئايرىلىپ، داۋۇتنىڭ بولغۇسى ئەۋلادى مەسىھنىڭ ھاياتىغا ئۆتىدۇ. كۈيدە مەسىھنىڭ ھاياتى، جاپا-مۇشەققەت تارتىدىغانلىقى، ئاخىرىدا ئۇنىڭ شان-شەرەپكە ئېرىشىدىغانلىقى ۋە پۈتكۈل ئالەمگە پادىشاھ بولىدىغانلىقى كۆرسىتىلىدۇ. دېمەك، بۇ كۈينىڭ ئۆزى ئۇلۇغ بىر بېشارەتتۇر.

8 ئۇنىڭ دىمىغىدىن ئىس ئۆرلەپ تۇراتتى،

ئاغزىدىن چىققان ئوت ھەممىسىنى يۇتۇۋەتتى؛

ئۇنىڭدىن كۆمۈر چوغلىرى چىقتى؛□«ئۇنىڭدىن كۆمۈر چوغلىرى چىقتى» ــ ياكى «ئۇنىڭدىن كۆمۈر چوغلىرى تۇتاشتۇرۇلدى».

9 ئۇ ئاسمانلارنى تەزىم قىلدۇرۇپ چۈشتى،

پۇتى ئاستى تۇم قاراڭغۇلۇق ئىدى.

10 بىر كېرۇبنى مىنىپ پەرۋاز قىلدى،

شامالنىڭ قاناتلىرىدا غۇيۇلداپ ئۇچۇپ كەلدى.□«بىر كېرۇبنى مىنىپ پەرۋاز قىلدى» ــ «كېرۇب» ئىنتايىن كۈچلۈك بىرخىل قاناتلىق پەرىشتە. «تەبىرلەر»نى كۆرۈڭ.

11 ئۇ قاراڭغۇلۇقنى ئۆزىنىڭ يوشۇرۇنىدىغان جايى قىلدى،

سۇلارنىڭ قاراڭغۇسىنى،

ئاسمانلارنىڭ قويۇق بۇلۇتلىرىنى،

ئۆز ئەتراپىدا چېدىرى قىلدى.

12 ئۇنىڭ ئالدىدىكى يورۇقلۇقتىن،

قويۇق بۇلۇتلار، مۆلدۈر، ئوتلۇق چوغلار چىقىپ ئۆتتى؛

13 پەرۋەردىگار ئاسماندا گۈلدۈرلىدى؛

ھەممىدىن ئالىي بولغۇچى ئاۋازىنى ياڭراتتى،

مۆلدۈر ۋە ئوتلۇق چوغلار بىلەن.

14 بەرھەق، ئۇ ئوقلىرىنى ئېتىپ، دۈشمەنلىرىمنى تارقىتىۋەتتى؛

چاقماقلارنى چاقتۇرۇپ، ئۇلارنى قىيقاس-چۇقانغا سالدى؛□«ئۇ ئوقلىرىنى ئېتىپ، دۈشمەنلىرىمنى تارقىتىۋەتتى» ــ ئىبرانىي تىلىدا «ئۇ ئوقلىرىنى ئېتىپ، ئۇلارنى تارقىتىۋەتتى». 17-ئايەتنى كۆرۈڭ.

15 شۇنىڭ بىلەن دېڭىزلارنىڭ تەكتى كۆرۈنۈپ قالدى،

ئالەمنىڭ ئۇللىرى ئاشكارىلاندى،

تەنبىھىڭ بىلەن،

دىمىغىڭدىن چىققان نەپەسنىڭ زەربىسى بىلەن، ئى پەرۋەردىگار.

16 ئۇ يۇقىرىدىن قولىنى ئۇزىتىپ، مېنى تۇتتى؛

مېنى ئۇلۇغ سۇلاردىن تارتىپ ئالدى.

17 ئۇ مېنى كۈچلۈك دۈشمىنىمدىن،

ھەم ماڭا ئۆچمەنلىك قىلغۇچىلاردىن قۇتقۇزدى؛

چۈنكى ئۇلار مەندىن كۈچلۈك ئىدى.

18 كۈلپەتكە ئۇچرىغان كۈنۈمدە، ئۇلار ماڭا قارشى ھۇجۇمغا ئۆتتى؛

بىراق پەرۋەردىگار مېنىڭ تايانچىم ئىدى.

19 ئۇ مېنى كەڭرى-ئازادە بىر جايغا ئېلىپ چىقاردى؛

ئۇ مېنى قۇتقۇزدى، چۈنكى ئۇ مەندىن خۇرسەن بولدى.

20 پەرۋەردىگار ھەققانىيلىقىمغا قاراپ ماڭا ئىلتىپات كۆرسەتتى؛

قولۇمنىڭ ھالاللىقىنى ئۇ ماڭا قايتۇردى؛

21 چۈنكى پەرۋەردىگارنىڭ يوللىرىنى تۇتۇپ كەلدىم؛

رەزىللىك قىلىپ خۇدايىمدىن ئايرىلىپ كەتمىدىم؛

22 چۈنكى ئۇنىڭ بارلىق ھۆكۈملىرى ئالدىمدىدۇر؛

مەن ئۇنىڭ بەلگىلىمىلىرىنى ئۆزۈمدىن نېرى قىلمىدىم؛

23 مەن ئۇنىڭ بىلەن غۇبارسىز يۈردۇم،

ئۆزۈمنى گۇناھتىن نېرى قىلدىم؛

24 شۇنىڭ ئۈچۈن پەرۋەردىگار ھەققانىيلىقىمغا قاراپ،

كۆز ئالدىدىكى قولۇمنىڭ ھالاللىقىغا قاراپ، قىلغانلىرىمنى قايتۇردى.□«پەرۋەردىگار ھەققانىيلىقىمغا قاراپ، كۆز ئالدىدىكى قولۇمنىڭ ھالاللىقىغا قاراپ، قىلغانلىرىمنى قايتۇردى» ــ شۈبھىسىزكى، مۇشۇ 19-24-ئايەتلەردە مەسىھنىڭ پاك-غۇبارسىزلىقى، گۇناھسىزلىقى بېشارەت قىلىنىدۇ. داۋۇت ئۆزى توغرۇلۇق بۇ سۆزلەرنى ھەرگىز دېيەلمەيتتى. مەسىلەن، 25-كۈي، 7-ئايەت ۋە 51-كۈينى كۆرۈڭ.

25 ۋاپادار-مېھرىبانلارغا ئۆزۈڭنى ۋاپادار-مېھرىبان كۆرسىتىسەن؛

غۇبارسىزلارغا ئۆزۈڭنى غۇبارسىز كۆرسىتىسەن؛

26 ساپ دىللىقلارغا ئۆزۈڭنى ساپ دىللىق كۆرسىتىسەن؛

تەتۈرلەرگە ئۆزۈڭنى تەتۈر كۆرسىتىسەن؛

27 چۈنكى ئاجىز مۆمىن خەلقنى قۇتقۇزغۇچى ئۆزۈڭدۇرسەن؛

بىراق تەكەببۇر كۆزلەرنى شەرمەندە قىلىسەن؛

28 چىرىغىمنى جۇلالىق قىلغان سەندۇرسەن؛

پەرۋەردىگار خۇدايىم مېنى باسقان قاراڭغۇلۇقنى نۇرلاندۇرىدۇ؛

29 چۈنكى سەن ئارقىلىق دۈشمەن قوشۇنى ئارىسىدىن يۈگۈرۈپ ئۆتتۈم؛

سەن خۇدايىم ئارقىلىق مەن سېپىلدىن ئاتلاپ ئۆتتۈم.□«سەن ئارقىلىق دۈشمەن قوشۇنى ئارىسىدىن يۈگۈرۈپ ئۆتتۈم» ــ «يۈگۈرۈپ ئۆتتۈم» دېگەن سۆزلەر «بۆسۈپ ئۆتتۈم» دېگەن مەنىنى ئۆز ئىچىگە ئالىدۇ.

30 تەڭرىم ــ ئۇنىڭ يولى مۇكەممەلدۇر؛

پەرۋەردىگارنىڭ سۆزى سىناپ ئىسپاتلانغاندۇر؛

ئۇ ئۆزىگە تايانغانلارنىڭ ھەممىسىگە قالقاندۇر.

31 چۈنكى پەرۋەردىگاردىن باشقا يەنە كىم ئىلاھتۇر؟

بىزنىڭ خۇدايىمىزدىن باشقا كىممۇ قورام تاشتۇر؟

32 يەنى بېلىمنى كۈچ-قۇۋۋەت بىلەن ئورىغۇچى تەڭرى،

يولۇمنى تۈپتۈز، مۇكەممەل قىلغۇچى تەڭرىدۇر؛

33 ئۇ مېنىڭ پۇتلىرىمنى كېيىكنىڭكىدەك ئۇچقۇر قىلىدۇ،

شۇنىڭ بىلەن مېنى ئېگىز جايلىرىمدا تۇرغۇزىدۇ؛

34 قوللىرىمنى ئۇرۇش قىلىشقا ئۆگىتىدۇ،

شۇڭلاشقا بىلەكلىرىم مىس كاماننى كېرەلەيدۇ؛

35 سەن ماڭا نىجاتلىقىڭ بولغان قالقاننى ئاتا قىلدىڭ،

نېنىڭ ئوڭ قولۇڭ مېنى يۆلىدى؛

سېنىڭ مۇلايىم كەمتەرلىكىڭ مېنى ئۇلۇغ قىلدى.

36 سەن قەدەملىرىم ئاستىدىكى جاينى كەڭ قىلدىڭ،

مېنىڭ پۇتلىرىم تېيىلىپ كەتمىدى.

37 مەن دۈشمەنلىرىمنى قوغلاپ يەتتىم؛

ئۇلار ھالاك بولمىغۇچە ھېچ يانمىدىم.

38 قايتىدىن ئورنىدىن تۇرالماس قىلىپ ئۇلارنى يانجىۋەتتىم،

ئۇلار پۇتلىرىم ئاستىدا يىقىلدى.

39 سەن جەڭ قىلىشقا كۈچ بىلەن بېلىمنى باغلىدىڭ؛

سەن ماڭا ھۇجۇم قىلغانلارنى پۇتۇم ئاستىدا ئېگىلدۈردۈڭ؛

40 دۈشمەنلىرىمنى كۆز ئالدىمدا ئارقىسىغا ياندۇرۇپ قاچقۇزدۇڭ،

شۇنىڭ بىلەن ماڭا ئۆچمەنلەرنى يوقاتتىم.

41 ئۇلار پەرياد كۆتۈردى، بىراق قۇتقۇزىدىغان ھېچكىم يوق ئىدى؛

ھەتتا پەرۋەردىگارغا نىدا قىلدى، ئۇمۇ ئۇلارغا جاۋاب بەرمىدى.

42 مەن ئۇلارغا سوققا بېرىپ، شامال ئۇچۇرغان توپىدەك قىلىۋەتتىم؛

كوچىدىكى پاتقاقتەك، ئۇلارنى تۆكۈۋەتتىم.

43 سەن مېنى خەلقنىڭ نىزالىرىدىن قۇتقۇزغانسەن؛

سەن مېنى ئەللەرنىڭ بېشى قىلغانسەن؛

ماڭا يات بولغان بىر خەلق خىزمىتىمدە بولماقتا.□«سەن مېنى خەلقنىڭ نىزالىرىدىن قۇتقۇزغانسەن» ــ شۈبھىسىزكى، مۇشۇ بېشارەتتە ئېيتىلغان «خەلق» داۋۇت پادىشاھنىڭ ئۆز قوۋمى بولغان يەھۇدىي خەلقىنى كۆرسىتىدۇ.

44 سۆزۈمنى ئاڭلاپلا ئۇلار ماڭا ئىتائەت قىلىدۇ؛

يات ئەلدىكىلەر ماڭا بىچارىلەرچە تەسلىم بولىدۇ؛

45 يات ئەلدىكىلەر چۈشكۈنلىشىپ كېتىدۇ؛

ئۇلار ئۆز ئىستىھكاملىرىدىن تىترىگەن ھالدا چىقىپ كېلىدۇ؛

46 پەرۋەردىگار ھاياتتۇر!

مېنىڭ قورام تېشىم مۇبارەكلەنسۇن!

نىجاتلىقىم بولغان خۇدا ھەممىدىن ئالىيدۇر، دەپ مەدھىيىلەنسۇن!

47 ئۇ، مەن ئۈچۈن تولۇق قىساس ئالغۇچى تەڭرى،

خەلقلەرنى ماڭا بويسۇندۇرغان خۇدادۇر؛

48 ئۇ مېنى دۈشمەنلىرىمدىن قۇتقۇزغان؛

بەرھەق، سەن مېنى ماڭا ھۇجۇم قىلغانلاردىن يۇقىرى كۆتۈردۈڭ؛

زوراۋان ئادەمدىن سەن مېنى قۇتۇلدۇردۇڭ.

49 شۇنىڭ ئۈچۈن مەن ئەللەر ئارىسىدا ساڭا رەھمەت ئېيتىمەن، ئى پەرۋەردىگار؛

نامىڭنى ئۇلۇغلاپ كۈيلەرنى ئېيتىمەن؛

50 پەرۋەردىگار ئۆزى تىكلىگەن پادىشاھقا زور نۇسرەتلەرنى بېغىشلايدۇ؛

ئۆزى مەسىھ قىلغىنىغا،

يەنى داۋۇتقا ھەم ئۇنىڭ نەسلىگە مەڭگۈگە ئۆزگەرمەس مۇھەببىتىنى كۆرسىتىدۇ.□«ئۆزى مەسىھ قىلغىنىغا، *يەنى داۋۇتقا ھەم ئۇنىڭ نەسلىگە...» ــ «مەسىھ قىلغىنى» يەنى «مەسىھ» توغرۇلۇق 2-كۈيدىكى ئىزاھاتلارنى كۆرۈڭ.