1 بالائام بالاققا: —

سىلى مۇشۇ يەرگە ماڭا يەتتە قۇربانگاھ ياسىتىپ بەرسىلە، مۇشۇ يەرگە يەنە يەتتە بۇقا بىلەن يەتتە قوشقارمۇ ھازىرلاپ بەرسىلە، — دېدى. 2 بالاق بالائامنىڭ دېگىنىدەك قىلىپ بەردى؛ بالاق بىلەن بالائام ئىككىسى ھەربىر قۇربانگاھقا قۇربانلىق قىلىشقا بىردىن بۇقا بىلەن بىردىن قوشقار سۇندى. 3 بالائام بالاققا: —

سىلى ئۆز كۆيدۈرمە قۇربانلىقلىرىنىڭ يېنىدا تۇرسىلا، مەن ئالدىغا بارىمەن، پەرۋەردىگار مېنىڭ بىلەن كۆرۈشۈشكە كېلەمدىكىن؟ ئۇ ماڭا نېمە دەپ كۆرسەتمە بەرسە، مەن ئۆزلىرىگە شۇنى دەپ بېرىمەن، — دېدى ۋە بىر دۆڭگە چىقتى.

4 خۇدا بالائام بىلەن كۆرۈشتى؛ بالائام خۇداغا: —

مەن يەتتە قۇربانگاھ ھازىرلاتتىم، ھەربىر قۇربانگاھقا قۇربانلىق سۈپىتىدە بىردىن بۇقا بىلەن بىردىن قوشقار سۇندۇم، — دېدى. 5 پەرۋەردىگار بالائامنىڭ ئاغزىغا بىر سۆزنى سېلىپ: — بالاقنىڭ يېنىغا قايتىپ بېرىپ ئۇنىڭغا مۇنداق، مۇنداق دېگىن، — دېدى. 6 شۇنىڭ بىلەن ئۇ بالاقنىڭ يېنىغا قايتىپ باردى. مانا، ئۇ ۋە موئابنىڭ بارلىق ئەمىرلىرى ئۇنىڭ كۆيدۈرمە قۇربانلىقىنىڭ يېنىدا تۇراتتى.

7 بالائام كالام سۆزىنى ئاغزىغا ئېلىپ مۇنداق دېدى: —

بالاق مېنى ئارام دېگەن يۇرتتىن،

موئاب شاھى بالاق مېنى مەشرىق تاغلىرىدىن ئېلىپ كېلىپ،

مۇنداق دېدى: —

كەل، مېنىڭ ئۈچۈن ياقۇپنى قارغىغىن.

كەل، ئىسرائىلنى راسا بىر سۆكۈپ ئەيىبلىگىن.□«كالام سۆزى» ــ خۇدا ئۆگەتكەن سۆز (5-ئايەتنى كۆرۈڭ). گەرچە بالائام ئەسكى ئادەم، ھەتتا «ساختا پەيغەمبەر» ۋە پالچى بولغىنى بىلەن، خۇدا مۇشۇ يەردە ئۇنىڭ ئاغزى ئارقىلىق ئىسرائىلغا بولغان مېھىر-شەپقىتىنى ئېنىق كۆرسىتىدۇ.

8 تەڭرى ئۆزى قارغىمىغان بىراۋنى مەن قانداق قارغاي؟

پەرۋەردىگار ئۆزى سۆكۈپ ئەيىبلىمىگەن بىراۋنى مەن قانداق سۆكۈپ ئەيىبلەي؟

9 مەن قورام تاشلارنىڭ چوققىلىرىدا تۇرۇپ ئۇنى كۆرمەكتىمەن،

دۆڭلەردە تۇرۇپ ئۇنىڭغا نەزەر سالماقتىمەن؛

مانا، ئۇلار يەككە ياشايدىغان بىر قوۋم،

ئۇلار باشقا قوۋملارنىڭ قاتارىدا سانالمايدۇ.■قان. 33‏:28

10 ياقۇپنىڭ توپىلىرىنى كىم ھېسابلاپ چىقالايدۇ؟

ھەتتا ئىسرائىلنىڭ تۆتتىن بىرىنىمۇ كىم ساناپ چىقالايدۇ؟

مېنىڭ جېنىم ھەققانىينىڭ ئۆلۈمىدەك ئۆلسۇن،

مېنىڭ ئاخىرىم ئۇنىڭكىدەك بولغاي!□«ياقۇپنىڭ توپىلىرىنى كىم ھېسابلاپ چىقالايدۇ؟» ــ مەنىسى بەلكىم «تولىلىقىدا توپىدەك بولغان ياقۇپنى كىم ھېسابلاپ چىقالايدۇ؟» ــ دېگەندەك بولۇشى كېرەك.

11 بالاق بالائامغا قاراپ: —

سەن ماڭا نېمە قىلىۋاتىسەن؟! مەن سېنى دۈشمەنلىرىمنى قارغاپ بېرىشكە چاقىرىتقان تۇرسام، مانا سەن ئەكسىچە پۈتۈنلەي ئۇلارغا ئامەت تىلىدىڭ! — دېدى.

12 — پەرۋەردىگارنىڭ ئاغزىمغا سالغىنىنى يەتكۈزۈشكە كۆڭۈل قويمىسام بولامتى؟ — دەپ جاۋاپ بەردى بالائام.

13 بالاق بالائامغا: — مېنىڭ بىلەن بىللە باشقا بىر يەرگە بارسىلا، ئۇلارنى شۇ يەردىن كۆرەلەيلا؛ بىراق ئۇلارنىڭ ھەممىسىنى ئەمەس، ئۇلارنىڭ چېگرىدىكى بىر قىسمىنىلا كۆرەلەيلا؛ سىلى شۇ يەردە تۇرۇپ ئۇلارنى مەن ئۈچۈن قارغاپ بەرسىلە، — دېدى.

14 شۇنىڭ بىلەن بالاق بالائامنى «زوفىمنىڭ دالاسى»غا، پىسگاھ تېغىنىڭ چوققىسىغا باشلاپ بېرىپ، شۇ يەردە يەتتە قۇربانگاھ سالدۇرۇپ، ھەربىر قۇربانگاھقا قۇربانلىق سۈپىتىدە بىردىن بۇقا، بىردىن قوشقار سۇندى.□«زوفىمنىڭ دالاسى» ــ ياكى «كۆزەتچىلەرنىڭ دالاسى». 15 بالائام بالاققا: —

سىلى مۇشۇ يەردە ئۆزلىرىنىڭ كۆيدۈرمە قۇربانلىقلىرىنىڭ يېنىدا تۇرۇپ تۇرسىلا، مەن ئاۋۇ ياققا بېرىپ كۆرۈشۈپ كېلەي، — دېدى.□«كۆرۈشۈپ كېلەي» ــ پەرۋەردىگار بىلەن كۆرۈشۈش، ئەلۋەتتە. بالائام بالاقنى خاپا قىلماسلىق ئۈچۈن، بەلكىم پەرۋەردىگارنىڭ نامىنى بىۋاسىتە تىلغا ئالمايدۇ. 16 پەرۋەردىگار بالائام بىلەن كۆرۈشۈپ، ئۇنىڭ ئاغزىغا بىر سۆزنى سېلىپ: —

سەن بالاقنىڭ يېنىغا قايتىپ ئۇنىڭغا مۇنداق، مۇنداق دېگىن، — دېدى.■چۆل. 22‏:35 17 بالائام بالاقنىڭ يېنىغا قايتىپ كەلگەندە، مانا، ئۇ ۋە موئابنىڭ بارلىق ئەمىرلىرى ئۇنىڭ كۆيدۈرمە قۇربانلىقىنىڭ يېنىدا تۇراتتى.

— پەرۋەردىگار نېمە دېدى؟ — دەپ سورىدى بالاق.

18 بالائام كالام سۆزىنى ئاغزىغا ئېلىپ مۇنداق دېدى: —

«ھەي بالاق، سەن قوپۇپ ئاڭلىغىن،

ئاھ ، زىپپورنىڭ ئوغلى، ماڭا قۇلاق سالغىن.

19 تەڭرى ئىنسان ئەمەستۇر، ئۇ يالغان ئېيتمايدۇ،

ياكى ئادەم بالىسىمۇ ئەمەستۇر، ئۇ پۇشايمان قىلمايدۇ.

ئۇ دېگەنىكەن، ئىشقا ئاشۇرماي قالامدۇ؟

ئۇ سۆز قىلغانىكەن، ۋۇجۇدقا چىقارماي قالامدۇ؟■1سام. 15‏:29؛ ياق. 1‏:17

20 مانا، ماڭا «بەرىكەتلە» دەپ تاپشۇرۇلدى،

ئۇ بەرىكەتلىگەنىكەن، بۇنى مەن ياندۇرالمايمەن.

21 ئۇ ياقۇپتا ھېچ گۇناھ كۆرمىگەن،

ئىسرائىلدا ناھەقلىقنى ئۇچراتمىغان.

خۇداسى پەرۋەردىگار ئۇنىڭ بىلەن بىللە،

پادىشاھنىڭ تەنتەنە ئاۋازى ئۇنىڭ ئارىسىدىدۇر.□«ناھەقلىق» ــ ياكى «بالايئاپەت» ياكى «بالايئاپەتنىڭ سەۋەبى». «پادىشاھنىڭ تەنتەنە ئاۋازى» ــ ياكى «پادىشاھنىڭ (قارشى ئېلىنىش) تەنتەنىسى».  ■زەب. 32‏:1، 2؛ 51‏:9-10؛ يەر. 50‏:20؛ رىم. 4‏:7

22 تەڭرى ئۇنى مىسىردىن ئېلىپ چىققان؛

ئۇنىڭدا ياۋا كالىنىڭكىدەك كۈچ باردۇر.□«ئۇنىڭدا ياۋا كالىنىڭكىدەك كۈچ باردۇر» ــ ئىبرانىي تىلىدا «ئۇنىڭ ياۋا كالىنىڭ مۈڭگۈزلىرى باردۇر».  ■چۆل. 24‏:8

23 چۈنكى ياقۇپلارغا ئەپسۇن كارغا كەلمەيدۇ،

ئىسرائىللارغىمۇ پال كارغا كەلمەيدۇ.

ۋاقتى-سائىتى كەلگەندە،

ياقۇپ بىلەن ئىسرائىل توغرىسىدا: —

«تەڭرى نەقەدەر كارامەت ئىش قىلىپ بەرگەن-ھە!»

دەپ جاكارلانماي قالمايدۇ!

24 مانا، بۇ قوۋم چىشى شىردەك قوپىدۇ،

ئەركەك شىردەك قەددىنى رۇسلايدۇ؛

ئۆزى ئوۋلىغان ئوۋنى يېمىگۈچە،

ئۆلتۈرگەنلەرنىڭ قېنىنى ئىچمىگۈچە،

ھەرگىز ياتمايدۇ!».

25 بالاق بالائامغا: — بولدى، سىلى ئۇلارنى ئازراقمۇ قارغىمىسىلا، ئۇلارغا ئامەتمۇ تىلىمىسىلە! — دېدى.

26 بالائام بالاققا جاۋاب قىلىپ: — مەن سىلىگە: — «پەرۋەردىگارنىڭ ماڭا ئېيتقانلىرىنىڭ ھەممىسىگە ئەمەل قىلمىسام بولمايدۇ» دېگەن ئەمەسمىدىم؟ — دېدى.

27 بالاق بالائامغا: — كەلسىلە، مەن سىلىنى باشقا بىر يەرگە ئاپىراي، خۇدانىڭ نەزىرىدە سىلى شۇ يەردە تۇرۇپ ئۇلارنى قارغاشلىرى مۇۋاپىق تېپىلارمىكىن؟ — دېدى. 28 شۇنىڭ بىلەن بالاق بالائامنى باشلاپ، چۆل-باياۋانغا قارايدىغان پېئور تېغىنىڭ چوققىسىغا كەلدى.

29 بالائام بالاققا: — سىلى بۇ يەردە ماڭا يەتتە قۇربانگاھ سالدۇرۇپ بەرسىلە، يەتتە بۇقا بىلەن يەتتە قوشقارمۇ تەييارلاپ بەرسىلە، — دېدى. 30 بالاق بالائامنىڭ دېگىنىدەك قىلدى، ھەربىر قۇربانگاھقا بىردىن بۇقا بىلەن بىردىن قوچقار سۇندى.