1 Hili gom wathi/ jin ’ka’da is mo e moŋgam gwo is mo tani hani a’di mo ma. Hili yisa mmosu’k ki gwo kun ’kon ka ḵwa/m bwa mo. 2 Wathin ’de/ gam gwo is ki a’di mishi shwa aris to mo. Dhali wathi/ jin ’ka’da is a’di shwa jasi ton dhii/i’d mo. 3 Dhalku/ ki dhal a’di jin shwa to ki waḵ a’di jin ga/i to mo. Dhali dhalku/ ki dhal a’di jin ga/i to ki ta ashi/m bwa gom a’di jin shwaki to mo haali/ Arumgimis han a’di mo be. 4 /E ja jin midi waḵ c̱iŋkina/ gi wathiŋ kamu/ mo? A’di ta mii ibwambor tap̱am piti jin doshkina a’di mo dhali biṯ mo. Dhali a’di minu kar mmodosh mo haali/ Tap̱a mish a’di kar mmodosh kan mo be.

5 Wathin ’de/ karki’da cim ’de/ mmobola kamu/ e ki ’bor mo, ka kamu/ si’da/ kara’da tee ’baar mo ki jiny nyaḵ mo. Dhalka ris ’kwani ’baar ka ’deṯe/ ’deṯe/ mishin ka daran du eya dum buniŋ gana/ mo. 6 A’di jin karki’da cim mo tani kar a’di mmotaḵ Tap̱a mo be. A’di si’da/ jin shwaki to mo tani shwa a’di mo mmotaḵ Tap̱a mo be, haali/ a’di ’borki’da Arumgimis bwa i is mo, me’d a’di jin ga/ki to mo tani ga/ki a’di mo mmotaḵ Tap̱a mo dhali mmo’bora Arumgimis bwa i is mo be. 7 Wathin ’de/ ’peni bwam ana yisa di’da jin c̱a’bki’d gom is piti mo. Dhali jaŋ kamu/ ’peni bwam ana yisa wuki’d gom is piti mo yisa. 8 Waḵki/ ana ’kona ki e mo tani ana ’kokina ki e gom Tap̱a mo. Dhali waḵki/ ana wuna mo tani ana wukina e Tap̱a mo. Dhali wakan mo, waḵki/ ana ’kona ki e mo walla waḵki/ ana wukina mo tani ana tana ku gi Tap̱a mo be. 9 Haali/ gom ’pemen yan kan mo tani aḴrisṯẖos wuki’d mo dhali diki’d ki e mo doḵ/e ki a’di midi ta Tap̱a gi uni kun wukin mo dhali gi uni kun ’kon ki e mo be.

10 Atinta iwaḵkina /e akam pini kan mo? Walla /e si’da/ atinta shi/kina /e akam pini mo kan? Haali/ ana ’baar mo mina doshi bwambor ma Ḵursi ma Arumgimis jin dwallu gwo mo be. 11 Haali/ a’di ’kwarkunu mo ki:

13 Dhali wakan dhalkina doḵ/e ki waḵa waḵ ka rem ’kup̱ mo. Hili yisa si’da/ mmogam gwo me’d ki sule/ sule/ mo mmokar to jin golo’da gol mo walla mmonona kan ki bway mo. 14 Aha/ misha dhali lalu sho’k ki gwo e Tap̱a Yesus Ḵrisṯẖos ki toŋ kamu/ jin ga/u ki is piti yisa di’da. Hili a’di ta to jin ga/u gom macin tiya, uni kun kulum a’di ibwa ki a’di ta to jin ga/u mo be. 15 Waḵka kam pini raḵu mo goma shwantom pini mo tani /e doḵ/e baṯẖi mo/en yisa. Dhalku/ ki dhal tonṯe/ jin shwana /e ki c̱i a’din ṯal ’deŋ kamu/ jin wun ma Ḵrisṯẖos sho’k mmo’ce’d mo. 16 Wakan dhalku/ ki dhal to jin ’boro’d gom /e mo tani soru ki a’di ta tonthus mo. 17 Haali/ Bampa/ ma Arumgimis diki ta ’pemen gwo gom tonṯe/ mo dhali tomp̱i mo ’te/. Hili gom mo ma ḵar/e mo dhali mo ma ḵu’th is mo dhali moŋ’kuny bwa e Shi/in Dheleladhelel mo be. 18 A’di jin miiki to wakan goma Ḵrisṯẖos mo tani mish ma Arumgimis bu’th mo dhali ta a’diŋ gana/ jin maŋa ’kwani mo be. 19 Haali/ a’di gi wakan mo tani dhalki ana ura to jin midi dhuwa dhu ki mo ma ḵu’th is mo dhali mmoṯel sho’k ka gam ’kup̱ mo. 20 Dhalku/ ki dhal gwon tonṯe/ ki ’ce’da ṯu’c ma Arumgimis sho’k mo. Aris to ’baar mo ka jiŋ gana/ dhelelkin mo. Hili a’di ta to jin thamu mii mo gom macin tiya kun dhu tiya mmoṯa’k mo gom to jin shwakina uni mo be. 21 A’di ta miim ’borga/ mmo’koki ’ka shum walla mmop̱i yimana mura’th jin ḵa/u ki ŋah ŋah mo walla mmo’koki mii ton tiya ki suny suny kun mini dhala kan mmokol mo. 22 Moŋgam gwo is jin takina /e mo tani kari a’di ki is pini um ka Arumgimis mo ma. Bwam ’boro’d gom wathi/ jin diki cu gwon dwall ki is piti mo gom to jin gwona a’di ’kus mo. 23 Dhali hili a’di jin shi/i bwa ’kup̱ mo tani waḵu mo be, waḵki/ a’di shwaki to mo haali/ a’di yisa mii’d me’d mii ’peni mo gi gamu gwo is yisa. Haali/ aris to gun miinu ki dar gi moŋgam gwo is ki suny suny mo tani ta miinthus mo be.

<- RUUMIYA 13RUUMIYA 15 ->