1 Dhali yan’ko’d aha/ p̱arkina momis jin ta jin this e mo dhali mony’cesh jin ta jin this mo. Haali/ momis jin ta jin ṯwa/a/ mo dhali mony’cesh jin ta jin ṯwa/a/ mo tani uni pekin mo be, dhali ḵumma/ yi’de/ yisa di’d doḵ/e. 2 Dhali aha/ p̱arkina ’peŋkuman bampa/ jin ḵogu e mo, a’di jin ta Pa Urushaliim jin ta jin this mo, mmothulu/ ka ’cesh ’peni momis ’peni Arumgimis mo, mmothosonkunu a’di is mo me’d nyaranyaŋa’b jin nyoŋkunu is ki to mo goma kaṯẖim piti mo be. 3 Dhali aha/ ciḵkina dhan ’twa/ ’pena ḵursi ma maliḵ mo mmo/o gwo mo ki: Hili mo mo ma, monyc̱a’b ma Arumgimis diki’d nyaḵki ’kwani mo. A’di midi nyaḵ c̱a’b ki uni mo dhali uni mini ta ’kwanim piti mo, dhali Arumgimis ki is piti, a’di midi nyaḵ di e uni mo dhali a’di midi ta uni Arumgimis buni mo. 4 Dhali a’di midi shumuṯ jabu’th ’pena ris em buni ka ’deṯe/ ’deṯe/ mo, dhali wuŋ kamu/ midi doḵ/e diya, walla kony jabudha kamu/ minu kowa, walla cuuwaŋ kamu/ minu cuuwa, walla isa nyora kamu/ midi diya? haali/ aris ton dhamo/ gwansan mo tani uni pekin mo be.

5 Dhali a’di jin c̱a’bki’da p̱owa ḵursi mo tani oki gwo mo ki: Hili mo mo ma, aha/ miikina ris to mmota kun this mo. A’di si’da/ ki o gwo mo ki: ’Kwari a’di yansan mo ma, haali/ gwo gwansan mo tani uni ta ku isiŋ gana/ mo dhali kuŋ gana/ mo. 6 Dhali a’di ki o aha/ gwo mo ki: A’di miikunu mo. Aha/ tana ji ma Muŋ’kup̱ mo dhali jiŋ ’Ko’d mo, aha/ tana ji gi mo jin ṯelkunu ’pen mo dhali mo jin midi di ’kup̱ mo be. E uni kun butha yi’de/ gom miiŋḵar/e mo tani aha/ mina c̱i uni yi’de/ ki dar gi yol mo ’peni yi’de/ jin kashkina e ki kash mo jin ta mondiki/e mo be. 7 A’di jin p̱iki mii e mo tani a’di midi ta gi mal yansan mo, dhali aha/ mina ta Arumgimis piti mo dhali a’di midi ta aha/ ya/um mo. 8 Hili gom uni gun tana shi/iny jwa mo dhali uni gun dar gi moŋgam gwo is mo, dhali uni gun wali gwo sor mo, dhali uni gun ta iman’kosha mee mo, dhali uni gun ta imanha’k ’pen c̱eŋ gwas mo, dhali uni gun ta imanmii mii ma rum mo, dhali imanluŋ tomp̱inycon mo, dhali aris uni gun tana ṯor mo tani tom buni di’d jin midi ’bag uni e mo eya al o’d mo jin purki’d ki o’d mo dhali to jin si’du mo si’da/, a’di jin ta wu jin ’kon ma p̱o/i su/ mo be.

9 Dhali yan’ko’d aman’doyu gwoŋ kamu/ ’de/ ’peni bwam uni gun ’koni pesu/ mo, a’di jin ta’d gi toŋ’kul bwa mo jin ’tu’dkunu ki mom’ba’th kun ’koni pesu/ kun woci ’kwani is she/ mo kun ta kuŋ ’ko’d mo tani p̱u’dki’d mo dhali o aha/ gwo mo ki: Yayu/ mo. Aha/ mina ṯor /e Nyaranyaŋa’b mo, a’di jin ta’da ’bom gi Ari Ḵa’bal mo. 10 Dhali e Shi/in mo tani a’di ḵalki aha/ mo eya dhan wosh jin turatur mo, dhali ṯor aha/ ’peŋkuman bampa/ jin ḵogu mo jin ta Pa Urushaliim mo, mmothulu/ ka ’cesh mo ’peni momis mo ’peni Arumgimis mo, 11 mmotakina a’di gi monyca ma Arumgimis mo, dhali dhel piti bolki wosh dhel jin ta’da aane/ e mo, mmowa e ki wosh dhel jin ta’da wasin dhela/ mo jin di’d eya tente/ jin mii’d ki wa’c wa’c mo. 12 A’di ta’d ga dhana goŋ jin turatur mo jin ’kona ’twaŋkali ’kume’d i’ce’dka su/ mo dhali iman’doyu gwo ’koni ’kume’d i’ce’dka su/ mo e ’twaŋkal piti mo, dhali e ’twaŋkal piti mo tani gway ’koni ’kume’d i’ce’dka su/ mo kun tana waḵ gi iya/ ma Israyiil mo kun c̱ikunuwa nyi’da/ nyi’da/ mo. 13 E mom’pesho’k mo tani ’twaŋkal ’koni kwara mo dhali e moŋ’ko’d gwar ma bim poros mo tani ’twaŋkal ’koni kwara mo, dhali e moŋ’ko’d gwar ma biny cam mo tani ’twaŋkal ’koni kwara mo, dhali eya bora luŋgu’b mo tani ’twaŋkal ’koni kwara mo. 14 Dhali agoŋ gi ’peŋkuman bampa/ mo tani ta’d gi moŋḵa’b kun ’koni ’kume’d i’ce’dka su/ mo, dhali ap̱o/ uni mo tani gway ’koni ’kume’d i’ce’dka su/ mo uni gun ta gway gi imandhunu ki she/ gi Ari Ḵa’bal mo kun ’koni ’kume’d i’ce’dka su/ mo be.

15 Dhali a’di jin ṯorki’da ṯor ki aha/ mo tani ta’d gi cwan ’dolkon gana/ mo jin baru to mo mmobar ’peŋkuman bampa/ mo dhali ’twaŋkal piti mo dhali agaŋgaram piti mo. 16 Dhali ’peŋkuman bampa/ mo nyaḵkina isi bwa mo dhali aluc̱ piti nyaḵki’d ki bem piti mo. Dhali a’di barki ’peŋkuman bampa/ ki cwam piti mo, ka amyaal alip̱i[a] ’de/ mo jin ’ce’dki’d ka iss ’kwanimpa i/iss ’de/ i’ce’dki iss ’kwanimpa imudhe’d mo. Aluc̱ piti dhali bem piti dhali tur piti, uni nyaḵkan ki ’doḵo/ ’doḵo/ mo. 17 Dhali a’di si’da/ barki’da agaŋgaram piti mo, ki gula/ iss[b] ’kwanimpa ipesu/ mo i’ce’dka doŋon mo. A’di ta mombar jin baru ’kwani mo, a’di jin ta ji gi iman’doyu gwo mo. 18 Agoŋ a’di inyaŋkunu ki wosh dhel jin ta’da wasin dhela/ mo, dhali ’peŋkuman bampa/ miiki’d ki ’be’d ’be’d mo gom ’dolkon gana/ mo dhali di eya tente/ me’da gasaas mo. 19 Dhali moŋḵa’b ma gaŋgara/ gi ’peŋkuman bampa/ mo tani a’di nyoŋkunu ka ris wosh dheli ’baar mo ki she/ ki she/ mo. A’di jin ta jin ṯwa/a/ mo ta wosh dhel jin ta’da wasin dhela/ mo ki e ka ris mo, dhali jiŋ ’ko’d mo a’di ta wosh dhel jin ta ’pinyamaṯẖ mo, dhali a’di jin ’kon ma p̱o/i kwara mo a’di jin ta wosh dhel jin ta jin dhii/ mo, dhali jin ’kon ma p̱o/i doŋon mo a’di jin ta wosha wasin dhela/ jin ta jin dhii/ mo, 20 dhali jin ’kon ma p̱o/i mudhe’d mo a’di jin ta wosh dhel jin ta gi kush mo, dhali jin ’kon ma p̱o/i pe’de/ mo a’di jin ta wosh dhel jin ta jim ’per mo, dhali jin ’kon ma p̱o/i pesu/ mo a’di jin ta wosh dhel jin ta’da go’d go’d mo, dhali jin ’kon ma p̱o/i pekwara mo a’di jin ta wosh dhel jin miina is ki go’de/ go’de/ mo, dhali jin ’kon ma p̱o/i pedoŋon mo a’di jin ta wosh dhel jin miina is ki dhii/e dhii/e mo dhali jin ’kon ma p̱o/i ’kume’d mo a’di jin ta wosh dhel jin tana jamasa tortukul mo, dhali jin ’kon ma p̱o/i ’kume’d i’ce’dka ’de/ mo a’di jin ta wosh dhel jin tana isa mandup̱any mo, dhali jin ’kon ma p̱o/i ’kume’d i’ce’dka su/ mo a’di jin ta wosh dhel jin ta’da duḵ is mo. 21 Dhali ’twaŋkal kun ’koni ’kume’d i’ce’dka su/ mo tani uni ta dhema/ kun ’koni ’kume’d i’ce’dka su/ mo, dhali ’twaŋkala goŋ ka ’deṯe/ ’deṯe/ mo uni uḵkunu ki dhema/ en ’de/ mo, dhali bway tur jin iinu ii ’peŋkuman bampa/ mo tani ta jasi ’dolkon gana/ ’baar mo, jin minu hil ’pena pije/ itor ḵarash me’da gasaas mo.

22 Dhali aha/ p̱arkina gu’b gi mondheleladhelela kamu/ e yisa e ’peŋkuman bampa/ mo, haali/ gu’b gi mondheleladhelel piti mo tani a’di ta Tap̱a Arumgimis mo, a’di jin Eḵa/ Eḵ mo dhali Ari Ḵa’bal mo be. 23 Dhali ’peŋkuman bampa/ yansan yisa midi mii ta ga tente/ mo walla appe mo mmo’twaḵ mo ap̱o/ a’di mo, haali/ monyca ma Arumgimis mo tani a’di ta moŋkush piti mo dhali alambam piti mo tani a’di ta Ari Ḵa’bal mo. 24 Ki moŋkush piti mo tani a’di min ma ris kal gi ’kwaniny’ceshi ii mo dhali aris imaliḵ kun ’koni mony’cesh mo tani mini c̱i monycam buni mo gom a’di mo be, 25 dhali ’twaŋkal piti mo tani mini ’ko kan ki ḵany ki sule/ montee mo – dhali mon’thinya kamu/ midi diya e mun mowa? 26 Uni mini c̱iki a’di monyca mo dhali montaḵ mo goma ris kal gi ’kwaniny’ceshi ’baar mo. 27 Hili to nyo/o’da kamu/ yisa midi diya jin midi cic̱ e a’di mo, walla jan ṯal ’de/ jin midi boṯki miinthus jin shi/ashi/ mo walla ta manc̱i gwonthus mo, hili jasi uni gwansan kun ’kwarkunu gway eya warka/ gi Ari Ḵa’bal gi mondiki/e mo tani, uni a’di imini ’ko mo be.

<- GWO JIN ’CEENU MO 20GWO JIN ’CEENU MO 22 ->