1 Dhali yan’ko’d aha/ c̱ikunuwa cwahan mo jin wana e ki cwaŋ kol ’kus mo mmobar to mo, dhali aha/ ṯorkunu gwo mo ki: Cuyi mis mo dhali bari gu’b gi mondheleladhelel ma Arumgimis mo dhali mo ma gwaṯa/ jin miinuwa basa ’cesh mo dhali uni gwansan kun luŋkini cine/ mo. 2 Hili dhalku/ ki bar mo ma goŋ jin di’d ka pije/ mo ’peni gu’b gi mondheleladhelel mo. Dhalki a’di ’pen mo, haali/ a’di c̱ikunu ’kwaniŋ kal gi mony’cesh mo, dhali uni mini yap̱ mom’peŋkuman bampa/ yan jin ḵogu mo ki sho’k mo ka ppe iss[a] ’kwanimpa su/ i’ce’dka su/ mo. 3 Dhali aha/ mina c̱i uni kun ’koni su/, uni gun ta iman/o gwom pem, mom’bi’th mo mmoc̱i gwo is mo goma tee kun ’kon ma alip̱i[b] ’de/ mo jin ’ce’dki’d ka iss ’kwanimpa ka ’kume’d ’dap̱ ’twa/ ka kwara mo, mmohi’th burrinye/ ma shawaal kun ta kun ’thi/ mo.

4 Uni gwansan ta cwa seṯuun isu/ mo dhali alamba/ kun ta ṯirkina/ isu/ mo, uni gun doshkini bwambori Tap̱a gi mony’cesh mo. 5 Dhali waḵki/ jan ṯal ’deŋ kamu/ midi ’taki shi/ uni mo tani o’d minu wolu/ ’peni ’twam buni mo dhali shwa uni gun ta ’kup̱ buni ki ’ci’d’da/ mo. Waḵki/ jan ṯal ’deŋ kamu/ midi shi/ uni is mo tani a’di ’dap̱a’dap̱ kan ki a’di minu ’kosh mo. 6 Uni ta gi mom’bi’th mmomu’th momis ’twa/ mo ka shoka kamu/ midi diki p̱ir ari yi’de/ a’cesh ki me’da tee gwansan jin ’kona uni mmoc̱i gwom buni is mo, dhali uni ta gi mom’bi’th ap̱o/ yi’de/ mo mmowar uni mmota abas mo dhali mmodor mony’cesh mo ka ris isa nyor kun woci ’kwani is she/ mo me’d ka ris me’d jin mina bwa o uni mo mmomii kan mo. 7 Dhali ki uni mini ’baar gwom buni jin ona uni is mo tani adhan to/e yan jin midi shinu ’peni jis jin dar gi ’pemen mo tani midi mii mo/as ap̱o/ uni mo dhali p̱i uni e mo dhali ’kosh uni mo be. 8 Dhali buŋgwar is buni kun wukin mo tani mini ishi bway tur kun iinu mo e dhan ’peŋkuman bampa/ mo a’di jin yuḵu gway ki, a’di jin ’be’dki gwo ki ’pemena kamu/ mo, ki a’di jin ta Pan Saduum mo dhali Pam Masir mo e mo jin ’koshkunu Tap̱am buni ki cwany’ciṯẖan dhul mo. 9 Haali/ ka cim kwara dhali ka nusa p̱o/ mo tani ’kwaniŋ gwas ’peni ’kwanin tiya mo dhali ’peni awaḵa tiya mo dhali ’peni ’kwani kun ’kona ’twa/ ki she/ ki she/ mo dhali ’peni kala tiya mo uni hilkina hil ka ’thime/ mo gom buŋgwar is buni kun wukin mo dhali ush ki ’tash mo mmodhal uni bway mo ki uni minu kan ijis jwa mo. 10 Dhali uni gwansan kun ’kon e mony’cesh mo tani uni mina bwa i’kunya’kuny ap̱o/ uni mo dhali mii miim ’penkap̱an mo dhali c̱i to ki me’d ka rem ’kup̱ mo haali/ imanc̱i gwo su/ gwansan, uni ’koshki ’kwani is ka nyor ki to jin wo’cki ’kwani is she/ mo, uni kun ’kon e mony’cesh mo. 11 Hili ’ko’da cim kwara dhali ka nus mo tani shi/ir jin di ki e ’peni Arumgimis cic̱ki’d e uni mo dhali uni doshkin ki sho’k buni mo, dhali adhan moŋḵo/ is biṯkin ap̱o/ uni gwansan kun p̱arki uni e mo be. 12 Dhali yan’ko’d uni ciḵki dhan ’twa/ jin caaca ’peni momis mo mmo/o uni gwo mo ki: Iiyu/ ise mo. Dhali e jis/e gi unim buni kun ta ’kup̱ gi uni mo tani uni iiki bway momis mo e bwaaraḵ mo. 13 Dhali ka tente/ c̱aan mo tani adhan mony’cesh yiḵinki is mo dhali ’ban gi ’peŋkuman bampa/ jin ’kon ma p̱o/i ’kume’d mo tani ṯa’kkin mo be. Dhali ’kwani alaap̱i pesu/ mo uni ’koshkunu ki mony’cesh jin yiḵinki is mo, dhali kun tiya uni deekin ki dee jin shiyi’d mo dhali c̱i monyca ka Arumgimis jin ta ji gi momis mo be.

14 Dhali awayyi jin ’kon ma p̱o/i su/ mo tani peki’d mo be. Dhali hili mo mo ma, awayyi jin ’kon ma p̱o/i kwara mo tani ’dishkina ’twa/ mmop̱u’du/ mo be.

15 Dhali yan’ko’d aman’doyu gwo jin ’kon ma p̱o/i pesu/ mo tani dhalki’da poomem piti me’d mo be, dhala dhan ’twa/ kun caaca gwoyunu/ mo ’peni momis mo mmo/oyu/ gwo mo ki: ’Peŋkuman bampa/ gi mony’cesh mo tani a’di warki’d ki ’peŋkuman bampa/ gi Tap̱am bana mo dhala Ḵrisṯẖos jin ta jim piti mo, dhali a’di midi ta Tap̱a gom ki sule/ mo dhali ki sule/ mo be. 16 Dhali ’kwaniŋ gwanyjaḵa/ kun ’koni iss ’de/ mo mmo’ce’dka doŋon mo uni kun ’koki ’pena ḵursim buni ibwambor ma Arumgimis mo tani ṯa’kki jis/em buni a’cesh mo dhali luŋa Arumgimis mo 17 mmo/o gwo mo ki: