1 A’di ’boro’d mmoc̱i mo jin ’boruwa ’bor bwa i is ki Tap̱a mo,

mmoyuḵ gway mmomaŋ gway pini mo, ayy /e jin Caa e ki Ca mo,

2 mmobah gwo gom mo/en pini jin ṯelu sho’k mo mon’thamo/ mo,

dhali mo ma isiŋ ganam pini mon’thiny mo,

3 dhali ki koŋ gway ma dheŋdhenye/ jin ’kon ma shu/i ’kume’d mo jin buḵu ki dar ga yi’c mo dhala dheŋdhenye/ mo,

dhali ko jin lukum ma dheŋdhenye/ jin ’kon ma shu/i pesu/ mo be.

4 Haali/ /e, ayy Tap̱a, /e karki aha/ mmo’kuny bwa ki ’kuny gom miim pini mo.

Ki miin to ki me’d pini mo tani aha/ yuḵkina gway ki moŋ’kuny bwa mo.

5 Dhan miim pini ’ka’da miiya, ayy Tap̱a.

Gwom pini kun kuluma /e ibwa mo tani uni ’kula’kul mo.

6 Wathi/ jin ta dholgon mo tani mol a’di mish ’ban mo,

wathi/ jin ’kan ma ’kama janya/ mo tani a’di mol mish gwo yansan ’ban mo be.

7 Ki ba a’di jin ta thus mo tani a’di ’ka’da le/ me’da sho mo

dhali imanmii tonthusi ’baar mo lugkin ki ṯup̱ ṯup̱ mo tani

uni ’birki ’kup̱ ki mo jin ’ce’du/ sho’k ki sule/ sule/ mo,

8 hili /e, ayy Tap̱a, /e a’di idikin e mo jin ḵapaṯa/ ḵapaṯ ki sule/ sule/ mo.

9 Haali/, hili mo mo ma, ’kwani kun ta ’kup̱ ki /e mo, ayy Tap̱a,

haali/, hili mo mo ma, ’kwani kun ta ’kup̱ ki /e mo tani uni minu ’ce’d sho’k mo.

Aris imanmii tonthus mo tani minu c̱eker bwa mo be.

10 Hili /e eḵki cem pem mo mmowa e ki ce ma almaŋa’th mo.

/E ki wol aha/ ayin jin ta this ki this i is mo.

11 Em pem p̱arki uni kun ta ’kup̱ ki aha/ e mo mmoṯa’k ka luŋgu’b mo.

’Cem pem ciḵki gwo gom mom’bir ’kup̱ ki ’kwani kun ta thus ki thus kun ṯẖa’th aha/ ki is mo.

12 Uniŋ ḵar/e uni lugkin me’d cwanyjeṯẖkum mo

dhali ca me’da bwanyayiis e Pan Lubnaan mo.

13 Uni c̱u’thkunu mo e gu’b gi Tap̱a mo.

Uni lugkin ki ṯup̱ ṯup̱ e gu’b ma pije/ jin di ’kup̱ ḵany ma Arumgimis bana mo.

14 Uni ’kon naskina/ mmodho’th maman ka dhan buni kun tana uni mo.

Uni ’tu’du/ mo ki sule/ ki yiman ki is buni mo dhali ishki dhii/ mo

15 mmoṯor eya tente/ ki Tap̱a a’di ta a’di jin ta’da ḵar/e mo,

a’di jin ta wosh pem mo, dhali miiŋ kamu/ di’d e a’di yisa jin ush me’d mmonon a’di mmota ḵar/e mo.

<- GWAY GI IDAWUU’D 91GWAY GI IDAWUU’D 93 ->