GWAY GI IDAWUU’D 58

Eya manyuḵ gway mo, isi ki gwo jin minu ’koki ’ce’d sho’k mo. Gway jin karu ki kup̱ jin ta jima Dawuu’d mo.

1 A/um ka jiŋ gana/ ḵani gwo ki isi ḵan gana/, um kun ta ’kwani ma tul ’kup̱a?

A/um dwalli iya/ gi ’kwani gwo ki dwall gana/ mowa?

2 Yisa, eya dum bum mo tani um usha ’ce ’kol mo eya dum bum gom tonthus mo.

Me’d bum ṯu/ul mo jin bujura bujur e mony’cesh mo.

3 Imanmii tonthus mo iikini dheres mo ’peni bwa gi ikum mo,

uni thamki mii ’pena cim gun dhodhu uni mo tani uni thamki gwo o ka ṯor mo.

4 Uni tan ga ṯi’d me’da ṯi’d tasha/ mo,

me’d tashan ’thi/ jin ta’da ’diye/ mo jin ’dap̱ki bwany’cem piti ’twa/ mo,

5 wakan jin mina a’di diki ciḵ gwalish gi wathi/ mo

walla laṯ jin laṯu/ a’di mo.

6 Ayy Arumgimis, ’ce’dki uni she/ e bwan ’twam buni mo.

Buḵki uni sheŋ gwoliŋgwoṯẖa/ mo ’peni ushi dhuru’c ma dhop̱ mo, ayy Tap̱a.

7 Dhalki uni p̱ikin ki jahanne/ me’d yi’de/ jin gusu’di ’ciṯẖ ’pen mo,

dhali wa e ka sho si’da/ jin tora moŋḵuthu’d ’ko’da ’cesh mo dhali ḵu’th mo.

8 Dhalki uni wana e ka homo’th jin yu moros mo,

dhali me’da ’ci jin ṯagu ka dho’th piti jin molo’da tente/ p̱ar e mo be.

9 Ki ’dishe/ tani anos bum mina ’ko’d gwari ’batha’ba’th me’da ’de/ jin shwana o’d mo,

waḵki/ ta’da go’d go’d walla diki’d mo/o’d mo tani dhalki a’di dhi’th uni sho’k ki jahanne/ mo.

10 Amanmii miiŋḵar/e mo tani a’di mina bwa ’kuny mo haali/ a’di midi p̱ar mo jin ri/uwa ri’c e mo be.

Dhali a’di midi lam sho’k piti ka bas gi ’kwani kun ta thus ki thus mo.

11 ’Kwani mini o gwo mo ki: Ka jiŋ gana/ to jin ish ḵumma/ mo tani di’d gom ’kwaniŋ ḵar/e mo.

Ka jiŋ gana/ Arumgimis di’d mmodwall gwo ap̱o/ mony’cesh mo be.