1 Arumgimis ta a’dim bana jin hura ana jwa icine/ mo dhali mom’bi’th mo,

a’di jin ’dishi’d ka yempa/ mmowoṯẖa woṯẖ ’peni monṯo’c bwa mo.

2 Wakan ana mina ’koki ḵo/ is mo, ma waḵki/ mony’cesh midi aḵ jamas e mo,

ma dhali waḵka ris wosh kun turatur si’da/ mini ’taki yiḵin is mo e bwaman ma duŋ ḵumma/ yi’de/ mo,

3 ba yi’de/ a’di gwokina is mo dhali seya gabusha/ mo,

ba dhan wosha turga/ uni deekin mo ka dulaṯṯ piti mo.

4 Yi’de/ jin kasha e jin gusu’d a’di jin kar ’peŋkuman Bampa/ ma Arumgimis ki bwaŋ ’kunyka/ mo,

dhali mo jin ḵogu jin ta mo gi a’di jin Eḵa/ Eḵ mo.

5 Arumgimis a’di di’di bwaman ma yim mo. Ayim minu mol joc̱ mo.

Arumgimis midi woṯẖa yim ki ’dishe/ shunsan mo.

6 Kal gi ’kwaniny’cesh uni shwakina bumburush mo. Dhala risa hakuuma kun ’kona ’cesh mo uni yaki yil mo mmoḵala mo uni mo.

A’di bahki gwo ki ’twam piti mo tani mony’cesh waki’d mo be.

7 Tap̱a gi momis mo tani a’di nyaḵki di ki ana mo.

Arumgimis ma Yakuub a’di ta jim bana jin hura ana jwa icine/ mo.

8 Iiyu/ ma, hili mo mo ma, mii kun miina Tap̱a mo,

a’di jin wagaski mo jin ’ce’du/ sho’k e mony’cesh mo.

9 A’di doshki mo ma mee kun asu mo e ’pemen gi mony’ceshi ’baar mo.

A’di ’ce’dki’da bwaa mo dhali ṯosha mee mo.

A’di ki c̱itha arabiyya kun dira shumarum ki o’d mo.

10 Doshi ka ḵu’th is naskina/ mo dhali mishi gwo ’ban ki aha/ tana Arumgimis mo.

Aha/ karu ki ca e kal gi ’kwaniny’cesh mo.

Dhali aha/ karu ki ca e mony’cesh mo be.

11 Tap̱a gi momis mo tani a’di nyaḵki di ki ana mo.

Arumgimis ma Yakuub a’di ta jim bana jin hura ana jwa icine/ mo.