1 Adum pem a’di ’tu’du/ mo ki tom ’borga/ jin di’di bwaman mo mmo/o mo.

Aha/ bahkina gwom pem eya maliḵ mo.

Ale’d pem a’di wana e ka galama riisha/ jin thoson ma man’kwar to is hila/ mo.

2 /E ta a’di jin onu bwa ki nyanye/ ki iya/ gi ’kwani mo.

A’the a’di wolkunuwa p̱owa le’d pini mo.

Wakan Arumgimis ’borki /e mii ki sule/ sule/ mo.

3 Deḵi gandal pini ap̱owa wum pini mo, ayy /en ’de/ jin c̱a’bki dem dem mo

e monycam pini mo dhali e mo/eḵ pini mo.

4 E mo/eḵ pini mo tani meri mo e mo jin p̱inu mii e mo

gom gway gi gwoŋ gana/ mo dhali gom mo jin minu cesh she/ mo

gom mo jin minu dhu bwa ki gwa’d ki miiŋḵar/e mo.

Dhalki me’da bim poros pini ṯorki /e gwo gom dhan mii jin caaca mo.

5 Athop̱am pini uni kaaka mo eya du uni kun ta ’kup̱ ma maliḵ mo.

Dhali ’kwani ṯa’kkin e bwaŋ’kwariny pini mo.

6 Ḵursim pini a’di ta ji ma Arumgimis jin di’d ki sule/ sule/ mo.

Cwa ma maliḵ pini a’di ta cwa jin ’konuki mii mii ka gwar ’de/ mo.

7 /E eni mo jin miinu miiŋḵar/e mo dhali shi/ mo jin miinu to gun ’coḵa’coḵ i e mo.

Wakan Arumgimis jin ta’da Arumgimis pini mo tani a’di ’koshki /e ki monyca mo

ka yin gi mom’bor bwa ap̱o/ uni gun ta cim pini mo.

8 Burrinye/ ma p̱om pini a’di ter mo kagahara mo gom yiman cwaŋ ḵuyu’d ’pena murr dhali yiman gi cwa jin wana e ka ’kwaṯan mo dhali yiman cwa jin yuḵu gway ka saliiḵa mo.

’Peni mo ma maliḵ pini jin ta sheny je mo tani ashun dheŋdhenye/ uni buḵkunu mo mmo’kuny /e bwa mo.

9 I’bwa/ gi imaliḵ mo uni ’koni bwaman up̱ pini kun taḵu mo.

E me’da bim poros pini mo tani ayim jin ta asha maliḵ a’di doshki’d ki ’dolkon ’peni Pa Up̱ir jin hidhu i/is ma yim mo.

10 Ciḵi gwo mo ma, ayy ’bwa/um, dhali mishi isi gwo dhali ḵa’di ’cem pini mo.

Dhalki ’kwanim pini ’pen mo dhali gu’b gi icim mo.

11 Dhala maliḵ mina bwa o gom jarom pini mo.

Me’d jin tana a’di tap̱am pini mo tani luŋi a’di mo.

12 ’Kwani gi Pan Sur uni mini sus mo ma ’them pini ki to kun c̱inu ki me’d mo,

uni ’peni ’kwani kun ta pa ki pa mo, 13 ’pena ris to gun ’kona e ki she/ ki she/ kun tanu mo.

’Bwa/ ma Maliḵ a’di shumkunu ki burrinye/ jin shonu ka ce e ki ’dolkoni e mo.

14 Ka ris jamas burrinye/ ki she/ ki she/ mo tani ayim suskunu amaliḵ mo

nyaḵki nyaranyaŋa’b ma yim jin suski a’di mo, uni gun iiyin nyaḵka yim mo.

15 Ki bwaŋ ’kunyu’d dhali ki bwaŋ ’kunyka/ mo tani uni sus uni mmonṯal ’de/ mo

me’d jin cic̱kina uni gu’b ma maliḵ mo be.

16 Mmodhal mii yansan e i is gom ibabam bum mo tani a’di midi ta iya/m bum mo.

Dhali /e mini dhu uni mmota iya/ gi mony’ceshi ’baar mo be.

17 Aha/ mina kar gway pini ki a’di midi ’ciṯẖa cim bwa mo jin minu taḵ a’di mo eya risa nyaḵum yil gi ’kwani mo.

Wakan ’kwani ’baar mo mini maŋ /e mo gom ki sule/ mo dhali ki sule/ mo.

<- GWAY GI IDAWUU’D 44GWAY GI IDAWUU’D 46 ->