1 Me’da sheṯ jin ḵara ce jin ta yoll mo a’di jin ona bwa ki yi’de/ jin kasha e ki kash mo tani

wakan si’da/ aḵashiram pem c̱orki’da c̱or gom /e mo, ayy Tap̱a Arumgimis.

2 Aḵashiram pem budha ṯe/ miiŋḵar/e goma Arumgimis mo,

goma Arumgimis jin di ki e mo.

Ki aha/ mina p̱u’d kakasja dhali hil bwam/e ma Arumgimis mo?

3 Jabu’th em pem a’di warki’d ki tonṯem pem gi montee mo

dhali mon’thiny mo,

ka yiha/ ki ’kwani ’kon mmorash aha/ gwo o mo ki:

Mane Arumgimis pini mane?

4 To gwansan mo tani uni kakika/ e mo,

me’d jin wolkika/ ḵashiram pem ka pije/ mo:

me’d jin yaka/ nyaḵka buhany ’kwani mo

dhali shu uni bway ka jintura/ e gu’b ma Arumgimis mo,

ki bwam ’boro’d kun ḵumu cuuwa/ mo dhali yuḵ gway kun ’boruwa ’bor bwa i is mo,

me’d jin dhukin ma waambuhany ’kwani kun ḵogu acim mo.

5 Katinta ibiṯu/ /e eya ’cesh mo, ayy aḵashiram pem mo,

dhali atinta i/usha /e me’d kan e aha/ mo?

Tayi ka ’teŋ kap̱e/ eya Arumgimis mo. Haali/ aha/ mina doḵ/e maŋ a’di mo,

a’di jin ta’da manwoṯẖ pem dhali Arumgimis pem mo.

6 Aḵashiram pem a’di biṯu/ ’ko’da ’cesh e aha/ mo.

Wakan aha/ kakina /e e mo

’pena ’cesh gi Pan Uurdun mo dhali gi Pan Harmuun mo

dhali ’peni ’Kuwosh ma Misar mo.

7 Moŋ’kulga/ jin yuḵu ki moŋ’kulgaŋ kamu/ mo

me’d jin dora yi’deŋ ḵuku/ ḵukum pini mo.

Aris yi’dem pini kun bir bakal mo dhali aris eŋ ḵuthar yi’dem pini

uni ḵalki aha/ ka ’cesh mo.

8 Ki montee isa yempa/ mo tani Tap̱a a’di ḵanki mo/en piti jin ṯelu sho’k mo

dhali mon’thiny mo tani gway piti di’d nyaḵki aha/ mo,

mmo’thowa Arumgimis gi mondiki/em pem mo.

9 Aha/ ona gwo eya Arumgimis jin ta wosh pem mo ki:

Atinta iŋana /e aha/ kan mo?

Katinta gara/ imiga/ c̱a’b jasi gwolu/ kan mo

gom mosiri’c gi uni kun ta ’kup̱ ki aha/ kan mo.

10 Me’d wathi/ jin ’disha ’twa/ mmowu mo ’peni jama/ jin doruwa dor e buŋgwar is pem mo tani

uni kun ta ’kup̱ ki aha/ mo sorki aha/ mo,

dhali ka yiha/ mo tani uni ’kon mmorash aha/ gwo o mo ki:

Mane Arumgimis pini mane?

11 Katinta ibiṯu/ /e eya ’cesh mo, ayy aḵashiram pem mo,

dhali atinta i/usha /e me’d kan e aha/ mo?

Tayi ka ’teŋ kap̱e/ eya Arumgimis mo. Haali/ aha/ mina doḵ/e maŋ a’di mo,

a’di jin ta’da manwoṯẖ pem dhali Arumgimis pem mo.

<- GWAY GI IDAWUU’D 41GWAY GI IDAWUU’D 43 ->