4
Eya manyuḵ gway mo nyaḵka risa dheŋdhenye/. Gway jin yuḵu mo mmoka mo jin miinuwa mii e mo. Gway ma Dawuu’d.
1 Thoḵi aha/ ’twa/ mo ma ki aha/ yuḵa yuḵ mo, ayy Arumgimis pem jin ta’da ḵar/e mo.
/E c̱iki aha/ mo mo ki aha/ dina ka c̱is mo.
Miiyi mii ma ’the ap̱o/ aha/ ma, dhali ciḵi mo ma ’thom pem mo.
2 Ayy ’kwani kakasja imina montaḵ pem jin ’koshu is is ka nyor idi ki mo ma ’the is kan mo?
Kakasja imina /e dhal mo/en gi gwo jin di’d bwa ’te/ ’pen mo dhali simm jasi gwo ma ṯor e kan mo?
Doshi ma dhali ’cunycuri yan mo.
3 Hili mishi gwo ’ban ki Tap̱a a’di dhuki uniŋ gayiin ki she/ mo gom is piti mo.
Tap̱a ciḵki aha/ gwo mo ki aha/ gwona ’twa/ e a’di mo.
4 Ka nyor di’d mo tani hili dhalku/ miinthus ki mii mo.
Wali ’twa/ ka dum bum mo ap̱owa cim bum mo dhali ’koyi um ki shwamm mo.
Doshi ma dhali ’cunycuri yan mo.
5 C̱iyi to kun ’ciṯẖu/ ’kus kun tana ḵar/eŋ gana/ mo
dhali dhuyi moŋgam gwo is bum e Tap̱a mo.
6 Kwani tana ris kun o gwo mo ki: Ayy, ki ana mina mish tom ’boro’da kamuyi.
’Deki moŋkush gi jis/em pini ap̱o/ aman mo, ayy Tap̱a.
7 /E karki moŋkuny bwa ki nyanye/ eya dum pem mo
mmobol uni gwansan e mo kun takin gi pos buni dhali yimana mura’th jin ḵa/u ki ŋah ŋah kun ishkin mo.
8 E mo ma ḵu’th is mo tani aha/ mina ish ’ko’da ’cesh mo dhali ish e mo,
haali/ /e ’de/ mo tani ayy Tap̱a, kar aha/ mmoc̱a’b ki ’dantar mo.
<- GWAY GI IDAWUU’D 3GWAY GI IDAWUU’D 5 ->