1 Aha/ mina kar /e ki ca mo, /e jin tana Arumgimis pem mo dhali aMaliḵ pem mo,

dhali ’bori gway pini mii ki sule/ sule/ mo dhali ki sule/ sule/ mo.

2 Isa yempa/ aha/ mina ’bor /e mii mo,

dhali maŋ gway pini ki sule/ sule/ mo dhali ki sule/ sule/ mo.

3 Tap̱a a’di icaaca mo dhali a’di ica’d jin minu maŋ mo,

dhali dhan cam piti minu ’koki gu’d ’kup̱ mmodoṯ mo.

4 Anyaḵum yil gi ’kwanin ’deŋ kamu/ mini maŋ miim pini ka nyaḵum ’kwani yilan tiya mo,

dhali uni mini bah dhan mii ma dem dem pini jin ḵala /e ki mii mo.

5 Gom monyca ma ra/ ra/ pini mo dhali mo/eḵ pini mo

dhali aris to kun miina /e ki momer mo tani aha/ mina kulum uni ibwa mo be.

6 ’Kwani mini bah dhan mo ma dem dem ma purem pini jin ḵala /e ki mii mo,

dhali aha/ mina bah dhan monycam pini mo.

7 Uni mini gac̱ miin tom pini jin ishi’d ka enthus ki gway pini jin tor /e ḵarash gom tom ’boron mo

dhali yuḵ gway ki ’kal ’kal gom mo ma ḵar/em pini mo.

8 Tap̱a a’di ta’da manmii mii ka ’the mo dhali amanmiimii mo,

anyor piti maŋgala she/ mo dhali mo/en ishki’d jin ṯelu sho’k mo.

9 Tap̱a a’di ’bora’bor gom ’kwani ’baar mo,

dhali bwam ma ’thimem piti ki mo/en diki’da p̱owa ris ’kwani ’baar mo kun uḵkina a’di mo.

10 Aris miin tom pini mini c̱i /e bwa jin ’boruwa ’bori is mo, ayy Tap̱a,

dhali aris unim pini kun dhunu ki she/ ki dhelel dhelel mo tani uni mini ’bor /e mii mo.

11 Uni mini o gwo gom monyca gi bampam pini mo,

dhali uni mini ṯor gwo gom mom’bi’th pini mo,

12 mmoṯor eya tente/ e iya/ gi ’kwani mo miin to ma dem dem pini mo,

dhali monyca jin mii’d ki ra/ ra/ jin ta ji gi bampam pini mo.

13 Bampam pini a’di ta bampa/ jin midi di ki sule/ sule/ mo

dhali mo jin tanu tap̱am pini ’dimki ’kup̱ ki sule/ sule/ mo eya risa nyaḵum yil gi ’kwaniny’cesh mo.

Tap̱a a’di ita a’di ma isiŋ gana/ eya ris gwom piti mo,

dhali ta ’the ka ’the eya ris miin tom piti mo.

14 Tap̱a a’di bu’thki uni gwansan kun ṯa’kkin mo,

dhali ’deka ris uni imis mo uni gun ’kokin ki goŋgo/ mo.

15 Aris e gi ’kwani ’baar mo hilki /e mo

dhali /e ki c̱iki uni tonṯem buni ki yil ka ḵar/e mo.

16 /E ḵa’dki me’d pini mo

dhali /e kap̱kina ris to kun ’ko ki e adu mo ka ris to gun o uni bwa mo.

17 Tap̱a a’di ita’da ḵar/e eya ris bway piti ’baar mo

dhali kush bwa ki kush goma ris miim piti mo.

18 Tap̱a a’di ’disha’dish goma ris uni gwansan kun yuḵki a’di mo,

eya ris uni gun yuḵki a’di gom miiŋ gana/ mo,

19 A’di ki thim to jin ona a’di bwa mo a’di jin ḵo/ki a’di mo.

A’di si’da/ ciḵki gwom buni mo dhali ta uni is ki me’d mo.

20 Tap̱a a’di ki ’tasha ris uni ’baar ’twa/ mo uni gun enki a’di mo,

hili aris uni gun ta thus ki thus mo tani mina a’di i’ce’d sho’k mo.

21 ’Twa/ pem midi o gwo mmomaŋ Tap̱a mo,

dhali dhalka ris shuman isi ’baar mo ’bor gway piti jin ḵogu mii mo ki sule/ sule/ mo.

<- GWAY GI IDAWUU’D 144GWAY GI IDAWUU’D 146 ->