1 Mom’bor mii midi di gom Tap̱a mo, a’di jin ta wosh pem mo,

a’di jin ṯo’kki me’d pem gom mo ma mee mo,

dhali ŋwal me’d pem mmo/asa as mo,

2 a’di jin ta wosh pem dhali acur pem mo,

dhali acur pem jin ṯenu gwo mo dhali aman’cuḵ aha/ mo,

dhala goŋgorom pem mo dhali a’di jin bu’thka/ mo jin hurga/ jwa mo,

a’di jin ’dap̱ki’da ris ’kwani e bwaŋ’kwariny piti mo.

3 Ayy Tap̱a, ki wathiny’cesh jana sa/ imina bwa o /e ki a’di mo,

walla ya/ gi wathiny’cesh jana imina /e kulum gwo ibwa gom a’di mo?

4 Wathiny’cesh wana e ka wulp̱e/ mo,

ateem piti wana e ka ḵashira la jin peki’d mo.

5 Goŋi momis pini is ka ’cesh mo, ayy Tap̱a, dhali p̱u’du/ ka ’cesh mo.

Tayi wosha turga/ is ki me’d mo ki uni mini iiya ku’d mo.

6 Biliṯi/ uni mmoshwayi mo mmomiiya war mo dhali c̱eker uni bwa mo.

Dhali peper ka risa thop̱am pini bwa mo dhali miiya ’bala’c ’bala’c dhan mo yin mo.

7 Hethi me’d pini ’peni mo jin ḵa’dama/ ḵa’dam mo,

’cwami aha/ mo dhali ’cuḵi aha/ mo ’pena ris yi’de/ mo,

dhali ’peni me’d gi ’kwani gi bampan tiya mo,

8 uni kun tana ’twa/ buni aṯor ka ṯor mmo/o gwo mo,

dhali uni gun tana me’da bim poros buni abim poros jin ta thus ki thus mo.

9 Aha/ mina yuḵ gway jin ta gway this gom /e mo, ayy Arumgimis,

ap̱owa dheŋdhenye/ jin ’kon ma shu/i ’kume’d mo aha/ mina p̱i a’di gom /e mo,

10 a’di jin c̱iki mo jin p̱inu mii e ki imaliḵ mo,

a’di jin ’cwamki c̱iŋkinam pini ka Dawuu’d mo.

11 ’Cwami aha/ ’peni gandal gi ’kwani kun ta maṯṯ ki maṯṯ mo

dhali ’cuḵi aha/ mo ’peni me’d gi ’kwani kun ta ’kwani gi bampan tiya mo,

uni kun tana ’twa/ buni aṯor ka ṯor mmo/o gwo mo,

dhali uni gun tana me’da bim poros buni abim poros jin ta thus ki thus mo.

12 Dhalki iya/m bam e dhuru’c buni mo

wana e ki cwalman kun dhethadhe’th mo,

walla i’bwa/m bam mmowa e ka ḵa’dum gu’b mo

kun jep̱kunu mo mmonyaŋ gu’b ma maliḵ mo.

13 Dhalki themes bam ’tu’du/ ki piny piny mo

mmo’tu’da risa lakaŋ gu’b kun dhuna am to mo.

Dhalki ḵa’bal bam dhodhon ka alip̱ mo

dhali ka alaap̱i ’kume’d mo e buntom bam mo.

14 Dhalki bip̱ bam ’tu’d mo ki ushan mo,

jin mina is ’koki ’kosh uni ka nyor gom ’ba’th mo walla ta a/ulul is mmodho’th ushan mo.

Dhalku/ ki mii dhal ko jin gwonu ki ko ma c̱is bway mo mmodi e bway tur bam mo.

15 ’Kwani kun biṯa mo jin ’boru mii wakana p̱o/ mo tani uni i’bora bwa mo.

’Kwani kun tan ga Arumgimis jin ta Tap̱a mo tani uni i’bora bwa mo.

<- GWAY GI IDAWUU’D 143GWAY GI IDAWUU’D 145 ->