1 Gom gwo jin boc̱o’d mo gom um, iwaḵ pem mo. ’Bori bwa mo ma, e Tap̱a mo. Mmo’kwar um gwo kun nyaḵkan mo tani a’di diki ṯocaa/ bwa mo haali/ a’di ta’da teṯe/ gom um mo be.

2 Jiyi a’ka ki e ki ’bore/ mo ma. Dhali jiyi uni gun mii tonthus ki e ki ’bore/ mo ma. Jiyi uni gwansan ki e ki ’bore/ mo ma kun ’ciṯẖi/ buŋgwar is is mo. 3 Haali/ ana tana uni gun ’ciṯẖuwa munyjal yis gana/ mo ana gun luŋa Arumgimis ki shi/in mo dhali monyca eya Ḵrisṯẖos jin ta’da Yesus mo dhali mmo’koki dhu buŋgwar is e buŋgwar is mo. 4 Ba aha/ ki is pem tana gi ’kup̱ gwo mo gom buŋgwar is jin ta buŋgwar is mo si’da/. Waḵki/ wathiŋ kamu/ midi kulum gwo ibwa ki a’di ta gi ’kup̱ gwo e buŋgwar is mo tani aha/ tana ki nyanye/ ki nyanye/ mo be. 5 Aha/ ’ciṯẖkunuwa munyjal yis mo ka cim pekwara mo dhali aha/ tana wathi/ ’peni ’Kwani ma Israyiil mo dhali aha/ tana ja waḵ ma Benyamiin mo, dhali aha/ tana ji Ibraniyiin mo jin dhodhu e ’Kwani ma Ibraniyiin mo be. Me’d gwo gi gwoŋḵan jin c̱inu ki ’Kwani P̱arisiyiin mo tani 6 aha/ shwakina anyor mo mmoṯoca ḵaniisa bwa mo, me’d gwo gi mo ma ḵar/e jin baṯẖ gwoŋḵan jin c̱inu i’ko’d mo tani aha/ dina ka p̱o/ mo be. 7 Hili waḵki/ nyunycinaŋ kamu/ di’d jin taka/ mo tani a’di karka/ me’d to jin thisu e mo gom gway ma Ḵrisṯẖos mo be. 8 Ka jiŋ gana/ aha/ dhuna ris to me’d to kun thisu e mo gom to jin bolo’da ris to ’baar mo e ki ’bor mo jin ta mmomisha Ḵrisṯẖos jin ta’da Yesus Tap̱am pem mo be. Dhali gom gway piti mo tani aha/ wana gwo kan e bwa mo mmodhala ris to ’peni ’baar mo dhali aha/ dhuna uni me’d to gun pishu mo ki mii gi wakan ki aha/ mina gama Ḵrisṯẖosa du is mo be. 9 Dhali ki aha/ minu this mo i is e a’di mo, yisa mmota gi mo ma ḵar/e ki is pem mo yisa, mmo’dap̱ ’ko’di gwoŋḵan jin c̱inu mo. Hili a’di jin ta mo gi gamu gwo is eya Ḵrisṯẖos mo. Mo ma ḵar/e yan ’peni Arumgimis mo a’di jin di ’ko’d e mo jin gamu gwo is mo be. 10 Ki aha/ mina mish a’di mo dhali mom’bi’th gi mompim piti mo dhali aha/ mina pash mo gi isa nyor piti mo mmowar waki a’di e jwam piti mo be. 11 Wakan waḵki/ a’di mishu mii mo gom aha/ ki aha/ mina bumbur mo e mo jin pinu mo ’peni mowu mo be.

12 Yisa mmobu’thkika/ to yansan mo hila/ walla mmowarki jim ’borgaŋ gana/ mo hila/, hili aha/ dina mmo/ur a’di mo mmomiga/ bu’th a’di jin bu’thkin ma Ḵrisṯẖos jin ta’da Yesus aha/ mo, mmokar aha/ mo mmota jim piti mo be. 13 Iwaḵa, aha/ dinaki kar is pem ki jim bu’th to mo hila/. Hili ton ṯal ’de/ miiga/ mo mmodhalka ris to gunn ŋ’ko’d mo dhali mmogoŋ is ka ḵarambuye/ ki to gun ’koni buŋ’kup̱ mo tani 14 aha/ gusa ur to i’ko’d mo e mo jin tanu gi ’kup̱ to mo mmogam ’kup̱a ŋwa ’pena yuḵ ma Arumgimis ’peni momis mo eya Ḵrisṯẖos jin ta’da Yesus mo be. 15 Dhalki ana gwansan gun isa mo tani tana gi bwa ki wakan mo ma. Dhali waḵki/ um ’kona bwa ka bwanycin mo, ma e ton tiya mo tani Arumgimis midi ṯor a’di yan eya tente/ e um si’da/ mo be. 16 Isi kan dhalki ana iina iiŋ gana/ mo e mo jin bumburkina ana mo.

17 Iwaḵa, ’thoḵaa/ mii mo ma dhali ḵuthi uni gwansan ki e mo ma uni gun ’kokin mo mmomii kan me’d jin p̱ara um she/mm e e aman mo. 18 Haali/ uni ka ris ṯorkika/ um mo me’d ka ris mo dhali shwane/ aha/ ṯora um gwo ki jabu’th mo uni gun ’kokin mo mmomii waki uni gun ta ’kup̱ gi cwany’ciṯẖan dhul ma Ḵrisṯẖos mo be. 19 ’Pemen buni ta mony’ce’d sho’k mo dhali arum buni jin luŋa uni mo tani ta bwa mo dhali uni caki can thus e mon’the is buni mo ki bwa jin dhuna uni ki to ga ’cesh mo be. 20 Hili ’peŋkuman pam bana a’di ta momis mo be dhali ’peni a’di mo tani ana c̱orkina Amanwoṯẖ mo jin ta Tap̱a Yesus Ḵrisṯẖos mo be, 21 a’di jin midi aḵ buŋgwara ha’th’ko’d bana yan e mo mmowa e ki buŋgwar is piti mo e monyca mo ki mom’bi’th jin ’bitha a’di e mo mmomisha ris to dhu ’baar mo mmobaṯẖ a’di i’ko’d me’d is pitiŋ gana/ mo be.

<- P̱ILIBBI 2P̱ILIBBI 4 ->