1 Dhali acim boc̱kini su/ nṯwa/a/ ka cim gi Mompe’kup̱anyolos mo dhali ayuḵ jin tulu ’kup̱ mo gi maaŋḵuthu’d jin miinu ki dar ga cumaṯ mo. Dhali igasiis kun can dhali iman’kwar to mo uni ŋap̱ki bway mo mmobu’th a’di ki kup̱ mo dhali ’kosh a’di jwa mo 2 haali/ uni o gwo mo ki: Yisa ka tul ’kup̱ yan jin yuḵuwa yuḵ mo yisa hili isi ciki/ adulaṯṯ mina ’kwani ishwa mo be.

3 Dhali ki a’di diki’d e Pam Beeṯaniya e gu’b ma Simaan jin ’kosha monthus mo tani ki a’di c̱a’bki’da tharabeesa mo tani a’boma kamu/ p̱u’dki’d mo jin taki’d gi turaŋ gasaas jin ta gi kush mo jin din ma yina p̱i’dnaŋ gana/ nycine/ mo, jin ’bitha yol she/ ki ’bi’th mo. Dhala yim ki ’ce’d tura mo dhali wol a’di e ’kup̱ ma Yesus mo be. 4 Hili ’kwanin tiya ’kokini mun mo kun deḵkin ma nyor mo e is buni mo mmo/o gwo mo ki: Atinta shinu ayina p̱i’dnaŋ gana/ yan isa ’cesh kan mo? 5 Haali/ ayina p̱i’dna/ yan minu ’taki yol ka riyaal iss ’kwanimpa ka ’kume’d mo dhali c̱iki ’kwani kun hatha’ko’d mo. Dhali uni ki ruḵa yim ki gwo mo be. 6 Hila Yesus o gwo mo ki: Dhalka yim mo ma. Atinta ṯoca um ayim bwa mo? Ayim miiki tony jaro/ gom aha/ mo. 7 Haali/ um isa yempa/ um tan gi ’kwani kun hatha’ko’d kun nyaḵ ’ko ki um mo, dhali ki yilan tiya jin ona bwa um mo tani um ki mish uni tom ’boron mii mo. Hili um mini ’koki ta gi aha/ isa yempa/ mo. 8 Ayim mii a’di jin misha a’di mii mo. Ayim ’koshki aha/ buŋgwar is pem nṯwa/a/ mo gom kan jin minu kan aha/ mo be. 9 Dhali ka jiŋ gana/ aha/ ṯora um gwo mo ki: E mo yin jin minu c̱i gwom ’borga/ e mony’ceshi ’baar mo tani a’di jin miikin ma yim mo tani minu ṯor mo mmokaa yim e mo be.

10 Dhali yan’ko’d Yahuusa Isḵariyuuṯi a’di jin ’dap̱ tiya ’twa/ ka ’kume’d i’ce’dka su/ mo tani a’di yaki’d mo e igasiis kun can mo mmothoson gwo mo mmo’ciṯẖ a’di is ki gwo mo e uni mo be. 11 Dhali ki uni ciḵki gwo mo tani uni ’kunya bwa ki ’kuny mo dhali o gwo is mo mmoc̱iki a’di aguurush mo. Dhali a’di ŋap̱ki embula ’borgaŋ gana/ mo mmo’ciṯẖ a’di is ki gwo mo be.

12 Dhali ka cim jin ṯwa/a/ gi maaŋḵuthu’d jin miinu ki dar ga cumaṯ mo ki uni ’ciṯẖki ari ḵa’bal ’kus mo gom Mompe’kup̱anyolos mo tani imanciḵ a’di gwo oki a’di gwo mo ki: Ki mana o /e bwa jin mina aman ii mo dhali thoson to mo gom /e mo mmoshwa ki Mompe’kup̱anyolos mo? 13 Dhali a’di hashki imanciḵ a’di gwo isu/ mo dhali o uni gwo mo ki: Iiku/ i dhan ’peŋkuman bampa/ mo dhali wathi/ jin ḵali dhan dhur yi’de/ midi gam um ’kup̱ mo. Baṯẖi a’di nsho’k mo ma. 14 Dhali e mo yin jin mina a’di cic̱ mo tani oyi com gu’b gwo mo ki: Amanṯor Gwo o ki: Mane gu’b jin midi ta gu’b yilkina/ gom aha/ mo jin miga/ shwa to ka cim gi Mompe’kup̱anyolos nyaḵki imanciḵ gwom pem mo? 15 Dhali a’di midi ṯor um adhan gu’ba beega/ mo jin nyaŋu ka maḵamp̱o/ ap̱owa kamu/ mo, jin isha to ki korom korom mo dhali jin thosonkunu mo. E mun mo tani thosoni to mo ma gom ana mo. 16 Dhali imanciḵ a’di gwo iikin mo dhali p̱u’d mo e ’peŋkuman bampa/ mo dhali gam a’di me’d jin ṯorkina a’di uni gwo mo. Dhali uni thosonki to mo gom Mompe’kup̱anyolos mo be.

17 Dhali ki mo ta mom’pimpili/ mo tani a’di p̱u’dki’d nyaḵki kum piti kun ’koni ’kume’d i’ce’dka su/ mo. 18 Dhali ki uni ’kokina tharabeesa mo mmoshwa to mo tani Yesus ki o gwo mo ki: Ka jiŋ gana/ aha/ ṯora um gwo mo ki: Jan ṯal ’de/ ’peni um midi ’ciṯẖ aha/ is ki gwo mo, a’din ’de/ jin nyaḵki to shwa ki aha/ mo be. 19 Dhali uni ṯelki mii ’pen mo mmoḵal bwan diṯi’d mo dhali o a’di gwo mo ka baṯẖ ’pen ka rem ’kup̱ mo ki: A/aha/ ’taa? 20 A’di ki o uni gwo mo ki: A’di ta jin ṯal ’de/ ’peni um kun ’koni ’kume’d i’ce’dka su/ mo, a’di jin ’thup̱ki maaŋḵuthu’d nyaḵki aha/ eya sahana ’de/ mo be. 21 Haali/ Ya/ gi ’Kwani yaki’d mo me’d gwo jin ’kwarkunu mo gom a’di mo, hili wayyi e wathi/ jin ’ciṯẖki Ya/ gi ’Kwani is ki gwo mo. A’di midi ’taki ’bor ki isi ’bor gana/ mo gom wathi/ yansan mo waḵki/ a’di minu ’taki ’koki dho’th mo be.

22 Dhali ki uni ’kokin mo mmoshwa to mo tani a’di ki bu’th maaŋḵuthu’d mo dhali ’bora ’bor bwa i is mo dhali ’ce’d a’di mo dhali c̱iki uni mo dhali o gwo mo ki: Budhi a’di yansan mo ma. A’di ta is pem mo be. 23 Dhali a’di ki budha ḵubbaaya mo, dhali ki a’di c̱iki mom’bora ’bor bwa i is mo tani a’di ki c̱iki uni mo dhali uni ’baar mo p̱iki a’di mo be. 24 Dhali a’di ki o uni gwo mo ki: A’di yansan ta’da abas pem gi gwo jin gamu me’d jin ta jin this mo a’di jin wolki’d gom ’kwani ka ris mo be. 25 Ka jiŋ gana/ aha/ ṯora um gwo mo ki aha/ mina diki p̱i yiman maman cwa doḵ/e mo ntaga tee jin miga/ p̱i a’di jin ta jin this e Bampa/ ma Arumgimis mo be.

26 Dhali ki uni yuḵki gway mo tani uni iikin ka pije/ mo e ’kuwosh Seṯuun mo. 27 Dhala Yesus ki o uni gwo mo ki: Umi ’baar mo mini ṯa’k mo. Haali/ a’di ’kwarkunu mo ki: Aha/ mina ’kosha manhil ḵa’bal mo dhali ḵa’bal minu c̱eker bwa mo be. 28 Hili ŋ’ko’d mo tani ki aha/ minu cuyu mis mo doḵ/e tani aha/ mina ya iṯwa/a/ ki um e Pany Jaliil mo be. 29 Buṯerus ki o a’di gwo mo ki: Bahili waḵki/ uni gwansani ’baar mo mini ṯa’k mo tani aha/ mina diki biṯ mo be. 30 Dhala Yesus ki o a’di gwo mo ki: Ka jiŋ gana/ aha/ ṯora /e gwo mo ki mon’thiny yansan shwane/ mo nṯwa/a/ ka dhoŋgola ŋwa diki ko e me’di su/ mo naskina/ tani /e mini waṯ aha/ gway me’di kwara mo be. 31 Hili a’di oki gwo ka du jin daradar mo ki: Waḵki/ aha/ mina mii wu mo nyaḵki /e mo tani aha/ mina diki waṯ /e gway mo. Dhali uni ’baar mo nyaḵki o ’twan ṯal ’de/ mo be.

32 Dhali uni iikin mo e mo jin yuḵu gway ka Jaṯẖsemaani mo. Dhali a’di ki o imanciḵ a’di gwo gwo mo ki: ’Koyi imahan mo ma. Aha/ ki ya mo dhali ’tho mo. 33 Dhali a’di ki susa Buṯerus mo dhala Yakuub mo dhala Yohaan mo dhali mii ma c̱is ṯelki a’di ’pen mo mmobu’th a’di kagahara mo dhali bwa jin ṯocu ’kus si’da/ mo be. 34 Dhali a’di ki o uni gwo mo ki: Aḵashiram pem diṯa bwa ki diṯ kagahara mo, ma isi kan mmowu moyi. ’Koyi imahan mo ma dhali timi mo mo mmo’ko ki e i’kup̱ mo. 35 Dhali mmoyakina a’di mo mmothoṯẖ is ari’ceenne/ mo tani a’di biṯki’da ’cesh mo dhali ’tho mo waḵki/ a’di minu ’taki mish mii mo tani ki mo yan midi ’taki ya pe a’di mo. 36 Dhali a’di o gwo mo ki: Abba Ababa. Aris to ’baar mo mishu mii ki /e mo. Ḵalka ḵubbaaya yan ’peni aha/ mo ma. Hili a’di yisa jin oyaa/ bwa, hili a’di jin ta bwam pini mo be. 37 Dhali a’di p̱u’dki’d mo dhali gam uni ki uni ishki e mo dhali a’di ki owa Buṯerus gwo mo ki: Simaan, A/e ishki e kan mo? Bunya/ mina /e diki tim mo mo ka tenten ’de/ mmodi ki e i’kup̱ mo? 38 Timi mo mo ma dhali ’koyi ki e i’kup̱ mo dhali ’thoyi mo, ki um mini ’koki cic̱ mo e mo jin palu mo. Shi/in ka jiŋ gana/ a’di ona bwa mo tani hili buŋgwar is a’di ihatha’ko’d ki ha’th mo be. 39 Dhali doḵ/e a’di yaki’d mo dhali ’tho mo mmorash jasi gwon ṯal ’de/ e mo. 40 Dhali doḵ/e a’di p̱u’dki’d mo dhali gam uni ki uni ishki e mo haali/ em buni ṯo’dki uni is mo dhali uni ’koki mish gwo jin mina uni thoḵ a’di mo be. 41 Dhali me’di kwara mo doḵ/e tani a’di p̱u’dki’di uni mo dhali o uni gwo mo ki: A/um ’kon mo mmo/ish e kan mo dhali bu’th mosi/is bum mo? A’di ’koshi jwa mo ba/. Mo p̱u’du’d mo. Ya/ gi ’Kwani a’di ’ciṯẖkunu is ki gwo mo e me’d gi ’kwani kun ta imanmii miinthus mo be. 42 Cuyi mis mo. Dhalki ana iina mo. Hila uma? Aman’ciṯẖaa/ is ki gwo p̱u’dki’d hila/ mo be.

43 Dhali ki jahanne/ ki a’di di’di mmo/o gwo mo naskina/ mo tani Yahuusa p̱u’dki’d mo, a’di jin ’dap̱ tiya ’twa/ ka ’kume’d i’ce’dka su/ mo dhali a’di suski’da waambuhany ’kwani nyaḵki a’di mo ki gandala turga/ ime’d mo dhali cwa mo, ’peni igasiis kun can mo dhali iman’kwar to mo dhali ’kwaniŋ gwanyjaḵa/ mo be. 44 Dhali a’di jin ’ciṯẖki a’di is ki gwo mo c̱iki uni jamas mii mo mmo/o gwo mo ki: Jan ṯal ’de/ jin miga/ p̱i ’twa/ mo tani a’di ta wathi/ mo. Budhi a’di mo dhali susi a’di ki ’dantar mo. 45 Dhali ki a’di p̱u’dki’d mo tani a’di ki ya a’di ki jahanne/ mo dhali o a’di gwo mo ki: Tap̱a. Dhali a’di ki p̱i a’di ’twa/ mo be. 46 Dhali uni ’baar mo ki dhu me’d buni ap̱o/ a’di mo dhali bu’th a’di mo. 47 Hili jan ṯal ’deŋ kamu/ ’peni uni gwansan kun doshkin ki ’dishe/ mo tani a’di ki buḵ gandala turgam piti mo dhali ruṯẖun c̱iŋkina/ ma gasiis jin ca’d mo dhali ’ciṯẖ a’di ’cem piti mo be. 48 Dhala Yesus ki o uni gwo mo ki: A/um iiyin ka pije/ mmobu’th aha/ ki gandala turga/ ime’d mo dhali ki cwa mo, me’d mii jin miinu ap̱o/ wathin ’di/ mo? 49 Ka tee kun baṯẖani ’ko’d mo tani aha/ dikina mo e gu’b gi mondheleladhelel mo mmoṯor um gwo mo dhali um ’koki bu’th aha/ mo be. Hili dhalki Gwo jin ’kwarkunu mo thimu mo. 50 Dhali uni ’baar mo dhalki a’di me’d mo dhali so mo be.

51 Dhali wathin dhuruca kamu/ baṯẖki a’di nsho’k mo ki dar gi toŋ kamu/ i is mo, jasi burrinyen dhiny e jin ’kamkina a’di i is mo, dhali uni ki bu’th a’di mo. 52 Hili a’di dhalki burrinyen dhiny e mo dhali gus is ’te/ mo ki jasi burrinye/ jin hitha a’di i empa’d mo be.

53 Dhali uni ki susa Yesus eya gasiis jin ca’d mo. Dhali igasiis kun cani ’baar mo dhali ’kwaniŋ gwanyjaḵa/ mo dhali iman’kwar to mo uni tulki is mo be. 54 Dhala Buṯerus baṯẖki a’di nsho’k ’pena dhana/ mo. A’di ki ya ki sule/ e bwaagoŋ ma gasiis jin ca’d mo. Dhali a’di ki nyaḵ c̱a’b ki imanji mo mo dhali sam is piti i o’d mo be. 55 Dhali igasiis kun can dhali ’kwani gi montul is buni ’baar mo uni ŋap̱ki gwo mo mmo/o ap̱owa Yesus mo mmokar a’di mmowu mo tani hili uni ’koki gam ton ṯal ’deŋ kamu/ mo be. 56 Haali/ ’kwani tana ris ka ris kun ’ce’dki a’di gwo ap̱o/ mo dhali gwom buni gun ’ce’dkina uni a’di i is mo tani uni ’konuki gam me’d mo be. 57 Dhali kun tiya doshkin ki mis mo dhali ’ce’d a’di gwo ap̱o/ mo mmo/o gwo mo ki: 58 Aman ciḵkina gwo jin ona a’di mo ki: Aha/ mina ’kosh gu’b gi mondheleladhelel yansan mo, a’di jin nyaŋkunu ki me’d mo, dhali ka cim kwara mo tani aha/ mina nyaŋ jaŋ kamu/ jin ’konuki nyaŋ ki me’d mo be. 59 Isi gwom buni jin ’ce’da uni kan mo tani yisa gamu me’d mowa. 60 Dhala gasiis jin ca’d doshki’d ki mis mo e bwaman uni mo dhali doṯa Yesus gwo mo ki: A/e bunya/ diki ’de’k ’twaŋ kamu/ mo mmothoḵ gwo kana? Gwo gi wakatinta i/ona ’kwani gwansan ap̱o/ /e mo? 61 Hili a’di c̱a’bki’d ki shwam mo dhali yisa thoḵ ’twaŋ kamuwa. Dhala gasiis jin ca’d doḵ/e ki doṯ a’di gwo mo ki: A/e tana Ḵrisṯẖos jin ta Ya/ gi A’di jin Maŋu mowa? 62 Dhala Yesus ki thoḵ a’di gwo mo ki: Aha/ tana a’di mo, dhali /e mini p̱ar Ya/ gi ’Kwani e mo mmoc̱a’b ka bim poros gi mom’bi’th mo dhali mmodoḵu/ ka nyaŋ’ko’d mo e bwaaraḵ ’peni momis mo be. 63 Dhala gasiis jin ca’d dherki burrinyem p̱om piti bwa mo dhali o gwo mo ki: Katinta ic̱orkina ana gwo mo jin minu mii o mo? 64 Um ciḵki a’di walki gwo sor mo. Gwo jin gama um me’d mo wakata mo? Dhali uni ’baar mo waḵki a’di mo mmo/o ki a’di ha me’d mmowu mo be. 65 Dhali kun tiya ṯelki mii ’pen mo mmo’taḵ a’di manya/ i is mo dhali mmokum a’di bwam/em piti mo dhali dor a’di mo mmo/o gwo mo ki: Oyi gwo is mo ma. Dhali mmodora uniya dor ki me’d buni mo tani uni kun ta imanji mo mo bu’thki a’di mo be.

66 Dhala Buṯerus diki’d ka luŋgu’b mo e bwam ma goŋ mo, dhali nyarany c̱iŋkinan ’deŋ kamu/ ’peni jim ma gasiis jin ca’d mo tani a’di p̱u’dki’d mo. 67 Dhali mmonyiṯẖkina a’diya Buṯerus mo mmosam is piti i o’d mo tani ayim ḵu’thki a’di ki e mo dhali o gwo mo ki: /E si’da/ nyaḵki di ki wathi/ gi Pa Naasira yan jin ta’da Yesus mo. 68 Hili a’di waṯki gwo mo mmo/o gwo mo ki: Aha/ mola a’di mo walla ’pemen gwom pini jin ona /e mo tani a’di molka/ ’ban mo. Dhali a’di ki ya ka pije/ ki ’twaŋkala lambalany mo. Dhala dhoŋgola ŋwa gwoki’d mo be. 69 Dhali nyarany c̱iŋkina/ p̱arki a’di e mo dhali ṯel mii ’pen mo mmo/o a’di gwo mo doḵ/e e uni gwansan kun doshkin ki ’dishe/ mo ki: Wathi/ yansan ta jan ṯal ’de/ ’peni uni mo be. 70 Dhali doḵ/e a’di waṯki gwo mo. Dhali yan’ko’d doḵ/e ari’ceenne/ mo tani uni gwansan kun doshkin ki ’dishe/ mo tani ona Buṯerus gwo mo ki: Ka jiŋ gana/ /e ta jan ṯal ’de/ ’peni uni mo haali/ /e ta ji gi Pany Jaliil mo be. 71 Hili a’di ṯelki mii ’pen mo mmojee is piti jwa mo ki gwo jin thulkina a’di me’da p̱o/ mo, mmo/o gwo mo ki: Aha/ dinaki mish wathi/ yan mo, a’di jin okina um mo. 72 Dhali ki jahanne/ adhoŋgola ŋwa gwoki e me’di su/ mo. Dhala Buṯerus kana gwo e mo, ma gwo yin jin on ma Yesus a’di mo ki: Nṯwa/a/ ka dhoŋgola ŋwa diki ko e mo me’di su/ mo tani /e mini waṯ aha/ gway me’di kwara mo. Dhali ki a’di di’d mmoka gwo e ’baar mo ka baṯẖ ’pen mo tani a’di ’tul ma du mo dhali a’di gwoki’d ki jabu’th mo be.

<- MARKUS 13MARKUS 15 ->