1 Dhali ka tee c̱aan mo tani Hirodus jin ta’da rub ra/iis ciḵki gwo goma Yesus mo be. 2 Dhali a’di ki o c̱iŋkinam piti gwo mo ki: A’di ta’da Yohaan jin ta’da manmiiya mii ki yi’de/ mo be. A’di ’de’kkunu mo ’peni mowu mo. A’di miikina a’di aris to gwansan ki mom’bi’th mo. 3 Haala Hirodus bu’thki’da Yohaan mo dhali deḵ a’di mo dhali kar a’di eya sijin mo gom gway ma Hirodiyya mo ash ma kam piti ka P̱ilibbus mo be. 4 Haala Yohaan o a’di gwo mo ki: Haali/ a’di diki ta mii gi gwoŋḵan mmokar ayim mo be. 5 Dhali hili a’di ŋap̱ a’di mmo’kosh jwa mo tani a’di ḵo/ki ’kwani mo haali/ uni karki a’di ka manc̱i gwo ma Arumgimis mo be. 6 Hili ka cim jin dhodhuwa Hirodus p̱u’dki’d mo tani ’bwa/ ma Hirodiyya saki’d mo mbwambori ’kwani mo dhali a’di ’boro’da Hirodus bwa mo be. 7 Wakan a’di ki o a’di gwo is mo ḵa ba/ gom to jin mina a’di c̱iya yim mo to yin jin mina a’di doṯ a’di mo be. 8 Dhali ayim logomkina kum ki gwo mo mmo/o gwo mo ki: C̱iyaa/ ’kup̱ ma Yohaan jin ta’da manmii ki yi’de/ shwanesan mo e bwam ma sahan mo. 9 Dhala maliḵ a’di shina bwa mo, hili haali/ gom gwo jin ona a’di is mo dhali yilkinam piti mo tani a’di ḵanki gwo mo ki a’di minu guyu/ mo be. 10 A’di hashki gwo mo dhala Yohaan ’ciṯẖkunu ’kup̱ mo eya sijin mo be. 11 Dhali ’kup̱ piti guyunu mo e bwam ma sahan mo dhali c̱iki nyara/ mo dhala yim ki ḵalki a’di ki kum mo be. 12 Dhali imanciḵ a’di gwo p̱u’dkin mo dhali ḵal buŋgwar is piti mo dhali kan a’di mo, dhali uni iikin mo dhali ṯora Yesus gwo mo be.

13 Ka Yesus ciḵki gwo yansan mo tani a’di yaki’d mo ’peni mun eya ḵur yi’de/ mo e mo jin dar gi ’kwani mo is ’ko’d mo be. Hili ka waambuhany ’kwani ciḵki gwo mo tani uni iikin mo mmobaṯẖ a’di nsho’k mo ki sho’k ’peni bampa/ mo. 14 Ki a’di yaki’d e shemena gap̱ mo tani a’di p̱arki’da dhana waambuhany ’kwani e mo, dhali a’di ki ḵo’c uni e i is mo dhali wac̱ ’ba’th buni mo be. 15 Ki mo ta mom’pimpili/ mo tani imanciḵ a’di gwo p̱u’dkini a’di mo dhali o a’di gwo mo ki: Mo yansan dar gi ’kwani mo be dhali shwane/ atente/ yulu’d mo. Hashka waambuhany ’kwani bway pa mo ma mmoyol tonṯe/ gom is buni mo. 16 Yesus ki o uni gwo mo ki: Uni mini mii ta gi bway mmo/ii bway pa mo yisa. Um mini c̱i uni tonṯe/ mmoshwa mo be. 17 Uni ki thoḵ a’di gwo mo ki: Am tana gi jasi maaŋḵuthu’di mudhe’d mmahan mo dhali to yi’de/ isu/ mo be. 18 Dhali a’di ki o uni gwo mo ki: ’Doyi uni mmahani aha/ mo ma. 19 Dhali yan’ko’d a’di ki ḵana waambuhany ’kwani gwo mo mmo’ko ’pena ’cesh ap̱owa sho mo. Dhali a’di ki bu’th maaŋḵuthu’di mudhe’d mo dhali to yi’de/ nsu/ mo tani a’di ki hil ’kup̱ ki ’ce’d a’di mo dhali a’di ki c̱i maaŋḵuthu’d ki imanciḵ a’di gwo mo dhali imanciḵ a’di gwo ki c̱iki uni ka waambuhany ’kwani mo be. 20 Dhali uni ’baar mo shwaki a’di mo dhali uni kap̱kunu mo. Dhali uni ’tu’dkina nura/ i’kume’d i’ce’dka su/ mo ki ’pisira/ maa kun ’ce’dkunu mo gun uri ’kup̱ mo be. 21 Dhali uni gwansan kun shwakin mo tani ta ’kwaniŋ gwas alaap̱i mudhe’d mo mmodhal up̱ ka p̱o/ mo dhali uc̱i mo be.

22 Dhali yan’ko’d a’di ki ṯor imanciḵ a’di gwo gwo mo mmose bwaa ḵur mo dhali iiyi ṯwa/a/ ki a’di mo mmo’ciṯẖa/ gap̱ gi ’bana kamu/ mo ki a’di di’d mmodhala waambuhany ’kwani bway mo mmo/ii bway pa mo. 23 Dhali yan’ko’d ki a’di dhalki’da waambuhany ’kwani ’pen mo tani a’di yaki bway ’kuwosha turga/ mo a’di ’de/ mo mmo’tho mo be. Ki mom’pimpili/ p̱u’dki’d mo tani a’di diki’d a’di ’de/ mmun mo. 24 Hila ḵur ka tente/ yan mo tani a’di si’da ŋaṯgin ka ris ’pena gap̱ mo. A’di dorkina ’tham mo haali/ ’tham poshki’da p̱o/ uni mo be. 25 Dhali ki mo ta mon’twash/e mo tani a’di pu’dki’d e uni mo mmoya ki sho’k e ’kup̱ yi’de/ mo be. 26 Hili ki imanciḵ a’di gwo p̱arki a’di e mo mmoya ki sho’k e ’kup̱ yi’de/ mo tani uni deekina is mo kagahara mo mmo/o gwo mo ki: A’di ta’da arum mo be. Dhali uni cuukin mo kagahara haali/ uni ḵo/ki is mo be. 27 Hili ki jahanne/ a’di ṯorki uni gwo mo mmo/o gwo mo ki: ’Bithi adu is mo ma. Aha/ tana a’di mo be. Dhalku/ is ki ḵo/ mo ma.

28 Dhala Buṯerus ki thoḵ a’di gwo mo ki: Tap̱a, waḵki/ /e ta a’di mo tani yuḵi aha/ mmoyaku/ i /e i’kuyi’de/ mo ma. 29 A’di ki o a’di gwo mo ki: Yayu/ mo ma. Wakan Buṯerus cuki mis ’pena ḵur mo dhali ya ki sho’k e ’kuyi’de/ mo dhali p̱u’da Yesus mo. 30 Hili ki a’di p̱arki ’tham e mo tani a’di ḵo/ki is mo dhali ṯelki mii ’pen mo mmocic̱ yi’de/ mo. A’di gwoki’d mo ki: Tap̱a, woṯẖi/ aha/ mo ma. 31 Dhala Yesus ki jahanne/ a’di jidhirki me’d piti mo dhali bu’th a’di mo mmo/o a’di gwo mo ki: Ayy wathi/ jin gwa’da moŋgam gwo is ki gwa’d mo. Atinta shina /e bwa ’kup̱ kan mo? 32 Dhali ki uni cic̱kin e bwam ma ḵur mo tani ’tham doshki’d mo be. 33 Dhali uni gwansan kun ’kon e bwam ma ḵur mo tani luŋki a’di mo mmo/o gwo mo ki: Ka jiŋ gana/ /e ta Ya/ ma Arumgimis mo be.

34 Dhali ki uni ’ciṯẖkina gap gi ’bana kamu/ mo tani uni p̱u’dkin mo e Bampa/ gi Pa Jannisaaraṯ mo be. 35 Dhali ki ’kwani gi mo c̱aan nyiṯẖki a’di mo tani uni hashki gwo e bampa/ ’baar mo kun ’kon ka kukul is mo dhali ḵala ris ’kwani kun ’bathan e a’di mo be. 36 Dhali uni ŋap̱ki a’di mo mmo’taki ta a’di ’twaman burrinyem piti is ki me’d mo. Dhali aris uni gun taki a’di is ki me’d mo tani ’borkunu is mo be.

<- MAṮṮA 13MAṮṮA 15 ->