1 Dhali ka cim gwansan tani gwoŋḵan hashu mo ’pena Ughusthus Kaysar ki aris ’kwaniny’ceshi ’baar mo minu mii ’kwar gway buni mo. 2 A’di ta mo gi ’kwaru gway jin ṯwa/a/ jin miikunu ka Kiriniyuus ta’da mudhiir gi Pan Suriyya mo be. 3 Dhali uni ’baar mo iiki bway pu buniŋ gana/ mo ki she/ ki she/ mo mmo’kwar gway buni mo be. 4 Dhala Yuusup̱ yaki’d mo si’da/ ’peni Pany Jaliil mo. A’di yaki’d mo ’peni Pa Naasira em Bampa/ Yahuudiyya mo em Pan Dawuu’d jin yuḵu ka Beeṯlaham si’da/ haali/ a’di ta ’kwani gi gu’b ma Dawuu’d mo dhali awaḵ ma Dawuu’d mo be. 5 A’di yaki’d mo mmo’kwar gway ki is piti mo uni ka Mariyam jin ta a’di jin onu a’di ki bu’th mo, dhali a’di si’da/ cana bwa mo be. 6 Dhali ki uni ’kokin mo imun mo tani acim p̱u’dki’d mo jin mina a’di dho’th mo. 7 Dhali ayim dho’thki’da bwa nyaram piti jin ta ya/ mo. Dhali a’di ki ’tam a’di is ki burrinye/ dhali ’thi a’di eya kaḵ bip̱ mo haali/ mo p̱iyi’d gom uni e gu’b yilkina/ mo be.
Imanhil Ḵa’bal dhali Iman’doyu Gwo mo
8 Dhali e bampa/ yansan ki mon’thiny mo tani imanhil ḵa’bal ’kona pije/ mmohil ḵa’bal buni mo be. 9 Dhala man’doyu gwo gi Tap̱a piki uni i is mo dhali monyca gi Tap̱a ’twaḵi mo mo e isi uni mo dhali uni ḵo/kina ḵo/ is kagahara mo be. 10 Dhala man’doyu gwo ki o uni gwo mo ki: Dhalku/ is ki ḵo/ mo ma, haali/ aha/ guyina um gwom ’boro’d dhali gwo mmo’bor um bwa kagahara mo jin midi di goma ris ’kwani ’baar mo. 11 Haali/ ka tee yansan mo tani Amanwoṯẖ jin ta Tap̱a Ḵrisṯẖos a’di dho’thkunu mo gom um e Pan Dawuu’d mo be. 12 Dhali ki jamas mii yan mo tani a’di mina umi nyiṯẖ a’di mo be. Um mini gama ŋa/ ’tamkunu is ki burrinye/ mo dhali mmo/isha kaḵ bip̱ mo be. 13 Dhali ise/ iman’doyu gwon tiya ka ris ris ’peni momis nyaḵki ’ko ka man’doyu gwo mo be. Uni maŋana Arumgimis mo dhali o gwo mo ki:
14 Monyca ma Arumgimis isi momis mo,
dhali moŋḵu’th is e mony’cesh e bwaŋ ’kwani gun ’bora a’di bwa i is mo.
15 Dhali ki iman’doyu gwo doḵkin mo ’peni uni imomis ka nyaŋ’ko’d mo tani imanhil ḵa’bal o gwo ka rem ’kup̱ ki: Dhalki ana iina mo shwane/ e Pam Beeṯlaham dhali p̱ar to yan e jin yayi’d jin ṯora Tap̱a ana mo. 16 Dhali uni iikin mo ise/ tani gamkina Mariyam dhala Yuusup̱ dhali ara ŋa/ mmo/isha kaḵ bip̱ mo be. 17 Dhali ki uni p̱arki a’di e mo tani uni ṯori gwo jin ciḵkina uni mo goma ’ci yan mo be. 18 Dhala ris ’kwani gun ciḵki a’di mo tani meren ki gwo gwansan gun ona imanhil ḵa’bal uni mo be. 19 Hila Mariyam a’di di’d mo mmodhu gwo gwansan mo mmokulum uni eya dum piti mo be. 20 Dhali imanhil ḵa’bal doḵkin ka nyaŋ’ko’d mo mmokara Arumgimis ki ca mo, dhali maŋki a’di mo goma ris to gun ciḵkina uni mo dhali kun mishkina uni mo me’d ji gi onu uni mo be.
Mo jin C̱inuwa Yesus ka Arumgimis e Gu’b gi Mondheleladhelel mo
21 Dhali ki mo thimi’d mo ka cim pekwara mo tani ki a’di ’ciṯẖkunuwa munyjal yis piti mo tani a’di yerkunu gway ka Yesus mo, gway jin c̱ikin ma man’doyu gwo mo nṯwa/a/ ki a’di ’kokunu mo mmobwaa mo e bwa mo be.
22 Dhali ki mo p̱u’dki’d mo gom mondhelel is buni mo isi ki gwoŋḵan ma Musa jin c̱inu mo tani uni suski a’di mo e Pa Urushaliim mo mmoc̱i a’di ki Tap̱a mo 23 (me’d gwo jin ’kwarkunu mo e gwoŋḵan gi Tap̱a jin c̱inu mo ki: Aris uniŋ gwaṯẖ ka ’deṯe/ ’deṯe/ kun ḵa’dki bwan dho’th mo tani uni minu yuḵ gway ki uni kun dhelelin mo gom Tap̱a mo.) 24 Dhali uni suski a’di mo si’da/ mmomii to mmo’ciṯẖa/ basa ’cesh mo isi me’d gwo jin okina gwoŋḵan gi Tap̱a jin c̱inu mo ki bimbir gurko/ su/ walla gurko/ kun bap̱ani su/ mo be. 25 Dhali wathi/ diki’d mo e Pa Urushaliim jin yuḵu gway ka Simaan dhali wathi/ yan ta a’diŋ ḵar/e mo dhali ta a’diŋ gayiin mo a’di jin c̱orki momalas gi ’Kwani ma Israyiil mo dhali Shi/in Dheleladhelel diki’da po/ a’di mo be. 26 Dhali a’di ṯorkunu a’di eya tente/ mo ki Shi/in Dheleladhelel mo ki a’di midi ’taki diki wu mo nṯwa/a/ ki a’di diki p̱ar Tap̱a jin ta’da Ḵrisṯẖos e mo be. 27 Dhali a’di shi/inkunu mo ki Shi/in mo tani a’di p̱u’dki’d mo e gu’b gi mondheleladhelel mo. Dhali ki com dhali kum suskina ’ci jin ta’da Yesus mo tani mmomii a’di me’d isi mii gi gwoŋḵan jin c̱inu mo tani 28 a’di bu’th a’di mo ’ko’da bim piti mo dhali ’bora Arumgimis bwa i is mo dhali o gwo mo ki:
29 Tap̱a, dhalki c̱iŋkinam pini ya’d mo ki moŋḵu’th is mo ma, isi ki gwom pini mo,
30 haali/ em pem p̱arki bway gi mowoṯẖ pini e mo
31 a’di jin thosonkina /e mo e buŋ’kus gi ’kwani ’baar mo,
32 moŋkush yan mmo’cee eya tente/ gom ’kwani kun ’koki ta ’Kwani Yahuuda/ mo
dhali gom monyca gom ’Kwanim pini ma Israyiil mo.
33 Dhali com dhali kum uni merkin mo gom gwo yan jin okina a’di gom a’di mo. 34 Dhala Simaan ’bor uni mii mo dhali owa Mariyam jin ta kum gwo mo ki:
Hili mo mo ma, a’ci yan karkunu mo gom ku gi ṯa’kkin mo dhali mmocu ’Kwani ma Israyiil ka ris mo,
dhali gom jamas mii c̱aan jin okunu gwo mo ap̱o/ a’di mo tani
35 (dhali gandala turga/ midi suka ḵashiram pini mo si’da/)
ki gwo kun kulumu ka ris eya du mo minu ṯor eya tente/ mo.
36 Dhali ayima ’bomiŋ kamu/ diki’d mo jin ta’da Hanna mo. A’di ta ’bwa/ ma P̱anu/iil mo ’pena waḵ ma Ashiir mo. Ayim a’di caki’d ki yil kagahara mo dhali a’di c̱a’bki’d mo nyaḵka kaṯẖim piti mo ki yil pesu/ mo ’peni yil jin dina a’di ki nyaraŋ gana/ mo 37 dhala yim wun ma kaṯẖim piti mo dhali a’di di’d kan ntagi yil issi*arba wa ṯamaniin doŋon i’ce’dka doŋon apo/ mo be. Dhala yim diki ya mo ’peni gu’b gi mondheleladhelel mo mmoluŋa luŋ mo ki moŋga/ to mo dhali mmo’tho mo ki mon’thiny mo dhali ki montee ilu/ mo be. 38 Dhali ki mo warki’d mo ka tente/ yan mo tani ayim pu’dki’d mo dhali ’bora Arumgimis bwa i is mo dhali mmo/o gwo mo gom a’di gom uni ’baar mo kun ’kokin mo mmohil gom mowan ’ba/ gi Pa Urushaliim mo.
Mondoḵ jin Doḵa Uni ka Nyaŋ’ko’d e Pa Naasira mo
39 Dhali ki uni ’baarkina ris to mii mo me’d isi ki gwoŋḵan gi Tap̱a jin c̱inu mo tani uni doḵkin ka nyaŋ’ko’d mo e Pany Jaliil mo e ’peŋkuman bampam buniŋ gana/ mo e Pa Naasira mo. 40 Dhali a’ci ca’d mo dhali ’bidhu is mo dhali ’tu’du mo ki moyuḵ mo. Dhala ’the ma Arumgimis c̱a’bki’da p̱o/ a’di mo be.
Yesus jin Ta Ari Washan Diki’d e Gu’b gi Mondheleladhelel mo be.
41 Dhali com dhali kum uni iikin isa yempa/ e Pa Urushaliim mo ki yil mo gom Mompe’kup̱anyolos mo be. 42 Dhali ki a’di ’kona yili ’kume’d i’ce’dka su/ mo tani uni iikin mo me’d isi mii jin miinu mo be. 43 Dhali ki Mompe’kup̱anyolos ’baarki’d mo tani me’d jin doḵkina uni bway pa mo tani aYesus jin ta’da ’ci a’di c̱a’bki’d mo ŋ’ko’di uni mo e Pa Urushaliim mo. Com dhali kum ’koki mish a’di mo, 44 hili uni ṯoshkin ki a’di midi di i bwaŋ ’kwani mo tani uni iikin ka tee iiyan mo dhali uni ŋap̱ki a’di mo e bwaŋ ’kwani ma bas buni mo dhali ’kwani kun misha uni mo. 45 Dhali ki uni ’koki gam a’di mo tani uni doḵkin ka nyaŋ’ko’d mo e Pa Urushaliim mo dhali ŋap̱ a’di mo. 46 ’Ko’da cim kwara mo tani uni gamki a’di mo e gu’b gi mondheleladhelel mo mmoc̱a’b mo e bwam imanṯor gwo mo mmociḵ gwo ’peni uni mo dhali mmodoṯ uni gwondoṯ mo. 47 Dhali aris uni kun ciḵ a’di mo tani uni merkin mo gom a’di mo mmomisha a’di gwo ’ban mo dhali gwonthoḵ piti mo be. 48 Dhali ki uni p̱arki a’di e mo tani uni merkin mo dhali ata’dam piti ki o a’di gwo mo ki: Ya/um, atinta miina /e aman wakan mo? Hili mo mo ma. Babam pini dhali aha/, aman ŋap̱kina /e ki mo/anan is mo be. 49 Dhali a’di ki o uni gwo mo ki: Atinta ŋap̱kina um aha/ mo? A/’kona um ki mish mo mowa ki aha/ mina mii di e gu’b ma Babam pem mo? 50 Dhali uni mol gwom piti ’ban jin ona a’di uni mo be. 51 Dhali a’di ya’d ka luŋgu’b nyaḵki uni mo dhali p̱u’d mo e Pa Naasira mo dhali a’di haki gwom buni e mo, dhali ata’dam piti a’di kulumki’da ris to gwansan eya dum piti mo be.
52 Dhala Yesus maru moyuḵ is mo dhali a’di ’tuntilkina buŋgwar is mo dhali ki yil mo, dhali ka ’the ma Arumgimis mo dhali ki jiŋ ’kwani mo be.
