1 Dhali a’di diki’d mo mmo’tho mo e moŋkamu/ mo dhali ki a’di daḵki ’tho mo tani jan ṯal ’deŋ kamu/ ’peni imanciḵ a’di gwo o a’di gwo mo ki: Tap̱a, ṯori aman gwo mo ma, mmo’tho mo me’da Yohaan mmoṯorkina a’di imanciḵ a’di gwo gwo mo. 2 Dhali a’di ki o uni gwo mo ki: Ki um mini ’tho mo tani oyi gwo cikise/ mo ma:

Ababa, dhalki gway pini a’di ḵogu mo ma. Dhalki bampam pini a’di yayi’d mo. 3 C̱i am tonṯem bam jin ta ji gi isa yempa/ mo ma. 4 Dhali dhal am amure/ miinthus bam ’pen mo ma, haali/ am ki is bam dhalkina ’kwani ’baar ’pen ka ’deṯe/ ’deṯe/ mo, uni gun ’kon ma mure/ miinthus bam m’ba/ mo. Dhali dhalku/ ki sus am mo e mo jin palu mo.

5 Dhali a’di ki o uni gwo mo ki: Jana ’peni um jin ta’d ka mugu mo jin midi ya i a’di mombwam/e mo dhali o a’di gwo mo ki: Amuguwa, c̱i aha/ maaŋḵuthu’di kwara mo ma 6 haala mugum pem p̱u’dki’d mo ’peni bway jin yayina a’di mo dhali aha/ dara ki to mmokar a’di mbwambor mo. 7 Dhali a’di midi thoḵ gwo mo ’peni gu’b ki: Dhalku/ ki ṯocaa/ ’kus mo. Acampur di’d ki mu’th mo shwane/ dhali uc̱im pem uni ’kona ci nyaḵki aha/ mo be. Aha/ mola cu mis mo dhali c̱iki /e toŋ kamu/ mo be. 8 Aha/ ṯora um gwo mo, ba a’di midi diki cu mis mo dhali c̱i a’di toŋ kamu/ mo haali/ a’di ta’da mugum piti mo, hili gom mmodina a’di ki ’the is mo tani a’di midi cu mis mo dhali c̱i a’di to yin jin mina a’di mii ta mo be. 9 Dhali aha/ ṯora um gwo mo ki: Doṯi to mo ma, dhali a’di minu c̱i um mo. Simmi mii e mo ma dhali um mini gam a’di mo. Nagkani acampur ap̱o/ ki me’d mo ma, dhali a’di minu ḵa’dki um mo be. 10 Haala ris ’kwani ’baar mo ka ’deṯe/ ’deṯe/ gun doṯki to mo tani bu’thki to mo dhali a’di jin simmki to e mo tani gamki a’di mo dhali a’di jin nagkanki’da campura p̱o/ ki me’d mo tani a’di minu ḵa’dki a’di mo be. 11 Ababa jana di’di bwam um mo, waḵki/ ya/ ki doṯ a’di gwo gom wa’c mo, dhali a’di midi dhal wa’c e i is mo dhali c̱i a’di tasha/ mo ’taa? 12 walla waḵki/ a’di doṯki a’di mo goma oma ŋwa mo tani mina a’di c̱i a’di a’daḵ mo ’taa? 13 Waḵki/ um kun ta thus kan mo mish mmoc̱i tom ’boron ki me’d mo ki uc̱im bum mo tani bakata ’te/ imin ma Baba gi momis mo c̱i Shi/in Dheleladhelel mo ki uni gwansan kun doṯki a’di mo?

14 Dhali a’di di’d mmo/ura ruma ’cesh ka pije/ mo ’peni wathi/ jin mol ’twa/ wal mo. Dhali ka ruma ’cesh yaki’d ka pije/ ’peni wathi/ jin mol ’twa/ wal mo tani a’di mishki gwo o mo dhali ’kwani merkin mo be. 15 Dhali ’kwanin tiya o gwo mo ki: A’di urki’da ruma ’cesh ka pije/ ki gway ma Baalsebuul jin ta tap̱a ma ruma ’cesh mo. 16 Ka yiha/ ’kwanin tiya si’da/ palki a’di mo mmodoṯkina uni jamas mii ’peni momis mo. 17 Hili a’di mishki gwo jin kulumkina uni eya dum buni mo dhali o uni gwo mo ki: Aris bampa/ kun ḵwa/kunu bwa e is buni mo tani uni shi/kin mo dhali gu’b a’di biṯki’da p̱o/ gu’ba kamu/ mo. 18 Dhali waḵka Seṯaan si’da/ ḵwa/i bwa mo ap̱o/ is piti mo tani ki bampam piti midi dosh kata mo? Haali/ um o gwo mo ki aha/ urkina ruma ’cesh ka pije/ ki gway ma Baalsebuul mo. 19 Dhali waḵki/ aha/ ura ruma ’cesh ka pije/ ki gway ma Baalsebuul mo tani iya/m bum ur uni ka pije/ katinta mo? Wakan uni mini ta imandwall gwo gom um mo be. 20 Hili waḵki/ a’di ki me’d ma Arumgimis mo jin urkika/ aruma ’cesh ka pije/ mo tani yan’ko’d Bampa/ ma Arumgimis midi p̱u’du/ ap̱o/ um mo be. 21 Ki wathi/ jin ’bitha’bi’th mo hi’thki’da goŋgoro/ e is piti ’baar mo mmodi mo mmoji gu’b pitiŋ gana/ mo tani tom piti kun tana a’di mo tani dhunu ki mo ma ḵu’th is mo be. 22 Hili waḵki/ jan ’deŋ kamu/ jin ’bitha’bi’th mo mmobol a’di e mo gam a’di ’kup̱ mo dhali p̱i a’di e mo tani a’di ki budha goŋgorom piti jin gama a’di gwo is mo tani a’di midi ḵwa/ tom piti jin budhu bwa mo be. 23 A’di jin diki c̱a’b nyaḵki aha/ mo tani a’di di’d ap̱o/ aha/ mo dhali a’di jin diki nyaḵ is tul ki aha/ mo tani a’di ta a’di jin ḵwa/i bwa mo.

24 Ka rum thus kun nyo/on iikin ka pije/ ’peni wathi/ mo tani a’di yaki’d ki tur mo e mo jin dar gi yi’de/ mo mmoŋap mo mo mmosi/is mo. Dhali a’di diki gam moŋkamu/ mo tani a’di o gwo mo ki: Aha/ mina doḵ e gu’b pem ka nyaŋ’ko’d mo ’peni mo jin yayika/ mo ’peni cine/ mo. 25 Dhali ki a’di p̱u’dki’d mo tani a’di gamki a’di ki a’di dhi’thkunu mo dhali to thosonkunu ki ’bore/ mo be. 26 Yan’ko’d a’di ki ya mo dhali susa rum pesun tiya mo kun shi/ashi/ mo kun bol a’di ki is pitiŋ gana/ e mo dhali uni cic̱kin mo dhali ’ko imun mo. Dhali mondiŋ ’ko’d gi wathi/ yan mo tani a’di warki’d ki shi/ mo mmobol jin ṯwa/a/ e mo be.

27 Ki a’di oki gwo yansan mo tani a’boma kamu/ ’peni bwam ma waambuhany ’kwani mo tani a’di eḵki cuuwa/ mo dhali o gwo mo ki: Mom’bor mii gom bwa gi a’di jin dhothi /e mo dhali ako yan jin p̱ikina /e mo be. 28 Hili a’di ki o gwo mo ki: Mmodhal gwo yansan e i is mo mmo/o gwo mo ki: Mom’bor mii gom uni gwansan kun ciḵki Gwo ma Arumgimis mo dhali mmodhu uni mo be.

29 Ka waambuhany ’kwani marki is mo tani a’di ṯelki gwo ’pen mo mmo/o gwo mo ki: ’Kwani ma nyaḵum yil gwansan mo tana nyaḵum yil kun ta thus ki thus mo. Uni ŋap̱ki jamas mii mo, hili jamas miiŋ kamu/ yisa minu c̱i gom uni yisa hili isi ciki/ jamas mii ma Yuunaan mo be. 30 Haali/ me’da Yuunaan warki’d ki jamas mii gom ’kwani gi Pa Ninawa mo tani wakan mina Ya/ gi ’Kwani ita goma nyaḵum yil gi ’kwani gwansan mo be. 31 A’bom jin ta’da maliḵ ’peni ’ko’d gwar ma biny cam mo tani a’di midi cuyi mis mo dhali dwall gwo mo nyaḵki ’kwani ma nyaḵum yil gwansan mo, dhali waḵ uni mo, haala yim a’di pu’dki’d mo ’peni ’pemen gi mony’cesh mo mmociḵ yuḵ ma Sulemaan mo, dhali hili mo mo ma, jan ṯal ’deŋ kamu/ jin eḵa/ eḵ jin bolki’da Sulemaan e mo tani a’di di’d mmahan mo be. 32 ’Kwani gi Pa Ninawa mini cu mis mo e gwon dwall mo nyaḵki ’kwani ma nyaḵum yil gwansan mo dhali waḵ uni mo, haali/ uni ri’ckina du is mo ’peni gwo jin c̱in ma Yuunaan uni mo, dhali hili mo mo ma, jan ’deŋ kamu/ jin eḵa/ eḵ mo mmobola Yuunaan e mo tani a’di di’d mmahan mo be.

33 Wathiŋ kamu/ yisa di’da ki a’di c̱i’thki’da lamba/ mo dhali kar a’di e jis jin c̱wanyu mo e bwaŋ gu’b mo walla mmokar a’di mo e bwaŋ’kwariny toŋ’kul bwa mo hili a’di ki dhal a’di mo mmodi eya p̱o/ ṯirkina/ mo ki uni gwansan kun cic̱ki gu’b mo tani mini mish moŋkush mo be. 34 Em bum a’di ta’da lamba/ gom buŋgwar is bum mo be. Waḵki/ em bum ṯal ’de/ mo tani buŋgwar is bumi ’baar mo ’tu’du/ mo ki moŋkush mo be. Hili waḵki/ a’di diki ṯal ’de/ mo tani buŋgwar is bum ’tu’dkunu mo ki mondhurumi’d mo be. 35 Wakan miiyi ki ’bore/ mo ma, gom moŋkush jin di’d e /e mo jin mina a’di diki dhurum mo mo. 36 Yan’ko’d waḵki/ buŋgwar is bum ’tu’du/ mo ki moŋkush mo tani mmodar gi mondhurumi’d e ’bana kamu/ mo tani a’di ’baar ka ’bimpil mo midi ’twaḵ mo mo me’da bi ma lamba/ jin c̱i um moŋkush mo be.

37 Ki a’di di’d mmo/o gwo mo tani Wathim P̱arisi doṯki a’di mo mmoshwa to nyaḵki a’di mo. Wakan a’di yaki’d nyaḵki a’di mo dhali c̱a’bki’da tharabeesa mmoshwa to mo. 38 Dhali Wathim P̱arisi merki’d kagahara mo mmop̱ar a’di e mo mmodina a’di ki ’thur me’d ki yi’de/ nṯwa/a/ ki tonṯe/ gi montee mo. 39 Dhali Tap̱a o a’di gwo mo ki: Shwane/ um ’Kwani P̱arisiyiin, um lamki ’ko’d gwar ma ḵubbaaya mo dhala sahan mo tani dhali hili e bwaman mo tani um ’tu’dkunu mo ki mondil to mo dhali ki mii kun ’coḵa’coḵ mo. 40 Um p̱us gwahan. Dina a’di jin uḵki ’ko’d gwar ki uḵ bwaman mo si’da/ ’taa? 41 Hili c̱iyi to jin minu c̱i ki me’d mo gom ’kwani kun hatha’ko’d mo, to gwansan kun ’koni cine/ mo dhali hili mo mo ma, aris to ’baar mo ta kun dhelelkin mo gom um mo be.

42 Hili wayyi e um ’Kwani P̱arisiyiin, haali/ um c̱ina nana/ ki to jin c̱inu Arumgimis mo dhali jip̱in to jin wana e ka guremu/ mo dhali aris jip̱i/ kun ḵuyi mo ki ḵuy mo dhali um ki ta p̱iny is mo e momii miiŋḵar/e mo dhali mo/en ma Arumgimis mo. To gwansan ḵa ba/ mina umi mii thim mo ba/ dhali mmo’koki ta p̱iny is gom miin tiyan tiya mo. 43 Wayyi e um ’Kwani P̱arisiyiin haali/ um eni moŋ’kom ’borga/ mo e gu’b gi montul is mo dhali um eni monthe me’d e mo ma suug mo. 44 Wayyi e um haali/ um wana e ki moŋ’kup̱aje kun ’konuki mish mo dhali ’kwani ki ii i’kup̱i uni mo mmo’kona uni ki mish uni mo be.

45 Amanmisha jo’d gwoŋḵana kamu/ ’de/ thoḵ a’di gwo mo ki: Amanṯor Gwo, e gwo yan jin ona /e mo tani /e ki waḵ am si’da/ mo be. 46 Dhali a’di ki o gwo mo ki: Wayyi e um kun ta imanmisha jo’d gwoŋḵan mo si’da/ haali/ um ki dhu ’kwani to kun diṯa mii ki diṯ mo mmoḵal mo tani dhali um ki is bum ’koki ta tondiṯi’d is ki me’d mo ki ari me’d buma ṯal ’deŋ kamu/ mo be. 47 Wayyi e um mo haali/ um nyaŋki moŋ’kup̱aje gi imanc̱i gwo ma Arumgimis kadhamo/ mo, uni gun ’koshkina ibabam bum mo be. 48 Wakan um ta iman/o gwo ap̱o/ mo dhali gam gwo me’d mo gom mii gi ibabam bum mo haali/ uni ’koshki uni jwa mo dhali um nyaŋki moŋ’kup̱ajem buni mo be. 49 Wakan si’da/ Moyuḵ ma Arumgimis o gwo cikise/ mo ki: Aha/ mina hashki uni imanc̱i gwo ma Arumgimis kadhamo/ mo dhali imandhunu ki she/ mo, dhali kun tiya i bwam uni mo mina uni i’kosh jwa mo dhali kun tiya mina uni iṯo’c bwa kagahara mo 50 ka bas gi imanc̱i gwo ma Arumgimisi ’baar mo kadhamo/ mo jin wolkunu mo ’peni mo gi ḵa’bu mony’cesh mo tani minu doṯ to mo ’pena nyaḵum yil gi ’kwani gwansan mo be, 51 ’pena bas ma Habiil mo ntaga bas ma Sakariyya mo tani a’di jin ’ce’dkunu sho’k mo e bwaman ma gwaṯa/ jin karu mo mmomiiya bas mo dhali e gu’b gi mondheleladhelel ma Arumgimis mo. Nye, aha/ ṯorkina um gwo mo ki a’di minu doṯ mo ’peni ’kwani ma nyaḵum yil gwansan mo be. 52 Wayyi e um mo kun ta imanmisha jo’d gwoŋḵan mo. Haali/ um bu’thkina mup̱tha/ gi moyuḵ mo. Dhali um ki is bum ’koki cic̱ mo dhali um ki non uni gwansan kun cic̱kin mo be.

53 Me’d jin yakina a’di mo ’peni mo c̱aan mo tani iman’kwar to dhali ’Kwani P̱arisiyiin ṯelki mii ’pen mo mmodhu gwo mbwa mo gom a’di kagahara mo dhali uni ki ’cwar a’di ki gwo mo jin mina a’di oya ris ton tiya mo 54 mmotimkina uni a’di mo mmoc̱or mo gom a’di mo mmocesh a’di ki gwo jin mina a’di ’taki o gom toŋ kamu/ mo be.

<- LUUKA 10LUUKA 12 ->