Gwo jin ’Kwar ma YAHUUSA mo

1 Yahuusa jin ta c̱iŋkina/ ma Yesus Ḵrisṯẖos mo dhali jin ta’da kam ma Yakuub mo.

E uni gwansan kun yuḵkunu mo ki ku gi en ma Arumgimis jin ta’da Baba mo dhali kun dhunu goma Yesus Ḵrisṯẖos mo be.

2 Dhalki momiimii mo dhali moŋḵu’th is mo dhali mo/en minu mar is gom um mo.

3 Um gun enka/ mo tani dhali mmo/oka/ bwa kagahara mo mmo’kwarki um gwo mo gom mowoṯẖ bana jin nyaḵki’d mo tani aha/ gamkina a’di jin ta jin minu mii mii ta mo mmo’kwar mo mmoyip̱ ’kup̱ ’kup̱ki um mo mmosu’k ki gwo mo gom moŋgam gwo is mo, a’di jin c̱inu mo me’d ’de/ ki sule/ mo gom uni kun dhunu ki she/ ki dhelel dhelel mo. 4 Haali/ ’kwanin tiya ’kokin ka ḵwal is mo kun gam bway mo mmose mo, uni gun ’kokin kadhamo/ mo kun ’kawurkunu mo gom miiwaḵ yansan mo be, uni gun ta ’kwani gun ushkina Arumgimis mo, uni gun ṯu’kkina ’the ma Arumgimis bana mo mmota mii gun ’kanuwa ḵanthi/ mo dhali mmowaṯ gway gi Tap̱a jin di’d ’de/ mo, a’di jin ta Tap̱a Yesus bana mo be.

5 Dhali aha/ dina gwo ibwa mo mmorogom um ki gwo mo, ba um me’d ’de/ ki sule/ ṯorkunu to ’baar mo ki a’di jin woṯẖki ’kwani ’peni Bampa/ Masir mo tani yan’ko’d a’di ki ’ce’d uni gwansan sho’k mo kun ’koki gam a’di gwo is mo be. 6 Dhali iman’doyu gwo, uni gun ’koki dhu mom buniŋ gana/ mo kun ’kona uni mo tani hili uni dhalki moŋ’kom pam buni ’pen mo tani uni bu’thkina a’di ka jindhiir ki sule/ sule/ ya ye ’ba/ mo e mondhurumi’da ’tum mo ntaga tee gi gwon dwall jin eḵa/ eḵ mo be. 7 Jasi me’d gi Bampa/ gi Pan Saduum mo dhali Paŋ Gamuura mo dhali bampa/ kun ’kon ki jiŋ ’kam mo tani dhali ki mii jin nyaḵa’d mo tani uni c̱i is buni ki miinyc̱al mo dhali mii mon’dap̱ e kun ’koki ta buyempa mo tani uni dhunu mo mmota she/mm mmothima jisa gi mo/o’d ki sule/ sule/ ya ye ’ba/ mo be.

8 Dhali e bway jin nyaḵki’d kan mo tani ’kwani gwansan e jan buni kun shu’bkina uni mo tani uni nyo/ki buŋgwar is mo mmowaḵ moshirr mo dhali mmowal gwo sor ap̱o/ uni kun caaca mo be. 9 Hili ka man’doyu gwo jin ca’d jin ta’da Miḵa/iil su’kkin ki gwo mo uni ki tap̱a ma ruma ’cesh mo tani uni walkin mo gom buŋgwar is ma Musa mo a’di bu’thki’da du mo mmodiki yer a’di is ki gway ki gwo sor mo, hili a’di oki gwo mo ki: Tap̱a Arumgimis ḵucurki /e mo be. 10 Hili ’kwani gwansan walkina sor ap̱o/ to kun ’kona uni ki mish ’ban mo dhali ki to gwansan kun misha uni en tom bwa mo me’d to/e gun dar gi bwan ’twa/ wal mo tani uni ’ce’dkunu sho’k mo be. 11 Wayyi e uni mo. Haali/ uni iikin e bway ma Kayiin mo dhali uni pura bwa mo mmobaṯẖ mii jin tham ma Balaam mii mo dhali uni ’ce’du/ sho’k mo e gwon dhaŋ ma Kuurah mo be. 12 Uni gwansan ta thalkin ap̱o/ moyuḵ bum gun ena um mo me’d jin ’kona uni ki ju/ mo mmo’kona uni i’kup̱a su mo mmowal mo mmonṯal ’de/ mo tani uni hilki is buni mo. Uni tana raḵ kun ḵutha e ki ḵu’th mo, kun ḵalkina ’tham ki sule/ mo, dhali uni ta cwa gi moyurun kun ḵu’th guŋkuru/ mo kun dar gi maman mo, me’di su/ mo tani uni wukin mo mmoyu’dkunu uni mo be. 13 Anyor yi’deny caaga/ jin bir bakal mo tani uni sekina gabusha/ mo gi mon’the is buniŋ gana/ mo, acul kun tana c̱a/ mo tani mondhurumi’da ’tum karkunu mo gom uni ki sule/ sule/ mo be.

14 Gom uni gwansan si’da/ mo tani Aḵnuuḵ a’di jin ta’da Aadama nyaḵum yili pesu/ mo tani c̱iki gwo is mo mmo/o gwo mo ki: Hili mo mo ma, Tap̱a a’di p̱u’dki’d mo nyaḵki kun dhelelin piti ka ris ris mo 15 mmotor gwon dwall ’twa/a p̱o/ ’kwani ’baar mo dhali mmodhu uni ki ku gi ’kona mii i’ba/ mo aris uni gun ushuna ush mo ka ris miim buni kun miikina uni mo, mmota a/ushiŋ gwo mo kun miikina uni ciki/ mo tani e gwo gi uni gun ushi gwo mo dhali ka ris gwo kun ’bitha’bi’th mo kun okina imanmii miinthus mo kun ushuna ush ap̱o/ a’di mo. 16 Uni gwansan ita imanmiiya gumgum mo, dhali waḵa waḵ mo mmobaṯẖ mon’dap̱ em buniŋ gana/ mo, dhali mmoc̱e ’twa/ mo mmodhu ’ba/ ki ca mo mmomaŋ ’kwani ka maḵ mo mmogam nyunycina/ gi shi/ miim ’boro’d mo.

17 Hili um mini mii ka gwo e mo, um gun enu mo, gwo jin ona uni gun dhuna Tap̱a Yesus Ḵrisṯẖos bana is mo. 18 Uni o um gwo mo ki: Ki mo jiŋ ’ko’d mo tani uni gun miin ka maḵ mo tani mini baṯẖ mon’dap̱ em buniŋ gana/ mo kun usha uni a/ush mo be. 19 Uni ta uni gwansan gun dhu gwo kun ḵwa/u bwa mo, kun ta ’kwani tony ’cesh mo, uni dar gi Shi/in mo be. 20 Hili um gun enu mo tani nyaŋi is bum ap̱o/ moŋgam gwo is jin ḵoguwa ḵo/ mo dhali ’thoyi e Shi/in Dheleladhelel mo ma. 21 Dhuyi is bum e mo/en ma Arumgimis mo. C̱ori momiimii gi Tap̱a Yesus Ḵrisṯẖos bana mo ntagi moŋ’koki/e ki sule/ sule/ ya ye ’ba/ mo. 22 Dhali miiyi mii ap̱o/ unin tiya mo ma kun shina bwa ’kup̱ mo. 23 Woṯẖi/ kun tiya mo ma, mmobor uni ka pije/ mo ’peni mo/o’d mo. Miiyi mii ki jiŋ ḵo/ mo ma, ap̱o/ kun tiya me’d jin shi/a um burrinye/ i e jin nyo/ki’d e buŋgwar is mo.

24 Dhali e a’di jin mish um dhu mo ’peni monṯag mo tani dhali mmoc̱i um ki dar gi mii kun nyo/on mo ibwambori buŋ’kus monycam piti ki moŋ’kuny bwa mo tani 25 e a’di jin ta’da Arumgimis ’de/ mo tani Amanwoṯẖ bana e a’di jin ta’da Yesus Ḵrisṯẖos Tap̱am bana mo tani dhalki a’di a’di idi’d ki monyca mo dhali mmo/eḵa/ eḵ mo dhali mom’bi’th mo dhali moshirr jin di’di ṯwa/a/ ’baar mo dhali jin di’d shwane/ mo dhali jin midi di ki sule/ sule/ ya ye ’ba/ moonnii. Amen.