1 Dhali isi gwo jin gamu me’d mo jin ta jin ṯwa/a/ mo taki’d gi gwoŋḵan gom mo jin luŋuwa luŋ mo dhali mo jin ḵogu mo jin ta ji gi mony’cesh mo. 2 Haali/ gu’b burrinye/, a’di thosonkunu mo, a’di jin ta jan ’de/ jin di’d ka pije/ mo. E a’di mo tani a’di ita mo jin karkunu ṯirkina/ ma lamba/ mo, dhala tharabeesa mo, dhali maaŋḵuthu’d jin karu i Buŋ’kus mo, a’di jin yuḵkunu ki Mo jin Ḵogu mo be. 3 Dhali ibwamp̱o/ mo jin dhunu burrinye/ mmoshir ka maḵamp̱o/ mo tani gu’b burrinyeŋ kamu/ doshki’d mo jin yuḵkunu ki Mo jin Ḵoguwa Ḵogi ’baar mo, 4 mmotana a’di ka gwaṯa/ gi ’dolkon gana/ mo gom mo jin duḵuwa ’bicajwahar mo dhala Sanduuḵ jin ’koshu is ki ’dolkon gana/ mo i’ko’d gwar piti ’baar mo, a’di jin dhunu gwo jin gamu me’d mo, a’di jin taki’da jji mo jin ta ’dolkon gana/ mo jin dhunuwa manna ibwaman mo, dhali cwa ma Haruun mo jin lu’kki’d mo dhali wosha ba’dga/ ki gwoŋḵan jin gamu me’d mo. 5 Dhali ap̱o/ a’di mo tani c̱arabiim[a] ’kon mmohetha bi ap̱o/ mo jin miinu mii ka the/m me’d mo. Gom to gwansan mo tani ana mola gwo o shwane/ e busho’k mo.

6 Mmomiikunuwa ris to gwansan kun nyoŋkunu mo wakansan mo tani igasiis ’kon mmoṯikir ii mo e gu’b burrinye/ jin di’d ka pije/ mo, mmothim miim buni kun boṯa uni mii mo kun ṯẖidhu mo. 7 Hili ki mo jin ’kon ma p̱o/i su/ mo tani a’di ta jasi mo jin min ma gasiis jin ca’di ya mo, dhali hili a’di midi yaki jasi me’d ’de/ ki yil mo, dhali a’di midi ya ki dar ga bas yisa, jin mina a’di ’ciṯẖ ’kus gom is piti mo dhali gom mii kun thama ’kwani mii mo be. 8 Dhali ki mii gi wakan mo si’da/ tani Shi/in Dheleladhelel a’di ṯorki bway e mo jin ḵoguwa ḵo/ mo, ki a’di dinuki ’ka’d ’twa/ naskina/ mo me’d mii gi gu’b burrinye/ ma pije/ jin doshki’d naskina/ mo 9 (a’di jin ta’da shimpira/ mii gom she/ yil yan mo). Isi ki gwo yansan jin miinu ki jiŋ garr mo tani to gun c̱inu ki me’d mo dhali to gun c̱inu mo mmo’ciṯẖ ’kus mo mmomiiya basa ’cesh mo, a’di jin mol ’bor ’twa/ ma du ’bor ki ’bor gana/ mo goma luŋ jin luŋu mo, 10 hili uni ki us mii is mo jasi gom tonṯe/ mo dhali gom tomp̱i mo dhali aris miin tiya kun lamu is ki she/ ki she/ mo gom gwon dhamo/ mo, uni kun ta mii gun ḵankunu mo gom buŋgwar is mo, mmo’dap̱ uni ’twa/a ’cesh mo ntagi mo jin min ma tee irica ri’c is mo.

11 Hili ka Ḵrisṯẖos piki’d mo mmota gasiis jin ca’d mo gom tom ’boron mo kun p̱u’dkin mo tani yan’ko’d e a’di jin ta gu’b burrinye/ jin bol a’di e ki ca mo dhali jin bol a’di e ki ’bor mo (a’di jin ’konuki uḵ ki me’d gi ’kwani mo, a’di jin diki ta mo jin uḵuwa uḵ mo e mony’cesh yansan mo) 12 a’di cic̱ki’d me’d ’deŋ gana/ mo gom mmoṯeya ṯe/ mo e Mo jin Ḵogu mo, dhali a’di diki budha bas mi mo dhala bas gi ushi bip̱ mo, hili abas pitiŋ gana/ mo, wakan a’di ki bu’th mo jin wanuwa wan ’ba/ ki sule/ sule/ mo. 13 Haali/ waḵki/ buŋgwar is gi ’kwani kun bulabul mo ḵukuskunu ka bas mi mo dhala bas ma morbip̱ mo dhali ki ’piny gi nas bip̱ mo dhagamki’da dhagam mo gom mo jin minu dhelel buŋgwar is mo tani 14 bakata ’te/ imin ma bas ma Ḵrisṯẖos, a’di jin c̱i is piti ka Arumgimis mo ki Shi/in gi mo ma sule/ ya ye ’ba/ mo, a’di jin dara’d gi thalkin mo mmodiki dhelel um ’twa/ ma dum bum ’peni mii kun wukin mo mmomii to goma Arumgimis jin di ki e mo.

15 Wakan a’di ta a’di jin doshki’da galany mo mmota gwon this jin gamu me’d mo. Wakan, ki uni gwansan kun yuḵkunu mo mini ’taki bu’th mal gi mo ma sule/ sule/ ya ye ’ba/ mo jin onu gwo is mo, haali/ mowuŋ kamu/ bu’thki mo mo, a’di jin wanki uni ’ba/ mo ’peni gwon dhaŋ mo e bwaŋ’kwariny gwo jin ṯwa/a/ jin gamu me’d mo. 16 Haali/ waḵki/ gwo gi mal jin gamu me’d mo di’d mo tani jwa gi a’din ’de/ yan jin kar a’di mo tani a’di minu mii nyo/ mo be. 17 Haali/ gwo gi mal jin gamu me’d mo tani a’di bu’thki mo jasi ’ko’di mowu mo, haali/ a’di yisa minu bu’th ki ’bidha, ki com pitin ’de/ yan jin kar a’di mo tani di’d ki e mo naskina/. 18 Me’d isi kani gwo jin gamu me’d jin ta jin ṯwa/a/ ’konuki ṯe shoka ’cesh ki dar ga bas mo be. 19 Haali/ ka ris gwoŋḵan kun ’kwarkunu mo gi gwoŋḵan jin c̱inu ka ’deṯe/ ’deṯe/ mo baḵkin ma Musa gwo e ’kwani ’baar mo tani a’di ki budha bas gi ushi bip̱ mo dhali mi mo, nyaḵki yi’de/ mo dhala mur ḵa’bal jin ta’da duḵ is mo dhali cwa ma ’tasha jal bip̱ mo dhali a’di ki ḵukusa bas ap̱owa warka/ ki is piti mo dhali aris ’kwani ’baar mo, 20 mmo/o gwo mo ki: Abas yansan a’di ta gwo jin gamu me’d mo jin ḵan ma Arumgimis um gwo mo be. 21 Dhali a’di si’da/ ki bway jin nyaḵka’d kan mo tani a’di ḵukuski’da bas ap̱o/ gu’b burrinye/ mo dhali eya aris toŋ’kul bwa mo kun mishu to mii nycine/ mo goma luŋ jin luŋu mo be. 22 Ka jiŋ gana/ e bwaŋ’kwariny gwoŋḵan jin c̱inu mo tani aris to ’baar ka woho/ mo tani uni dhelelkunu ka bas mo, dhali ki dar gi mo jin woluwa basa ’cesh mo tani mo jin minu ’taki dhala mure/ gi miinthus gi ’kwani ’pen mo tani mini ’taki di yisa.

23 Wakan a’di ta mii jin minu mii ŋap̱a ŋap̱ mo goma yinyjwa gi to gi momis mo mmodhelel mo ki mii gwansan kun boṯu mmoṯẖi’th mo, hili to gi momis ki is buni mo tani mmodhelel mo ki mii kun ’ciṯẖuwa basa ’cesh kun bol gwansan e mo be. 24 Haala Ḵrisṯẖos a’di cic̱ki’d mo, yisa e mo jin ḵogu mo jin uḵu ki me’d gi ’kwani mo, a’di jin ta’da yinyjwa gi a’din ’deŋ gana/ mo, hili e momis ki is pitiŋ gana/ mo tani, hili a’di piki’d mo ibuŋ’kus ma Arumgimis mo gom gway bana mo be. 25 Walla yisa mmoc̱i is piti mo mmorash me’d ka ris mo me’d mii jin miin ma gasiis jin ca’d mo mmocic̱ mo e Mo jin Ḵogu mo me’d ’de/ ki yil mo ka basi me’d mo jin diki ta jim piti mo. 26 Haali/ wakan mo tani a’di mina isi ’taki ’kosh ka nyor mo mmorash me’d ka ris mo ’peni mo jin ḵa’bkunu mony’cesh sho’k mo. Hili ki mii gi wakan mo tani, a’di piki’d jasi me’d ’deŋ gana/ mo e ’pemen jiŋ ’ko’d mo gi she/ yil mo mmoḵal miinthus sho’k ka pije/ mo mmoc̱ikina a’di is piti mo mmota to jin ’ciṯẖu/ ’kus mo be. 27 Dhali jasi me’d jin karkunu wu gom ’kwani mo mmowu mo me’d ’de/ mo tani dhali yan’ko’d mo jin toru gwon dwall ’twa/a ’cesh p̱u’dki’d mo tani 28 wakan aḴrisṯẖos, a’di jin c̱ikunu mo mmoḵal miinthus gi ’kwani ka ris me’d ’de/ mo tani a’di midi piyu/ doḵ/e me’di su/ mo tani yisa mmo/us mii is mo gom miinthus mo, hili mmota uni gwansan is ki me’d mo, uni gun gananki ’ba/ ki ganan jin shi/i’d mo mmoc̱or a’di mo be.

<- Ibraniyiin 8Ibraniyiin 10 ->