1 Wakan ana mina mii c̱iya hirdhe/ ki ’dish ’dish mo ki gwo jin ciḵkina ana mo, isi ciki/ ki ana minu ’koki bor ’peni a’di mo. 2 Haali/ waḵki/ gwo jin bahu ki iman’doyu gwo mo tani doshki’d ki sho’k mo dhali aris mo jin dhaŋu gwo mo walla mo jin ushu gwo ha e mo bu’thki mo jin raḵuwa raḵi bway jin ta jiŋ ḵar/e mo tani 3 i/ana mina ye kata mo, waḵki/ ana p̱inykina is mo gom dhan gumbway mowoṯẖ yan mo? A’di baḵkunu iṯwa/a/ mo ki Tap̱a mo, dhali a’di ṯelkunu sho’k mo e ana mo ki uni gwansan kun ciḵki a’di mo be, 4 ka Arumgimis di’d si’da/ mmoḵal gwo o ki jamas mii mo kun miikina a’di mo dhali aris momer mo dhali aris miimer kun ’kona e ki she/ ki she/ mo dhali ki to kun c̱inu ki me’d ki Shi/in Dheleladhelel mo, kun pwaḵkunu bwa mo isi ki bwam pitiŋ gana/ mo be.
A/’kaŋ’kup̱ gi Mowoṯẖ mo
5 Haali/ Arumgimis diki kar gwo gi moshirr mo ap̱o/ iman’doyu gwo mo gom to gun ta kun this kun minu mii e mony’cesh yan mo, a’di jin ’kokina ana mo mmo/o mo. 6 A’di pikunu mo e moŋkamu/ e gwo ma Arumgimis mo ki:
Wathi/ gi wakata mo, jin mina /e i/o bwa ki a’di mo,
walla ya/ gi wathi/ mo ki /e mini hil a’di i e mo?
7 /E karki a’di gom ari mo mo mmota jin gwa’da’d ki iman’doyu gwo mo.
Dhali /e shumki a’di ki monyca mo dhali ki montaḵ mo,
8 mmodhukina /e aris to ’baar mo e moshirr piti e bwaŋ’kwariny sho’k piti mo be.
Dhali goma ris to gun dhukunu mo e moshirr gi ’kwaniny’cesh mo tani a’di diki dhal toŋ kamu/ ka pije/ mo ’peni moshirr piti mo. Me’d jin dina a’di kan mo tani, ana ’konaki p̱ara ris to e naskina/ mo e moshirr piti mo. 9 Hili ana p̱arkina Yesus e mo, a’di jin diki’d ki ari mo mo mmokarkunu a’di ki gwa’d mo ki iman’doyu gwo mo tani a’di shumkunu mo ki monyca mo dhali montaḵ mo gom isa nyor jin wukina a’di mo. Wakan ka ’the ma Arumgimis mo tani a’di midi ’taki nyoḵ wu mo goma ris ’kwani ’baar mo be.
10 Haali/ a’di gama’d ki isi gam gana/ mo ki a’di, a’di jin uḵu to ’baar mo gom gway piti mo dhali a’di jin ’kon ma ris to ’baar mo mmo/uḵa uḵ ki a’di mo, mmosuskina a’di iya/ gi ’kwani ka ris mo e monyca mo, a’di jin ta’da shu/um bway gom gway gi mowoṯẖ buni mo tani ki a’di minu ’taki kar ji gi isi ’borgaŋ gana/ mo ki mo jin ’koshu is ka nyor mo be. 11 Haali/ a’di jin dhagamki’da dhagam mo dhali uni gwansan kun dhagamkunu mo tani uni takin gi mo ma ṯel ’pen jin ta’da ’kaŋ’kup̱ mo. A’di ḵa ba/ idina is ki ’the a’di mo mmoyuḵ uni ki iwaḵ piti mo, 12 mmo/o gwo mo ki:
Aha/ mina bah /e gway pini e iwaḵ pem mo
dhali e bwaman ma waambuhany ’kwani kun tuli is mo tani aha/ mina maŋ /e mo be.
13 Dhali doḵ/e,
Aha/ mina kar moŋgam gwo is pem e a’di mo,
Dhali doḵ/e,
Aha/ a’dihe/ mo, dhali uc̱i kun c̱in ma Arumgimis aha/ mo be.
14 Me’d jin wakina a’di kan mo mmobu’thkina uc̱i buŋgwar is mo dhala bas mo tani a’di ki is piti si’da/ bu’thki buyempa jin nyaḵka’d kan mo, ki, ki e mowu mo tani a’di midi ’taki ’ce’d a’di sho’k mo, a’di jin ta gi mom’bi’th gi mowu mo, a’di jin ta tap̱a ma ruma ’cesh mo 15 dhali ’cuḵ uni gwansani ’baar mo, uni kun ’kokin e mo jin ḵo/kina uni wu mo e moshirr gi mondeḵ mo mmo’baar moŋ’koki/em buni mo. 16 Haali/ ka jiŋ gana/ a’di diki ta gwo gom iman’doyu gwo mo a’di jin shwakina a’di jwa mo, hili gom emen ma Ibrahiim mo be. 17 Wakan a’di ḵa ba/ iṯuju mmowa e ki iwaḵ piti mo eya ris ’twaŋkal kuku/ mo, wakan ki a’di midi ’taki war ka gasiis jin ca’d mo jin ta’da manmiimii mo dhali jin ta isiŋ gana/ mo, e mo jin miinu to goma Arumgimis mo, mmomii mii jin ta ji ma the/m me’d gom miinthus gi ’kwani mo be. 18 Haali/ gom a’di ki is piti mo tani, a’di ’koshkina is ka nyor mo dhali a’di palkunu mo, a’di misha a’di uni gwansan woṯẖ mo kun palkunu mo be.
