1 Haali/ me’d jin dina gwoŋḵan jin c̱inu mo mmota a’thintha/ gom tom ’boron kun mini p̱u’du/ mo, mmodhal mii yansan e i is mo gom jamas gana/ gi to gwansan kun p̱iyi mo ki mii mo tani a’di midi mol mii ki sule/ sule/ mo nyaḵki mii jin ’ciṯẖu/ to/e ’kus mo mmomiiya basa ’cesh mo jin ṯikirkunu mii mo mmoc̱i mo ki yil ’ko’di yil mo mmodhu uni gwansan ki kum ’boron mo mmo’dish mo is mo be. 2 Gwo jin ta jiny c̱a’ckon mo, a/mina uni daḵ mo mmoc̱i to jin ’ciṯẖu/ ’kus mowa? Waḵki/ imanluŋa luŋ uni dhelelkunu mo hila/ tani uni yisa mini doḵ/e ’ko mo mmota gi ’twa/ ma du gom miinthusa kamu/ mo. 3 Hili e to gwansan kun ’ciṯẖu/ ’kus mo mmomiiya bas mo tani gwo diki’d jin kakunuwa ka e mo gom miinthus mo ’ko’di yil ’ko’di yil mo be. 4 Haali/ a’di molu mii mo ka bas ma morbip̱ mo dhali mi mo mini ’taki ḵal miinthus gi ’kwani mo be.
5 Haali/ a’di gi wakan mo tani, ka Ḵrisṯẖos p̱u’dki’d e mony’cesh yan mo tani a’di ki o gwo mo ki:
To kun ’ciṯẖu/ ’kus mo mmomiiya bas mo dhali to gun c̱inu mo tani /e dina bwa ki o ki a’di mo,
hili buŋgwar is mo tani /e thosonki a’di gom aha/ mo be.
6 E mo jin purkunu to jin c̱inu mo dhali to kun c̱inu gom miinthus mo tani /e diki bu’th mo jin dina ’ce ki ’kol /e mo be.
7 Dhali yan’ko’d aha/ ona gwo mo ki: Hili mo mo ma, aha/ p̱u’dkina mo mmomii bwam pini mo, ayy Arumgimis mo,
me’d gwo jin ’kwarkunu gom aha/ mo e ari gwo ma warka/ mo.
8 Ki a’di o gwo e ibuŋ’kup̱ imaṯṯaan mo ki: /E walla dina bwa ki o mo, walla /e yisa ta gi ’ceŋ kamu/ jin ’kol /e mo gom to gun ’ciṯẖu/ ’kus mo dhali to gun c̱inu mo dhali to kun c̱inu mmopur ki o’d mo dhali to gun c̱inu gom miinthus mo tani (Uni gwansan, uni c̱inu mo me’d isi gwo gi gwoŋḵan jin c̱inu mo be), 9 yan’ko’d doḵ/e a’di ki mar a’di is mo mmo/o gwo mo ki: Hili mo mo ma, aha/ p̱u’dkina mo mmomii bwam pini mo. A’di p̱uuki mii jin ṯwa/a/ yan mo tani ki mii gi wakan ki a’di midi ṯel jiŋ ’ko’d sho’k mo be. 10 Dhali ki bwa ma Arumgimis yan mo tani ana dhagamkunu mo ki to jin c̱inu jin ta buŋgwar is ma Yesus Ḵrisṯẖos mo me’d ’de/ ki sule/ mo.
11 Dhali igasiis kun cani ’baar ka ’deṯe/ ’deṯe/ mo doshkin isa yempa/ ap̱o/ momiin to mo, mmoc̱i to kun rashu mii ki rash rash mo mmo’ciṯẖa/ basa ’cesh mo kun nyaḵkin kan mo, uni kun moli miinthus gi ’kwaniny’cesh ḵal ki sule/ sule/ mo. 12 Hili ka Ḵrisṯẖos a’di jin c̱iki is piti mo mmota to jin ’ciṯẖu/ ’kus mo tani me’d ’deŋ gana/ gom ki sule/ mo gom miinthus gi ’kwani mo tani a’di c̱a’bki’d ki me’da bim poros ma Arumgimis mo be. 13 Dhali yan’ko’d a’di c̱orki mo mo ntagi ’kup̱ piti minu ’taki dhu mo mmota cwa gom sho’k piti jin mina a’di idhu mo be. 14 Haali/ gom me’d ’deŋ gana/ mo tani a’di c̱iki is piti mo mmodhu aris uni gwansani ’baar mo kun dhagamkunu mo ki kum ’borgaŋ gana/ mo gom ki sule/ mo. 15 Dhali Shi/in Dheleladhelel si’da/ a’di ki o gwo mo gom ana mo. Haali/ ’ko’di gwo jin onu is mo ki:
16 Yansan ta gwo jin miga/ gam me’d nyaḵki uni mo
’ko’da tee gwansan mo. A’di ta gwo jin ona Tap̱a mo ki:
Aha/ mina dhu gwoŋḵan pem jin c̱inu eya dum buni mo,
dhali ’kwar uni e bwam buni mo be.
17 Dhali yan’ko’d a’di ki mar a’di is mo mmo/o gwo mo ki:
Aha/ mina diki ka miinthus buni e mo dhali miim buni kun shina uni mii ki sule/ sule/ mo.
18 E mo jin dhaluwa mure/ gi miinthus gwansan ’pen mo tani moŋkamu/ yisa di’da doḵ/e jin minu mii c̱i to gom miinthus mo be.
Dhalki Ana ’Disha Mo Is mo dhali Ṯel Sho’k mo
19 Wakan iwaḵ mo, me’d jin takina ana ki mo jin wuna ana a’di jwa i is mo mmocic̱ mo e mo jin ḵogu mo ka bas ma Yesus mo 20 ki miin this mo dhali ki bway gi mii kun ’konu ki e mo jin ḵa’dkina a’di ki burrinye/ yan jin shiru ka yolol mo, a’di jin ta buŋgwar is piti mo be, 21 dhali me’d jin takina ana ka dhana gasiis jin caaca mo e gu’b ma Arumgimis mo tani 22 dhalki ana ’disha mii is mo ka duŋ gana/ mo mmo’tu’d mo mmomish mo ki isa duŋ gana/ ki moŋgam gwo is mo, ka dum bana kun ḵukuskunu ana ki dhelel dhelel mo ’peni tonthus gi ’twa/ ma dum bana mo dhali buŋgwar is bana kun lamkunu ki yi’de/ jin c̱a’bki yidhiṯẖ yidhiṯẖ mo be. 23 Dhalki ana budha ki ri’d mo ma ’teŋ kap̱em bana jin mina ana pi ki dar gi monṯosh mo, haali/ a’di jin oki gwo is mo tani a’di ta a’diŋ gana/ mo be. 24 Dhali dhalki ana si’da/ ’kona isi gwo i bwa mo, ma mo c̱i’th ci is ki mii ka rem ’kup̱ mo mmo/ena en mo dhali mmomii miim ’boron mo, 25 yisa mmop̱inykin is gom mo jin tulu is mmonṯal ’de/ mo, me’d jin boṯa kun tiya ki mii mo, hili mmo’bi’th ci adu is ka rem ’kup̱ mo, dhali isa yempa/ mo ki nyanye/ mo me’d jin p̱arkina uma Tee e mo mmo’dishkina a’di ki ’dish ’dish mo be.
26 Haali/ waḵki/ ana miina miinthus mo mmoḵal mii ki is mo ’ko’di ana bu’thkina mii jin nyiṯẖkina ana gwoŋ gana/ mo tani moŋkamu/ yisa di’da doḵ/e jin minu mii ’ciṯẖ to/e ’kus mo gom miinthus mo be. 27 Hili mii jin ḵogu is mo tani a’di ’thoyi mo gi gwon dwall mo dhali o’d jin c̱a’b ki wur wur mo, a’di jin midi shwa uni kun ta ’kup̱i ’baar mo be. 28 Wathi/ a’di jin ’ce’dki gwoŋḵan jin c̱inu ka Musa mo tani a’di wuki’d mo ki dar gi momiimii mo ki ’twa/ gi iman/o gwo kun ’koni su/ mo walla ikwara mo be. 29 Ba shi/ ma jisa bala wakata mo a/um kulum gwo ibwa mo ki a’di midi cil she/ mo gom wathi/ jin saki Ya/ ma Arumgimis ki sho’k mo, dhali jin sorki’da bas gi gwo jin gamu me’d mo, a’di jin dhagamkunu a’di mo dhali waḵ Shi/in ma ’the mo? 30 Haali/ ana misha a’di mo, a’di jin oki gwo mo ki: Mo jin minu tor gwon dwall ’twa/a ’cesh mo tani a’di ta jim pem mo. Aha/ mina gar to ’kusi bway mo. Dhali doḵ/e, Tap̱a a’di midi dwall ’kwanim piti gwo mo. 31 A’di ta to jin ḵogu is mo mmomina ’kwani ṯa’k mo e me’d ma Arumgimis jin di ki e mo be.
32 Hili yuḵa teen dhamo/ gwansan mo ki ’ko’di um ’kokina e ma du kun ’twaḵki mo mo tani um ’dim ’kup̱ mo e mii jin ’batha’ba’th jin jwakaṯki’d ki mo/isa nyor mo 33 dhali ka cima tiya mo mmoṯor ibwambori ’kwani mo mmota businye/ goma sor mo dhali monṯo’c bwa mo dhali ka cima kamu/ mmogam mii me’d ki uni gwansan kun miinu mii ki shi/ mo wakan. 34 Haali/ um ḵo’cki e gom ’kwani habuus mo dhali um bu’thki mo jin dilkunu um to mo kun tana um mo ki bwaŋ ’kunyga/ mo me’d jin misha um ki um ki is bum tan gi tom bum kun ’boron ki ’bor gana/ mo dhali kun mini ’ko ki sule/ mo. 35 Wakan dhalku/ ki buḵ is bum mo ’peni mom bum jin wuna uma wuny jwa i is mo, a’di jin ta gi dhan mo jin isha to ḵumma/ mo. 36 Haali/ um mini mii ta gi mo jin ’dimuwa ’dim ’kup̱ mo wakan ki um mini ’taki mii bwa ma Arumgimis mo dhali bu’th a’di jin okunu is mo.
37 Haali/ um c̱orkina c̱or mo ari’ceenne/ naskina/ mo
dhali a’din ’deŋ kamu/ jin midi p̱u’du/ mo dhali midi diki ta adiiṯe/ mo.
38 Hili a’dim pem jin ta’da ḵar/e mo tani midi di ki e e moŋgam gwo is mo,
dhali waḵki/ a’di midi guwa ’kany’cesh ka nyaŋ’ko’d mo tani
aḵashiram pem midi dar gi mo jin midi ’kol ’ce mo e a’di mo be.
39 Hili ana ’konaki ta uni gwansan kun mini ’dowa ’kany’cesh ka nyaŋ’ko’d mo dhali kun ’ce’du sho’k mo, hili ana tana uni gwansan kun ta gi moŋgam gwo is mo dhali mmodhuwa ḵashiram bana mo be.
<- Ibraniyiin 9Ibraniyiin 11 ->
