ṮAKWIIN 39

1 Dhali aYuusup̱ a’di isuskunu ka luŋgu’b e Pa Masir mo dhala P̱uthip̱ar jin cil ma askar goma P̱irawn dhali wathi/ jin cil ma askar kun jina ji mo gom ’Kwani Masir mo a’di yolki a’di ’peni ’Kwani Isma/iil mo uni kun ḵalki a’di ka luŋgu’b ’peni mun mo. 2 Dhali Tap̱a nyaḵki di ka Yuusup̱ mo dhali a’di warki’d ki wathi/ jin hana mii me’d mo dhali a’di diki’d e gu’b gi tap̱am piti jin ta Wathi/ Masir mo. 3 Dhali tap̱am piti mishki mo mo ki Tap̱a nyaḵki di ki a’di mo dhali ki Tap̱a raḵki’da ris mii jin mina a’di ha me’d mmorusa/ rus mo. 4 Wakana Yuusup̱ gamki mii ma ’the e jis/em piti mo dhali buḵ a’di ’pen ka pije/ mo dhali a’di ki kar a’di mmota amanhil to gom gu’b mo dhali kar a’di ki tap̱a ap̱owa ris tom piti jin tana a’di mo be. 5 ’Pena cim yan jin karkina a’di a’di mo mmota amanhil to gom gu’b piti mo dhali kar a’di ki tap̱a ap̱owa ris tom piti jin tana a’di mo tani Tap̱a ’borki ’kwani gi gu’b gi Wathi/ Masir mii mo gom gway ma Yuusup̱ mo. Dhali mom’bor mii gi Tap̱a diki’da p̱o/ aris to ’baar mo kun tana a’di mo e bwaŋ gu’b mo dhali e bwam bunto mo. 6 Wakan a’di dhalki’da ris to ’baar mo e me’d ma Yuusup̱ mmohil mo dhali mmodhalkina a’di a’di e me’d piti mo tani a’di yisa shwana jwa mo gom toŋ kamuwa, hili jasi gom tonṯe/ jin shwakina a’di mo.

Dhala Yuusup̱ ŋala/ ’bora jaro/ ime’da/ a’di hili mo ki jis/e jin yesayes mo. 7 Dhali ki ara cima kamu/ mo tani a’bom gi tap̱am piti, ayim ’cemi’dki’da Yuusup̱ ki e mo dhali o a’di gwo mo ki: Ishi nyaḵki aha/ mo ma. 8 Hili a’di ushki’d mo dhali owa ’bom gi tap̱am piti gwo mo ki: Hili mo aha/ dhalkina tap̱am pem to ime’d mo dhali a’di dina jwa ki shwa mo goma ris to mo e gu’b mo kun dhalkina a’di aha/ e me’d pem mo. 9 A’di diki caaca kagahara e gu’b yan mmobol aha/ e mowa. Toŋ kamu/ yisa ’tasha a’di aha/ ’twa/ mo yisa hili isi ciki/ is piniŋ gana/ mo haali/ /e ta ashim piti mo. Aha/ mina mish dhan miinthus yan mii mo wakan mana dhali mii miinthus ap̱owa Arumgimis mowa? 10 Ba dhala yim ṯorki’da ṯor ka Yuusup̱ isa yempa/ yempa/ mo dhali a’di ’tena bwa mmociḵ gwo ma yim mo mmo/isha ayim mo walla mmonyaḵ c̱a’b ka yim mo. 11 Hili ka cimi ’deŋ kamu/ mo me’d jin yakina a’di gu’b mo mmomiiya ṯu’c piti mo dhali ’kwanin tiya yisa ’koni bwaŋ gu’b yisa uni kun miina ṯu’c e gu’b mo tani, 12 ayim bu’thki a’di e burrinyem piti mo mmo/o a’di gwo mo ki: Ishi nyaḵki aha/ mo. Hili a’di dhalki burrinyem piti e me’d ma yim mo dhali gus mo dhali p̱u’d ka pije/ ’peni gu’b mo. 13 Dhali ka yim p̱arki mo e mo ki a’di dhalki burrinyem piti e me’d ma yim mo dhali p̱u’d ka pije/ ’peni gu’b mo tani 14 ayim yuḵ ’kwani gi kuŋ gu’b ma yim mo dhali o uni gwo mo ki: Hili a’di guyi Wathi/ Ibraan yan e bwam ana mo mmosor ana mo. A’di seyi bwaŋ gu’b mo dhali di ki gwo ibwa mo mmo/ish nyaḵki aha/ mo dhali aha/ cuukina ki dhan ’twa/ jin caaca mo. 15 Dhali ki a’di ciḵki gwo ki aha/ ’deka ’twam pem ki mis mo dhali cuu mo tani a’di dhalki burrinyem piti i aha/ mo dhali gus mo dhali p̱u’d ka pije/ ’peni gu’b mo. 16 Dhali yan’ko’da yim karki burrinyem piti e me’d ma yim mo ntagi tap̱am piti p̱u’dki’di pa mo. 17 Dhali ayim ṯorki a’di gwo jin nyaḵka’d mo mmo/o ki: Wathi/ Ibraan yan jin ta c̱iŋkina/ a’di jin suskina /e ibwaman ana mo p̱u’dki’di aha/ mo mmosor aha/ mo be. 18 Hili me’d jin ’de’kkika/ ’twam pem ’kup̱ki mis mo dhali cuu mo tani a’di dhalki burrinyem piti e aha/ mo dhali p̱u’d ka pije/ ’peni gu’b mo.

19 Ki tap̱am piti ciḵki gwo ’peni ’twa/ gi ash mo ki: Mii a’dan jin miikina c̱iŋkinam pini jan aha/ mo tani anyor piti ’batha’ba’th mo. 20 Dhali tap̱a ma Yuusup̱ bu’thki a’di mo dhali kar a’diya sijin mo e mo jin ṯa’kkunu habuus ma maliḵ nycine/ mo dhali a’di diki’da sijin imun mo. 21 Hili Tap̱a a’di nyaḵki di ka Yuusup̱ mo dhali ṯor a’di mo/en piti jin ṯelu sho’k mo dhali c̱i a’di mii ma ’the i jis/e ma manhila sijin mo. 22 Dhali amanhila sijin c̱iki’da Yuusup̱ gwo ime’d mo mmota amanhil ’kwani ma sijin i’baar mo uni kun ’kokina sijin mo. Dhali aris mii gunn kun miinu mo tani a’di ki mii uni mo. 23 Dhali amanhila sijin mo tani a’di c̱ina hirdhe/ yisa ki mii gunn kun miin ma Yuusup̱ mo mmohila hil mo haali/ Tap̱a nyaḵki di ki a’di mo dhali eya ris to gunn kun miina a’di mo tani Tap̱a dhuki uni mmorusa/ rus mo be.

<- ṮAKWIIN 38 ṮAKWIIN 40 ->